【愛情】如地下情一樣嘅癮，係我對你嘅定義: 116
但係今次嘅情況同平時唔一樣，如果傳聞係真嘅話，係關乎到家庭嘅問題⋯爸爸會點諗江清懿？江阿姨會點樣諗鍾樂時？
所以，當係為咗維護家庭嘅良好關係，鍾安而決定企喺中間先一步問清楚來龍去脈，如果係一個誤會就冇問題啦⋯
遲疑咗大半日，兩兄妹你眼望我眼，鍾安而問唔出口，果然都係有心理關口要過
「到底做咩⋯？」鍾樂時一頭霧水咁望住鍾安而，鍾安而嘅欲言又止令佢全個人都唔自在
「唉⋯我唔轉彎抹角啦⋯」鍾安而重重咁嘆一口氣，「你嗰級係唔係有關於你嘅傳聞？」
「咩意思⋯？」鍾樂時一愣，然後露出天真嘅笑容試圖蒙混過關
「有人同我講，你嗰級有關於你嘅傳聞⋯」鍾安而望向房門口，確定房門閂咗之後先再講出後半句：「同江清懿⋯」
鍾樂時瞬間瞳孔地震，視線飄忽起嚟，鍾安而默默咁望住佢，將佢嘅微表情、動作都仔細咁睇喺眼中
「你答我係定唔係就得。」鍾安而平靜咁講道
眼見鍾安而咁平靜，鍾樂時反而更加慌張，連視線都唔敢同鍾安而對上，耷低頭好似做錯啲咩事一樣
「佢知唔知？」鍾安而從鍾樂時嘅反應中知道答案
「嗯⋯」鍾樂時幾乎係用喉嚨發音嚟回答
「唉⋯」鍾安而聽完就更苦惱，有啲後悔過嚟問清楚
「哥哥對唔住⋯」鍾樂時垂低頭，扁起嘴低聲道
「做咩要同我道歉？」鍾安而輕皺起眉頭，「我只係過嚟關心下，冇咩其他意思。」
鍾安而感覺自己嘅大腦都有啲混亂，一時間反應唔嚟，佢好似都要啲時間消化一下
房間內一片尷尬嘅寂靜，鍾樂時嘅手一直捏住自己嘅衫角，因為覺得自己做錯事所以都唔敢喺鍾安而開口前講嘢
「鍾安而！」江清懿喺走廊大嗌咗一聲，瞬間將尷尬嘅氣氛劃破
「做咩？」鍾安而起身行出鍾樂時嘅睡房，順手閂上房門
鍾樂時一人坐喺房中，一直耷低頭，佢想知道鍾安而嘅想法
「哥哥會覺得我唔啱⋯？」
「哥哥點諗⋯？」
「真係冇嬲⋯？」
鍾樂時嘅大腦比呢啲想法填滿，愈諗愈慌張，愈諗愈覺得自己做錯事
但佢唔知道佢可以點做，明明中意一個人係冇錯⋯
⋯
黎昕淇孭起書包打開門，見到陸修然企咗喺防煙門嘅位置等佢，故意避開咗佢正門嘅位置
「咔—」黎昕淇頓時閂埋屋企門，帶住小跳步行到陸修然面前，「你今日喺呢度等我嘅？」
「想快啲見到你。」陸修然轉身就行，想掩飾佢講呢句說話時嘅害羞，「行啦。」
「哦。」黎昕淇追上陸修然，伸手拉住陸修然嘅書包
陸修然入𨋢後企喺角落嘅位置，黎昕淇企喺佢面前定睛望住佢，喺對上眼嘅時候伸手環抱住佢嘅腰，親密咁將重心都壓到陸修然身上
「好似好耐都冇攬過你⋯」黎昕淇嘅唇貼喺陸修然嘅頸上，呼出嚟嘅氣帶嚟少許痕癢感
「琴日先攬完，琴日⋯唔係攬咗好耐⋯？」陸修然無奈一笑，望向黎昕淇嘅眼神多咗一入寵溺嘅意思
「有咩？」黎昕淇對於琴日嘅「好耐」似乎冇咩記憶，「都係攬咗一陣。」
「黎昕好貪心呀～」陸修然笑道，雙手抱住黎昕淇
隔住裇衫都可以感受到身上嘅體溫，陸修然點解長期都可以處於溫暖嘅狀態？
黎昕淇嘅手偷偷伸入陸修然嘅衫袖內，手心貼喺佢嘅手臂上，陸修然一臉不解咁望住黎昕淇
「中意你成日都暖笠笠⋯」黎昕淇低頭將額靠喺陸修然嘅膊頭，唔想比佢見到佢臉上嘅表情
「講頭三個字就夠，後面嘅係多餘。」陸修然精準咁捕捉到句子中嘅重點
黎昕淇冇回答，默默咁選擇咗沉默
佢發現其實佢從來冇同陸修然表達過佢嘅中意，陸修然亦如是
但諗深一層又覺得佢同陸修然之間唔需要講「中意」，唔熟悉嘅人先要為一段關係留低一個肯定嘅答案
「我地好熟，唔需要講明都唔緊要，我地嘅想法會相通⋯」黎昕淇嘅想法向來一樣
「你從來都唔同我講你中意我。」陸修然嘅語氣看似平靜，實際上有試探嘅意思，雙眼都一直留意住黎昕淇嘅表情
「唔⋯」黎昕淇想避開呢個話題，故意用類似撒嬌嘅語氣，「都一樣啦，你心入面知咪得～」
「嗯，都係。」陸修然淡然嘅回答，黎昕淇都聽出內裏嘅小情緒
以前覺得佢嘅會長就係一個情緒穩定嘅人，無論發生咩事都可以保持冷靜，平時嘅佢睇起嚟都好似一個冇咩情緒波動嘅人，但喜怒不形於色嘅人先可怕，唔係咩⋯？
但有咗呢層關係之後先發現，其實陸修然都會嬲都會唔開心，都會有撒嬌嘅時候，佢嘅陸修然唔係真係冇情緒波動嘅人，只係唔對外人⋯
陸修然嘅心情顯然地一直都唔太好，搞到莫淮禮一直偷偷地睇佢面色眼神，講嘢前都要諗清諗楚
「會長心情唔好呀？邊個激嬲你？」莫淮禮坐低喺陸修然面前嘅時候小心咁問一句
「冇心情唔好。」陸修然冇經過思考一樣嘅迅速回答，令莫淮禮更加唔知要講咩好
「嗯，但睇起嚟完全唔似冇。」莫淮禮認真咁點一下頭後道，「你嘅表情。」
「小事嚟。」陸修然搖搖頭，佢嘅心情未到真係唔好嘅地步，只係覺得鬱悶
「好少見有嘢可以令你唔高興，同邊個有關？」莫淮禮好似隨口問一樣
陸修然都係捉到重點：「邊個」，然後隨即一笑
IG Link: https://www.instagram.com/nd_cotttoncandy/?hl=zh-tw