鏡像密語: 第二十六章、一些該想通但未想通的小事

洛妍如是者訓醒就單拖去迪迪尼。

（今日好重要好重要，就算得自己一個人去都要打扮得好好睇睇，畫一個完美既句號）

洛妍揀左一條黑色既連身短裙，束起左波波髮型，洛妍噴一噴香水係手腕上，隨即一手拎住粉紅色既迪士尼頭箍出門。

洛妍一到迪迪尼門口，成個腦都浮起左好多畫面。

（呢啲係咪叫回憶？）





（係咪當得我自己一個既時候，先會知咩叫寂寞，先會特別想有一個人陪)

（但明明我已經好努力努力學識自己一個人面對寂寞）

（咁點解今日又會諗起你？）

（我記得你當日同我一齊整呢張年卡，記得就係係呢到你唔見左張學生證，記得我點樣幫你搵返，記得你見我拎起左粉紅色頭箍睇左3次都係唔捨得買，然後你二話不說拎左去比錢，記得你係點樣扭計要我買爆谷比你食，記得每一次都係點樣扶我上落機動遊戲，記得你點樣笑我睇米奇戲院次次都比人嚇到，記得我話送公仔比你你有幾開心，記得你點樣係迪迪尼入面發我脾氣但最後都會死死地氣搵返我⋯⋯）

（我記得既野原來太多）





洛妍早係琴日已經知唯楓都趁住年卡到期前黎左迪迪尼，不過佢唔係同洛妍黎，都唔係自己黎，而係同另一個黎⋯⋯

（我冇難過，只係⋯⋯）

（我到底係掛住你定係我係懷念緊我地一齊黎呢到玩既感覺？）

洛妍每行過一個景點或者設施都覺得隱隱約約見到唯楓既身影咁，唔係真係肉眼見到個種見到，而係心眼見到、回憶見到。

直至洛妍漫不經心咁行到space mountain 既入口，排完隊坐上左車卡後⋯⋯





（我個心真係幾亂下）

（因為我依家望住隔離懸空既座位係到諗如果亦言係到就好啦⋯⋯）

（喂你唔係黎哀悼你同唯楓單野嫁咩？）

（係嫁，但我知呢啲回憶會隨住時間慢慢沖淡，畢竟唯楓知我係因為內疚而留底）

（佢話佢知我對佢一早冇左感情，咁唔叫愛情）

（佢有新開始啦，我唔怪佢，我反而好想佢開心幸福，因為我知佢同我一齊，大家都好痛苦，以前我話我如果分開左我絕對唔會祝福佢，天蠍座丫嘛，點會想佢開心既原因因為唔係我喎）

（佢話佢會祝福我，當時我唔明，但我依家明，因為你曾經對呢個人付出過真心，你只會想佢好，就算當中有恨，但當你對佢既愛大過恨，你會有一日都可以偉大到係到諗如果有另一個人比你更愛佢，你會捨得接受同放手，只要對方過得好、過得幸福就得）

（我梁洛妍好有福份領教唯楓既身教，因為佢我先知原來愛一個人係可以咁卑微、咁偉大、咁刻骨銘心）





（咁我係咪應該成全佢對我既祝福？）

（佢話佢唔想我同另一個一齊，但佢同樣偉大到話佢唔可以阻止我奔向另一個比佢更好既人，因為佢都想我幸福）

（愛一個人，係咁矛盾、係咁固執、係咁痛苦嫁啦）

（咁點樣愛一個人先算啱？）

（咁點樣愛一個人先會令自己唔後悔？）

「啊—————」車卡上既遊客一陣尖叫叫醒左洛妍⋯⋯

（我突然醒起唯楓話過佢覺得從來冇擁有過痛過擁有過之後失去）





（我唔同意佢既講法係因為我覺得如果從來冇擁有過既話，投放既感情都唔多，咁傷心既程度都比較少，抽身都比較快）

（佢話感情唔係有數得計，佢話：就算分開左有幾痛苦都好，但總叫曾經有一齊過既甜中和返呢種苦）

（或者都啱既⋯⋯）

（咁點先可以唔後悔？）

（唯楓答過我：由我第一眼見到你開始，我就中意左你，中意係冇得後悔，邊個都可以阻止愛情既來臨，中意左就係中意左）

（唯楓你講得啱，依家既我對你呢番說話既理解係：你十年後或者會後悔係愛情作出既任何決定，係因為你有比依家更多既經驗同閱歷，但依家既你只要遵從自己既內心作出決定，你先會無悔、你先會甘心去接受呢個決定帶來既結果。你冇得後悔係因為當時既你中意左就係中意左，為左一個人付出左就係付出左，我地冇得否認呢個事實，只要你當時係真心既話，日後點睇返自己都唔應該用後悔呢兩個字去形容，因為當時既你根本唔知未來係點，咁又點樣去比較同衡量呢）

（喂我發現自己都少癲嫁喎，竟然坐緊過山車嘅時候諗通咗⋯⋯）

（笑死）





（咁要唔要珍惜下眼前人）

（講到咁，唔要唔得啦？）

（如果你今日、依家肯黎，我就⋯⋯送你一個女朋友啦）

洛妍舉起左手機，打開左通訊錄內既常用聯絡人⋯⋯

「嘟嘟——嘟！」

（？）

（咩事？）





「對方拒絕來電」

（下？）

（徐亦言你好野，cut我？）

（我唔會再打第二次！）

如是者洛妍嬲爆爆咁去玩其他機動遊戲。

（唔係喎，唔對路！佢未試過唔聽我電話，就算冇聽都會打返比我）

（唔通係⋯⋯？）

（佢同曉瑩一齊緊？）

（試下唔好亂諗嘢先？）

（有啲難，因為我已經成個腦諗住佢）

（哼！佢損失慘重啦今鋪！）

⋯⋯⋯⋯
夜晚7點左右

徐亦言打返電話比洛妍。

洛妍既第一句有啲唔客氣：「唔係cut我嫁咩？」

「嘩冤枉丫包大人！我屋企人幫我cut嫁，我入左房訓⋯⋯」

「哦⋯⋯」
（算啦，我信你啦）

「你訓到依家？」

「係丫！你真係入左園？」

「係丫，哈哈我玩晒所有野嫁啦單拖」

「你好癲丫師兄」

「咁你依家仲黎唔黎」

「唔啦，咁夜⋯⋯」

「咁好啦。」

（仲想話如果你黎，我會做你⋯⋯）

（但你唔黎都好既，起碼，我今日叫幫自己同唯楓既感情係年卡完結既呢一日畫上左一個完美句號）

（就好似你話你想處理左你同曉瑩既關係先約我咁）

（咁當我再黎整一張新既年卡就應該代表一段新感情既開始）

洛妍同亦言隔住個電話傾計，傾到煙花完結⋯⋯

（咁算唔算都叫一齊欣賞左煙花？）

（唔知幾時真係可以「一齊睇」？）

（唔知幾時先係right timing ?）

（續）