鏡像密語: 第四章、好奇心爆發？
繼續扮冇事返工係洛妍既強項，有啲人耐左唔聯絡，習慣咪成自然囉。加上以前佢地兩個成日都嘈交嫁啦，話斷聯就斷聯簡直piece of cake，只係好似身邊少左個人，空左個位咁姐，但洛妍反而有少少鬆左一口氣既感覺，因為唯楓大部分時候都痴身，所以洛妍有時嘈完反而享受自由既感覺，唔洗比人管著咩衫，唔洗比人管同邊個同事傾計會唔會令佢呷醋，自由自在。
如是者，洛妍繼續日復日咁專心工作。直至係新址既第二星期，終於都有新同事主動同洛妍傾計。
「喂，你好丫，你就係傳說中既新同事呢？我叫吖煇」
「你好丫，我係洛妍。」
洛妍心諗：嘩，終於有人主動開口同我講野啦，感動到⋯⋯之前一直見你地班後生仔圍威喂，我都想埋堆丫⋯⋯
企係丫煇隔離仲有一個同事，係帶眼鏡既kai，一問之下原來kai係洛妍既師弟，佢地係同一間中學讀過書，但二人都素未謀面，不過洛妍已經覺得呢個身份拉近左自己同佢地既距離。
傾多兩傾發覺大家都係幾夾嘴型。突然之間，洛妍餘眼望到又有個黑影行過，唔係，係跑過先啱！
洛妍沉默左半秒，心諗：佢咪就係我返新址見到個個男仔？做咩跑過？佢唔係同煇爺、kai 好friend 嫁咩，做咩唔過嚟打聲招呼？唔通佢⋯⋯唔想識我？
洛妍打破沉默：「個個男仔⋯⋯？」
煇爺：「哦，佢叫吖言，佢好怕醜嫁，我估佢唔敢走過嚟同我地傾計，唔洗放係心到。」
「係咩？唔似喎，佢好似⋯⋯好cool咁。」正當洛妍有啲失落之際，佢望一望左手既手錶，發現夠鐘放工。
「同你地傾計好開心丫，聽日再傾過喔！我依家放工先啦⋯⋯你地OT加油！」洛妍有少少不捨咁同佢地兩個揮手，轉頭就拎手袋走人。
「啊⋯⋯原來佢叫吖言。喂，我個腦點解會諗起佢既？」洛妍不思不得其解：「算啦，一定係因為我都好好奇佢點解唔好奇我，而唔係我單方面好奇佢⋯⋯」（咪繼續幫自己搵藉口囉梁洛妍）
不過好快洛妍就冇左件事，因為洛妍知道識人講緣份，即係自己想識人姐，人地未必想識自己嫁嘛。
翌日洛妍如常返工，直到煇爺主動行近洛妍個工作檯附近：「喂，你日日同sing食lunch悶唔悶，厭唔厭嫁？」
「梗係厭啦，但你地又唔約我⋯⋯」洛妍差啲落淚（講笑）
「喂，掂，約你聽日同我地食，好唔好？」
「梗係好啦，不過有邊個，你知我未識晒你地班人」
「你想有邊個我就叫邊個！」煇爺拍晒心口咁款。
「我無所謂，你同kai一定要係到喔！」
「就咁話，聽日，不見不散！」
「嘩你講到咁搞笑，掂晒」洛妍又笑到見牙唔見眼咁，因為開心終於可以埋堆了！
「終於可以見到你個真樣啦！我準備好嫁啦」煇爺笑住講。
「哈哈⋯⋯冇錯，期待吧？等等，咁個個男仔呢？叫埋佢啦」洛妍雖然唔想比人見到個真樣，但又好想知後生仔們會唔會覺得自己好睇，所以應約。
「你話吖言？我幫你問下佢囉⋯⋯」
「好丫好丫⋯⋯不過佢唔想見到我既話就算啦，我唔想好似逼佢咁。」洛妍瞬間又笠水。（唉⋯係咁冇底氣嫁啦，鬼叫人地都一副唔想理自己既樣咁咩）
終於到當日放飯既時候，洛妍拎完銀包再拎轉頭望多一眼，發覺個個男仔都係冇黎到，失落左半秒，但冇再提起，因為洛妍清楚行動證明一切，心諗：人地唔黎姐係唔想黎啦，再問自己都冇癮⋯⋯
不過洛妍冇放係心到，繼續同煇爺佢地食飯傾計。就係咁洛妍逐漸埋堆，同佢地變得熟絡，開始隔三日唔埋兩日都會一齊約食lunch。
「咦，你同佢地相處得不錯，依家同佢地挽啦？」sing哥率先開口問洛妍。
「嗯，叫熟左又有野傾下咁啦！幾開心丫，終於唔係日日同你食lunch 。不過⋯⋯」洛妍又沉默左。
「不過？」
「只係仲有一個同事未同我講過野」洛妍不禁失落。
「下，你黎左咁耐都未講？邊個丫？」
「唔話你知，不過唯一可以透露既係——我覺得佢幾靚仔。喂唔嗲住，做野先！」洛妍努力收返個花痴樣，換返個sad樣。
不過係工作期間，洛妍有一秒分心：唔知佢份人係點嫁呢？（又唔係唔知我中意好似義勇呢啲咁cool既男人，好奇下，人之常情姐）
「喂，BB，你同班後生仔識左好耐嫁？」洛妍放左工之後忍唔住問恩姐。
「我本身係你未黎個時已經識佢地啦，我以前都係新址呢邊返工既，後尾我調返去舊址姐。」
「哦，係呢，佢地成班係咪都單身嫁？」洛妍好奇心無處安放中⋯⋯
「啊，有兩個唔係單身嫁，一個係洋洋，另一個係吖言囉。」恩姐離遠指左一指比洛妍睇。
「哦⋯⋯」洛妍又失落mode左。
「做咩咁問既？」恩姐覺得好奇。
「冇丫，見佢地食飯都冇點提起有女朋友既？」洛妍心虛到呢⋯⋯（咁都比你兜到？）
恩姐笑左一笑：「吖言好怕醜嫁，從來唔會同人講起自己既野。」
可惜恩姐唔知既係——我同吖言仲係零交集、零交流、零溝通⋯⋯
（返返正題先）不過洛妍心諗：都正常既，好男仔係搶手啲嫁啦。誒？等等先，我又唔係想搵人拍拖，失落啲咩？我係黎努力工作賺錢既，唔係黎搞對象喎，只係同事姐咁好奇做咩喎？
（又會咁啱比你聽到係吖言有女朋友先失落既，你當洋洋死嫁？）
洛妍下一秒又說服返自己：「唔係，咁問清楚都好既，以免第時有傾到計既話令人地女朋友誤會就唔好啦！洋洋就另計啦，佢有人要都偷笑啦⋯⋯」
（洛妍吖洛妍，你有冇咁想同人傾計吖？）
「傻啦，咁做同事日對夜對都唔傾下笑下咁，邊有癮？面阻阻咁都好奇怪嫁嘛？有冇道理先？」
（係啦係啦，藉口達人同口是心非達人都係你啦，好彩恩姐聽唔到我既內心戲，哈哈）
（續）