鏡像密語: 第十一章、辦公室內的粉紅泡泡

七點三十分

（咦？佢到依家都未覆我whatsapp既？唔通佢都係未起身？）

（唔會既，佢平時都好準時起身覆我）

（點呢？好唔好打電話問佢起身未？驚佢遲到喎）

（人地遲關你咩事喎⋯⋯）





（咁你依家打得比佢未？）

（我驚朝早同人冇話題喎）

（人地會唔會好似我咁有起床氣？）

（點會？我都未見過佢發老皮既）

（點姐？就黎搭九啦喎）





（咁打咪打囉，留意返係你叫打我先打嫁咋，根本唔係我自己想打）

「喂？」

「咦？你未試過打比我嫁喎⋯⋯仲要係朝早！」

「係丫，見你耐冇覆丫嘛，以為你未起身」

「我頭先遲左起身，做咩啦？」





「冇丫，我擔心啲同事冇勤工獎拎丫嘛，你知我人好」洛妍唔知自己有冇心虛。

「哈哈⋯⋯哦⋯⋯」徐亦言唔知係咪笑到見牙唔見眼。

（咪繼續兜囉梁洛妍，不過見佢笑得幾開心，做下小丑又有咩所謂啊）

「喂你到邊？」洛妍問。

「商場。」

「我都係喎。」

「咁不如⋯⋯洗唔洗等埋你？」

「下，呢啲野唔洗問嫁啦吓話？」




（呢碌木今日咁叻豬既⋯⋯）

兩個爆笑左幾秒。

「樓下等啦⋯⋯」

「嗯！」

就係咁，佢地一齊行返公司，途中都遇到幾個同事，佢地都向洛妍亦言投以一種奇異既目光，但洛妍亦言都冇理會佢地既目光，繼續專心傾計，直到行到返公司，兩人如常工作。

洛妍既座位附近就係茶水間入口，但背對茶水間入口，所以任何同事行去茶水間既路途中一定會見到洛妍，洛妍如是。

最近洛妍成日做做下野都會分神，因為佢成日比行去茶水間既身影吸引目光，每當佢抬高頭望下行過既同事個樣既時候，好快又會耷低頭。

（做咩丫？想望咩？）





（係咪見唔到自己想見個個人，所以耷得咁快？）

（邊係？我係茶水間登記大使黎嫁嘛，望下邊個好正常）

（唔洗唔認，你睇你每次都咁失落）

（我失望佢地去茶水間都唔主動過黎登記個名咋，要我逐個認樣）

就係呢個時候，一個啡紅髮同時身穿黑色tee、卡其色短褲既黑影閃過，洛妍即刻抬起頭望，終於係個個令佢安心既五官⋯⋯

但洛妍知自己唔可以望得太明顯，所以好快耷低頭繼續用電腦。同時，呢個啡紅色頭髮既男仔就係洛妍耷低頭下一秒視線掃向去洛妍，好快望左兩秒，又裝作若無其事走開。

就係咁，兩人既四目並無交投。然而，兩人都唔知各自已經係腦海中回放緊頭先望到對方既畫面。





「洛妍姐姐！」

「閔哥？咩事？」

閔哥係亦言既上司，平時好錫亦言，自從公司一啲座位調動之後，洛妍就坐閔哥附近既位置，自此洛妍開始同閔哥日漸熟絡，洛妍慢慢都認為閔哥係個好上司，因為佢會好照顧下屬（特別係某人）洛妍覺得簡直應該叫佢做閔爸，因為佢對下屬就好似親生仔女咁，佢從來都冇鬧過下屬，又會唔比女同事做粗重野，份人挽得講得笑，但工作個時又好認真、好有責任心（同某人一樣）。雖然閔哥成日調侃下洛妍亦言兩個人，但佢好錫佢地兩個。

「我有冇清熱酷飲丫？」

洛妍呆左一陣，笑住問：「點⋯⋯點解閔哥你會知既？」

（我個心臟好似停止左跳動咁）

「唔知丫，我見到囉！」

「你見到啲咩丫閔哥⋯⋯？」





「冇丫，除左見到清熱酷，仲見到過雪糕囉⋯⋯」

「咩雪糕丫？我都唔知你講咩⋯⋯」

（我開始心虛）

（點解佢會知既？）

「哦，咪就係前幾日，有啲同事係茶水間食雪糕囉，咪就係你一啖我一啖咁食囉！不過我睇唔到樣嫁！」

洛妍已經忍不住嘴角，係個位到爆笑左出黎，閔哥跟住一齊笑。（閔哥係姨母笑！）

（死啦！閔哥睇到添⋯⋯）

（閔哥好似幾中意我地？）

（等等先，人地有女朋友嫁啦，閔哥係公司講笑咋，咪當真）

（如果係真既話⋯⋯）

（冇如果！）

洛妍笑容僵硬左：「冇丫！冇啲咁既事！你睇錯啦閔哥」下一秒洛妍轉身面對返部電腦，唔係佢幾想做野，而係佢怕比閔哥見到自己失落心煩個樣，怕佢會突然問起自己係咪唔開心，事關佢會唔知點解釋。

（點解你會有呢種失落感？）

（我唔知丫）

（等等先，我冇喎！零失落！）

（我⋯⋯我只係覺得好笑姐⋯⋯未試過係公司被人炒CP，咁失落就係因為我到依家都未搵到男朋友囉！）

叮———洛妍手機既whatsapp：

「喂，一陣食完飯去內閣傾下計啦！」

過左一陣洛妍既回覆：

「好吧」

內閣係公司一個角落頭，因為位置偏僻啲，比較少同事行過，所以我地統稱個個角落叫內角內角——「內閣」。

「點丫？係咪想學breaking？」

「係丫！係丫！係咪教我？」
（我自學左好耐都做唔到freeze)

「嗱，我示範一次比你睇」亦言除底左副眼鏡，雙手禁地示範左一次標準既baby freeze 比洛妍睇。

「嘩！好勁丫！」
（點解呢個男仔可以咁型？）

（人又靚仔又同我咁啱傾又同我咁夾？仲要同我喜好一樣，中意跳舞）

（收埋你個花痴樣啦梁洛妍！）

洛妍回過神來，打算照做亦言既動作，正當佢想雙手禁地之際，亦言叫停左佢：「喂痴線嫁？唔準你整污糟套ssr同我個夢幻髮型！」

「你知我唔怕污糟⋯⋯」

「唔得丫！」

洛妍最終妥協，佢地兩個又由跳舞傾到去RAP再講到去改詞心得，傾到lunchtime 完。兩個人都意猶未盡咁，所以約好每次食完飯都過去內閣玩。

佢地有時又會約埋入去茶水間，百忙之中抽空黎閒聊兩三句，互相分享返煇爺同閔哥佢地點調侃佢地，每次聽完佢地個都會會心微笑。（會心大笑其實係）

「喂你知唔知閔哥今日全日對住我姨母笑，好搞笑佢個樣⋯⋯」

「哈哈⋯⋯」

「佢仲問我係咪又想（一齊）食雪糕？我同佢又爆笑左！」

「咁你點答佢？」

「我咪學你囉⋯⋯我都唔知你講咩～我問佢做咩咁關心我地，佢話佢覺得洛妍同亦言檔節目好吸引好好睇，佢話身為家庭觀眾嘅佢，非常期待日日有得睇！」

「笑死！咩家庭觀眾！呢個比喻真係⋯⋯哈哈」

如是者，佢地兩個人一段時間都係咁日對夜傾，逐漸依賴左對方。

而公司既同事都會調侃下佢地兩個，特別係閔哥，呢段時間係洛妍亦言最開心既時光。

（嗯，有你的日子，空氣也開始變甜。）


（續）