鏡像密語: 第二十章、與自己的對賭
與亦言通完電話既翌日
洛妍「如常」返工、「如常」唔洗期待某人message 、「如常」唔洗打電話叫人起身、「如常」唔洗等人一齊行返公司，真係有夠「正常」。
但正當洛妍打算過馬路之際，佢突然餘眼望到個個黑白格仔既斜咩袋、啡紅色髮色既身影⋯⋯
「唉⋯⋯又會咁啱既，真係唔好彩⋯⋯」洛妍今日反而冇平日見到亦言既個種開心
（因為我想用盡力避開你嘛）
（只要我避開你，事情先可以回歸原點）
（依家大家都知道左對方既心意，但⋯⋯）
「喂喂，睇車丫！」亦言突然叫住左心不在焉過馬路既洛妍。
「⋯⋯冇事既」洛妍心事重重個死樣咁答。
「如果我冇叫住你，你會點？」
「咁你想我點報答你？」
「咁又唔洗⋯⋯」
（車⋯⋯）
（比隻好牌你都唔識上）
（蠢到死！）
不知不覺亦言同洛妍企埋左一齊等lift搭lift，洛妍望住亦言、望對亦言對眼⋯⋯
（望多一眼就放低啦）
（點解？）
（因為人地唔揀你囉）
就係呢個時候亦言都望住左洛妍，微微一笑。
（點解佢可以當咩事都冇發生過咁既？）
（點解佢好似唔記得左同我講過對係我認真？）
（點解佢依家見到我仲笑得出？）
（原來⋯⋯小丑竟是我自己）
（由頭到尾都係得我難過、得我患得患失）
（佢依家笑我出姐係⋯⋯）
（我成功比人拋底左啦⋯⋯）
（好野！事情終於回歸原點）
（但點解我依家個心，好似穿左窿咁既？咁空虛咁空洞咁既？）
（你好放低啦喎！）
⋯⋯⋯⋯
返到公司既洛妍趁空檔既時間拉住左行過既煇爺。
「煇爺，今日同我食飯！我有心事同你傾！」
「嘩喂，好！」煇爺好爽快咁答應左。
直到放飯既時候，成班人都行同一條路⋯⋯洛妍故意為煇爺遮太陽，因為佢知身後既亦言一定會睇到呢一幕。
（做咩姐你？又想人呷醋？）
（一半一半啦⋯⋯）
（唔知佢仲在唔在意我⋯⋯）
（但人地呷又點唔呷又點？就算呷都唔揀你丫！）
（有道理！）
（呷左你要開心定唔開心好呢？）
（開心佢仲在意我，唔開心佢仲係咁既態度）
（唔好再去試探佢啦，因為受傷個個永遠得你嫁咋梁洛妍）
（咁我應該⋯⋯？）
「妍姐，叫左食咩先啦⋯⋯」
原來洛妍同煇爺已經不知不覺行到去餐廳坐低左。
「無所謂啦⋯⋯就A餐啦。」
「咦⋯⋯丫言同迪仔都係到喎！」煇爺指向洛妍既背後。
（唔係掛⋯⋯）
（好機會丫飛雲⋯⋯）
（咩好機會？）
（快啲同煇爺傾得開心啲啦！大笑啦！）
（我點解要咁做呢？）
（報仇啦、反擊啦！天蠍座）
（佢令你咁唔開心⋯⋯你唔係仲顧慮佢感受丫嘛？）
（但佢會唔會呷醋呷到死？佢真係會好呷好嬲嫁⋯⋯）
（我叫你反擊丫！）
洛妍遲疑左半秒之後開口：「煇爺丫！點樣可以快速放低一個人？」
「搵過另一個同埋交比時間！」
「有道理！咁我應該點做好？」
「搵過另一個！」
「好！我聽你話！」
（既然我揀唔到，我比你幫我揀）
（你好彩，我真係識左幾個男仔！）
（不如試下沉下其他人）
（可能會忘記到徐亦言呢）
（得咩你？）
（試下？）
「煇爺最近係學校識到一個男仔，佢係我既主席黎既⋯⋯最近同佢即興去練舞食飯，覺得佢個人幾好！」
「嘩！咁有效率，過搵另一個真係即刻有另一個，哈哈！」煇爺笑左出聲。
洛妍都跟住「大笑」！
（最好成間餐廳都聽到我有幾「開心」！）
「不過主席對我冇興趣呢⋯⋯」
「點解咁講？」
「因為我同佢得公事上既交流！你估你有冇方法令佢快速沉我？」
「嗱，你有冇同佢既共好興趣？」
「有，咪跳舞囉⋯⋯」
「咁你可以⋯⋯」煇爺繼續比建議，但洛妍根本冇再留心聽落去。
（「快速」沉我？）
（愈快愈好？）
（盲既都知你想點啦！）
（唔知煇爺明唔明我？）
（梁洛妍，其實你有時幾傻）
⋯⋯⋯⋯
下晝三點
洛妍拎住個水樽係茶水間斟水，又咁啱偶遇煇爺去locker拎野。
「喂！洛妍！重要情報！」煇爺揮手叫洛妍行近自己。
「咩事咁呢？煇爺」洛妍好奇小寶在線中。
「喂！丫言可能會同佢女朋友分手！」
「下！」
「我講堅既！」
（我一定係發緊夢！清醒下梁洛妍！）
「點會？你係咪傻？」
「我覺得佢最近搖動左！」
「佢點會係講分手既人？諗都唔好諗啦！」
（聽講佢女朋友對佢唔好，但結果你睇吓，咪仲好好地）
「夠唔夠膽同我賭？」
「賭咩？」
「五舊水？」
「黎咪黎！」
「就估十月前分到手既話，我嬴！」煇爺拍左一下心口。
「好！」
「不過⋯⋯有一個前提！係我地兩個都唔準同徐亦言講一啲會影響到佢決定既說話！」洛妍突然提出一個請求。
「一言為定！」
「咁到底我係同你對賭定係同自己對賭緊？」洛妍係到自言自語。
「咩話？你講咩話？」
「冇野丫！」
（好彩煇爺你聽唔到⋯⋯）
（就算你分唔到手，我都有500蚊落袋，唔洗咁失落哈哈！）
（咁就交比個天決定啦！）
（如果你堅定咁行向我，咁我就擁抱呢個鼓起左咁大勇氣既你）
（可唔可以爭氣啲比我睇丫徐亦言？）
（續）