【愛情】如地下情一樣嘅癮，係我對你嘅定義: 106
諗到呢個問題，黎昕淇自己都忍唔住懷疑起嚟，再多加思考就會覺得自己會唔會係做錯咗啲咩決定⋯
「唔⋯」黎昕淇盯住幕門呈半放空嘅狀態
手一直將拎喺手中嘅手機捏嚟捏去，就算放空落嚟，心入面都隱隱約約有種不知所措嘅感覺，目光一直忍唔住咁朝旁邊嘅門望去
手機一震，黎昕淇眨一下眼回過神，拎起手機見到一個問號嘅新訊息
「你攰唔攰」
一個冇前冇後嘅message令人有啲摸不著頭腦，陸修然微微側住頭望住只有一半嘅提問，大腦轉動起嚟稍作猜測，雖然呢個時候先問佢眼唔眼瞓好似有啲⋯太遲⋯？
陸修然放棄猜測直接打字問：「邊種攰」
等咗一陣卻冇等嚟黎昕淇嘅回覆，陸修然亦冇追問落去，雖然心入面覺得呢個問題嚟得有啲突然而且令人一頭霧水⋯
中午嘅時候
「今日唔過去啦？」宋楚妍將甜筒嘅包裝紙撕開
「今日唔啦。」黎昕淇小心翼翼咁將甜筒上面嘅膠蓋掀起，「今日休息。」
「唔係最近都休息緊咩？你最近好似都冇去。」宋楚妍笑道，喺其中一邊咬咗一細啖
宋楚妍望咗黎昕淇一陣，但黎昕淇都冇比答覆佢，視線落喺遠方，直勾勾咁望住
宋楚妍轉頭，沿住可以吸引到黎昕淇定睛望住嘅方向望去，宋楚妍嘅目光都暫時停留
「呢個時間居然仲可以見到會長喺度呀⋯」宋楚妍看似自言自語一樣道，「睇咩睇得咁開心⋯？」
因為冇得到回應而收回視線嘅佢只係見到唔知幾時望咗去其他地方嘅黎昕淇
「你地又會咁啱今日都唔喺會室嘅～」宋楚妍笑道
「咁啱啫。」黎昕淇托住下巴反咗個白眼
自然又順手咁拎出手機，打開同陸修然嘅對話框，面不改容咁打字：「睇咩笑得咁開心？」
收到message嘅陸修然心入面嚇咗一跳，第一反應係擰轉頭望；喺佢回頭嘅同時，黎昕淇不以為然咁緩緩轉頭，稍微望咗一眼，淡然嘅眼神睇起嚟更似一種質問
「莫淮禮send嘅嘢」陸修然乖乖回答，再補一句：「唔係女仔」
一直冇咩表情嘅黎昕淇，見到澄清內容後嘴角不自覺咁微微上揚，但好快就抿住唇將上揚嘅嘴角壓落去
「我又冇問你係咪女仔」黎昕淇傲嬌嘅回覆
陸修然望一眼新嘅message，然後默默咁回頭望一眼
「會長望你。」宋楚妍輕踢咗黎昕淇一下
「係咩？」黎昕淇不以為然咁問咗一句，「食完啦？番上去？」
兩人起身要番課室，宋楚妍行喺前面，黎昕淇跟喺宋楚妍身後行，行咗兩步自然一個回頭，一眼就見到拎住紙包飲品嘅陸修然
「仲掛住睇手機⋯」黎昕淇輕笑一聲，不過說話冇講出嚟，轉身跟上宋楚妍行喺佢身旁
「仲諗緊你去咗邊～」宋楚妍轉頭一望，伸手親密咁挽住黎昕淇嘅手
「我可以去邊⋯都係喺你隔離⋯」黎昕淇朝宋楚妍投向無奈嘅目光
宋楚妍沉默不語，突然直勾勾咁凝視住黎昕淇，黎昕淇微微向後仰拉開少少距離
「你都係唔好拍拖啦～陪我單身啦～」宋楚妍眨一下眼，雙眼微彎笑道
「做咩咁突然⋯？」黎昕淇輕笑一聲
「忽然覺得都係冇人配得起你～」宋楚妍用臉頰蹭黎昕淇嘅膊頭，「所以你都係唔好拍拖啦～」
「但我⋯」勇氣喺心底聚集起嚟，黎昕淇忽然好想衝口而出表明一切
黎昕淇深深吸一口氣，如果呢一刻一鼓作氣咁坦白，宋楚妍會係咩反應⋯？
「唔⋯」黎昕淇猶疑不決，要坦白嘅說話到咗嘴邊，但偏偏卡住喺唇邊講唔出口，「但我應該⋯唔會一直單身⋯！」
「咩意思！？唔通你有中意嘅人啦？邊個呀邊個呀！」宋楚妍嘅一連三問將黎昕淇卡喺嘴邊嘅說話直接推番去喉嚨
「唔、唔係⋯」黎昕淇下意識反射一樣直接搖頭否認
否認嘅回答一出口，黎昕淇即刻就後悔，喺心入面重重咁嘆咗一口氣，如果聚起嘅勇氣冇消散，宜家就唔會覺得後悔自己冇講出口
「唉～仲以為你要話我知你真係中意會長添～」宋楚妍失望咁嘆氣
「可能我真係同會長拍拖呢⋯」黎昕淇勉強咁擠出笑容，試探般開口道
「哦～」宋楚妍挑起眉盯住黎昕淇，盯到黎昕淇都緊張到心跳加速
「應該可以⋯？」黎昕淇已經準備好接宋楚妍嘅說話，只差宋楚妍將說話講出嚟
「我先唔信～」宋楚妍笑嘻嘻嘅一句，黎昕淇嘅心情卻直達谷底，「如果你真係同會長拍拖，你會咁直接同我講？我先唔信你呀～」
「哈⋯你真係聰明過頭⋯」黎昕淇本來有啲期待嘅心直接連同心情一同跌到谷底，心入面直接反個白眼
黎昕淇同宋楚妍番課室嘅時候喺隔離班嘅窗前經過，黎昕淇嘅視線下意識朝課室內望去，自動尋找一個人嘅身影
眼睛嘅行動比腦袋更快，幾乎已經係日積月累之下嘅習慣，但要仔細回想由幾時開始養成嘅習慣，似乎唔係可以回想得起嘅事⋯
陸修然好似察覺到黎昕淇嘅視線一樣忽然抬頭朝走廊望，對上眼嘅瞬間大家仍舊默契咁將視線移開
「最近好容易會覺得好抱歉呀⋯」黎昕淇將頭微微耷低，心入面嘅罪疚感莫名其妙咁湧出嚟，「明明唔係啲咩錯事⋯」
⋯
「應該差唔多到啦。」陸修然瞄一眼手錶，估計黎昕淇差唔多要到達
果然，佢呢頭自言自語講完，轉個頭黎昕淇就推開玻璃門
「啱啱好。」陸修然企起身
「咩啱啱好？」黎昕淇直接行到陸修然嘅面前
「你啱啱好到，我嘅估計都啱啱好準確。」陸修然行到𨋢門前嘅位置等待
黎昕淇跟喺身後一步一步行到陸修然身旁，頭微微抬起凝視佢
IG Link: https://www.instagram.com/nd_cotttoncandy/?hl=zh-tw