鏡像密語: 第一章、新的一天，新的工作
「今日早啲訓，聽日返新工，唔知聽日係點呢…」梁洛妍較好鬧鐘但一直都訓唔到。
「又係衰緊張，次次都係咁，一有新環境呢就緊張大師上身，緊張到失眠。」
「咁我啱啱大學畢業，話晒係人生第一份full-time工作嘛，緊張下適唔適應新環境、緊張下識唔識到新同事，是常識吧⋯⋯」洛妍終於係自言自語中淺淺進睡。
翌日九點鐘，梁洛妍準時到左新公司，主管東尼就同洛妍介紹黎緊佢會跟既上司——吖Sing。
「洛妍，你以後就係跟吖Sing，你既title係佢助手⋯⋯」東尼叫左吖Sing過黎指一指洛妍。
「Sing哥，你好，我會努力跟你學野，希望幫到你啦」洛妍細細聲講完，Sing點頭微笑。
Sing同東尼講左一堆洛妍完全聽唔明既職務，呢一刻洛妍想quit了。
「講笑，窮吖！點quit? 」洛妍唯有鼓勵自己⋯⋯「冇事既，萬事起頭難，我一定做到，easy啦文員仔姐，做多兩三日就記得晒嫁啦」
「嗱，你excel用vlookup將佢地對照返，再check多次就ok嫁啦⋯⋯」sing耐心指導緊一張白紙
「嗯，我試試，係咪咁做？最後save個file嘛。」洛妍接手試下禁file
「冇錯，你學野真係好快，講一次就記得」sing對洛妍讚不絕口。
「嘻嘻⋯我後生嘛？」洛妍用佻皮既口吻，逗得sing笑到見牙唔見眼。
叮———洛妍收到一條來自佢男朋友林唯楓既訊息：
「我胃痛。」
洛妍因為做緊野，所以冇即時覆。但過左一陣，又收到第二條：
「唉，你自從返左呢份工之後個人好似失聯咁，咁我要你黎做咩？」
洛妍同唯楓一齊左斷斷續續8年，大家曾經都互相遷就對方遷就得好辛苦，不過大家都係因為呢個拍拖時長而苦苦堅持。
「sorry，我做緊野嘛，你點丫？我唔係你身邊你可唔可以學下好好食飯，準時食飯？」洛妍過左一陣再覆。
「我冇胃口」
睇到呢到，洛妍心累了，因為以前返part-time既時候都係一放工就要去照顧唯楓，特別係返左呢份工之後覺得更加攰，完全冇時間比自己休息。因為唯楓自小胃唔好，成日都會同洛妍講自己邊到邊到唔舒服，洛妍由一開始既擔心同關心都日漸消磨，變得厭煩。
因為唯楓中意比人照顧，以前唯楓好努力照顧4年前任性既洛妍，洛妍終於有日知道自己任性既錯之後想彌補唯楓，所以好努力做唯楓想要既人，做唯楓心目中想佢做既角色，例如為佢做家務、管接送等等。當然唯楓對洛妍都係真心，曾經佢地兩個都以為大家會好地地咁過，但可惜由洛妍返全職開始，兩人聚少離多，漸行漸遠。洛妍都唔想再覆啲咩，決定繼續專心工作。
如是者，sing教左洛妍兩三日，洛妍好快就上左手，比其他同事稱讚，洛妍都估唔到係到返工幾開心，因為啲同事對佢幾nice，雖然洛妍打算只係做兩三個月就算，因為洛妍預計左九月佢會有升學，所以佢不斷提醒自己，唔係係到投放太多感情，萬一有一日唔捨得走點算⋯⋯
「應該唔會既，唯楓一直都想我辭職，而我點會甘心比自己做死一世文員仔，不過我又好中意做埋晒呢啲又悶又重重複複唔洗對客既野。唉，都係到時先算啦」洛妍獨自苦惱中。
短短幾個星期sing同洛妍就熟左，可惜全公司都冇邊幾個同事知道洛妍個真樣，因為洛妍冇一刻唔帶口罩，就算飲水食飯都係公司避開同事或者拎轉面。日子耐左，愈黎愈多同事好奇洛妍個真樣。
「好想睇下你咩樣⋯⋯」吖sing終於忍唔到問洛妍。
「真係咁想知？」
「係丫，你太神秘，好有魅力」
「我覺得自己唔靚，唔想大家覺得我唔帶口罩落差好大，又唔想比人指指點點自己個樣咪一直帶口罩⋯⋯唉我都知避唔到好耐嫁啦，算了算了，比你睇一眼啦，咁我以後都可以同你食飯」洛妍講完輕輕拉開個口罩帶。
「唔係丫，幾好睇喎⋯⋯」吖sing笑了。
「多謝，認真比面，不過我包包面都係帶口罩靚啲，哈哈」洛妍面紅了幾分，講講下又帶返好口罩。
逐漸其他同事都開始開口問洛妍可唔可以除個口罩比佢地睇下，除左小部分既女工，好多人都係被拒而回。
其中一個有幸可以同洛妍熟左既女工吖恩都會為洛妍打圓場：「洛妍太靚啦，費時佢比你地睇蝕，唔好逼下佢啦哈哈」
「多謝恩姐，呼⋯⋯你知我對我個樣冇自信。」洛妍嘆氣
「你都傻既，你不知幾好睇，比啲自信啦」
「嗯⋯我試下啦⋯⋯」洛妍講完都係帶返口罩，哈哈
短短幾星期洛妍同其他同事開始都相處融洽，特別係sing同洛妍熟左好多，食飯不時會教洛妍股票，洛妍又會分享下以前讀書既事。記得有次洛妍終於有勇氣睇返就畢業前一個學期既成績表，因為有一科成績未如洛妍理想，洛妍係公司諗起呢件事就喊左出黎，因為大家都知洛妍一直係一個好勤力既女仔。
Sing一時喊知點安慰佢好，就輕輕摸左洛妍個頭一下，但洛妍已經好感動，不過洛妍知自己對sing係好似對哥哥咁，始終sing大過洛妍好多⋯⋯
但因為呢一下既舉動令公司好多同事都傳洛妍同sing有野，但只有洛妍冇呢個覺悟。
「係喎，我地下個月公司搬鋪，記得返新地址⋯⋯」sing突然同洛妍提起。
「哦，小事啦，轉個新地址姐」
「但你過去係做新同事喎」
「下，咁大鑊，你知我社恐，如果唔係你一開始撩我講野先，我打算摺到2046嫁」洛妍嚇到面青
「個到本來已經有一批你未見過既舊同事既，社恐都唔係最怕既野，我話比你聽最怕係小圈子」
「我最怕怕了，可唔可以唔走⋯⋯」
「唔得丫，公司要求」sing搖搖頭。
「唉，我對慣左你地嫁嘛，突然要再認識新人，萬一唔啱嘴型，發生口角點算」
「所以叫你學我做人要圓滑啲囉」
「係係係，跟你學野」洛妍努力掩飾自己既不安同擔心，唯有暗求自己到新址工作可以順利。
（續）