【愛情】如地下情一樣嘅癮，係我對你嘅定義: 81.

黎昕淇嘅情緒緩和落嚟解釋，但陸修然卻不滿起嚟；黎昕淇見佢唔高興，內心就即刻就慌張起嚟，明明佢冇慌張嘅必要

兩人喺莫名凍結起嚟嘅氣氛下對恃，黎昕淇唔蠢，仔細一諗就發現自己比起以前更加在意陸修然嘅情緒反應，一個眼神一個皺眉都可以輕易咁牽動到佢

「想提你，我同你喺學校要保持距離，我地講好咗，所以冇辦法。」黎昕淇聳肩，佢呢句說話冇起到安慰效果

「我冇反口。」陸修然撇開臉將視線移開，佢冇討厭江清懿，但都冇中意佢幾好

「你做咩唔中意佢？佢人幾好㗎。」黎昕淇試探問道，目光一直落喺陸修然嘅臉上，觀察住佢嘅微表情，「雖然有時有啲無聊，但唔差。」





「我冇話我唔中意佢。」陸修然淡然講道，「不過都稱唔上中意，佢成日搭你膊頭又郁手郁腳會唔會太親近？」

「你都一樣咁對我，好意思話人？」黎昕淇將櫈拉到陸修然嘅面前坐低，掀起佢嘅衫袖望一眼確定冇瘀痕，然後又喺佢胸口上輕力打咗一拳

「我同你，同佢同你，關係上一樣？」陸修然提手捉住黎昕淇嘅手腕，「你諗清楚先好答。」

「我冇話一樣。」黎昕淇垂低手嘅時候，陸修然跟住垂低嘅手輕掃過黎昕淇嘅手心，黎昕淇下意識縮咗一下

「咁咪係。」陸修然嘅語氣緩和咗落嚟，心情比啱啱好咗





陸修然握住黎昕淇嘅手，手自然咁放喺大髀近膝頭嘅位置，黎昕淇嘅指尖喺陸修然嘅手背上輕壓一下，自然嘅回握睇起嚟冇任何破綻

「咔—」鍾安而喺外面推門，冇敲門就開門行入會室

鍾安而嘅視線落喺陸修然同黎昕淇身上，兩人嘅反應有啲唔尋常，鍾安而嘅視線向下移，企喺門口嘅佢愣咗一下

鍾安而反應自然，同平時無異咁轉身行出會室，順手閂上會室嘅門

「呃⋯」黎昕淇嘅心臟緊張咁噗噗跳，用力收縮帶嚟嘅強力跳動，強到佢都可以感覺到胸口嘅突突跳，「佢應該唔會係睇到⋯？」





黎昕淇望向陸修然，又垂眸望一眼兩人仍然拖住嘅手，放喺呢個有啲曖昧嘅位置，再加上啱啱兩人同步咁鬆開手

「應該已經睇到。」陸修然嘅大腦因為啱啱一刻而空白咗，佢都呆咗一下

雖然佢話鍾安而入嚟佢都唔怕，但佢冇諗到鍾安而真係會入番嚟，仲要真係比佢見到

「宜家我明點解鍾樂時嗰陣咁震驚⋯」鍾安而企喺會室門口將自己嘅思緒整理

由啱啱望到直到宜家企喺門口，佢都有種驚魂未定嘅感覺，嗰種震驚嘅感覺好強烈

雖然之前有聽鍾樂時講過，佢當時雖然覺得好意外，但冇親眼見到、親耳聽到令效果冇咁好，宜家鍾安而親眼目睹可以親自體會鍾樂時當時嘅感覺

「咁⋯點算呀⋯？」黎昕淇嘅大腦仍然未回到神，佢茫然咁望向陸修然

「鍾安而睇起嚟都唔係啲會講八卦嘅人嚟。」陸修然打從心底認為鍾安而可靠，係可以信任嘅人





「我都信佢可靠⋯」黎昕淇忍唔住嘆氣，臉上寫滿擔憂，「比人知道真係以為我地係地下情⋯」

「大概已經有人覺得我地係真係地下情。」陸修然嘅左手搭喺黎昕淇嘅後腰上，將佢拉近自己，喺佢湊近到黎昕淇面前嘅時候，佢壓低聲線道：「鍾安而睇到，咁睇嚟佢個妹都好快會知，同一屋簷下，邊有咁多秘密。」

陸修然吻喺黎昕淇嘅唇上，今次佢冇放肆，只係輕吻一下就將佢嘅腰鬆開

黎昕淇將陸修然啱啱講嘅說話反覆思考，仔細思考下好似聽得出佢話裏嘅含意

「我嘅解藥做咩偷笑？」陸修然嘅手靠喺枱上托住額，側住頭望住帶住笑意黎昕淇

佢忽然覺得自己好似已經有好一排冇講過「解藥」兩個字，不過答案佢已經心裏有數

「冇，笑我地會長大人有大量，頭腦冷靜又聰明。」黎昕淇嘅嘴角微微上揚，勾起嘅弧度恰好，「果然係受大家仰慕嘅會長。」





「多謝。」陸修然一笑，雖然呢段讚美聽起嚟有啲虛偽，不過都係循例講聲多謝

「洗唔洗同副會長講聲，暗示佢唔好講出去？」黎昕淇都係有啲擔心，「雖然我都認同佢唔似講八卦嘅人⋯」

「唔洗，人都有叛逆心理，愈係阻止，想反抗嘅心就愈大；唔提嘅話都可以保守一陣，但提咗可能有反效果。」陸修然伸個懶腰，搖一搖頭

黎昕淇微微點頭，佢嘅內心有啲忐忑，又有啲矛盾，但陸修然反而有種柔韌有餘嘅感覺

「比人當係地下情一樣嘅關係，好似都⋯唔係真係太差⋯」

⋯

鍾樂時拎住一袋包裹行到江清懿嘅房門前：「叩叩，江清懿～嘩！你換衫做咩唔鎖門呀！」

一打開門見到江清懿將白裇衫同打底嘅背心除咗落嚟，上身身軀表露無遺，鍾樂時即刻將門虛掩拉埋，匿喺門後





「我都未趕得切同你講等一等，你已經開咗門⋯」江清懿無奈咁轉身背向門口，拎起朝早比佢掉喺床上嘅T裇

「邊個知你換緊衫啫！」鍾樂時雙手捉住門柄，頭微微一側從有一隻手掌位嘅門縫望入去

鍾樂時嘅臉都紅咗一半，紅霞沿住臉頰蔓延到耳根，佢匿番喺門後細聲嘟囔道：「搞錯呀，屋企有女仔都唔鎖門換衫⋯」

「我著好啦，你有咩事搵我？」江清懿行到房門前伸手將門打開

「呀！」重心落喺門上嘅鍾樂時喺門打開嘅瞬間比門拉住行，直撞到江清懿身上，「你開門咪開門，咁大力拉門做咩！」

「我冇用力拉門⋯」江清懿抬頭望一眼房門，怕鍾樂時會告狀一樣即刻解釋，「你可以企好未？你好重。」

「我、我邊度重呀！」鍾樂時比江清懿一提醒，佢發現自己仲靠住江清懿，即刻尷尬又怕醜咁企得畢直，「放喺出面櫃桶把𠝹刀係咪你拎咗⋯」





「係呀，你要？」江清懿若無其事咁平靜轉身行到書枱前，打開櫃桶將𠝹刀遞比鍾樂時

「嗯，我買咗新衫～」鍾樂時拎起手上沉甸甸嘅袋，勉強咁晃兩下，「好重，我要去試衫先～」

鍾樂時試完所有衫，將𠝹刀拎到江清懿嘅睡房，放喺佢嘅枱上：「我用完啦～」

「唔該。」江清懿望咗𠝹刀一眼，微微點一下頭

鍾樂時行到江清懿嘅床邊坐低，雙腿交叉前後輕擺；江清懿回頭一臉困惑咁望住坐喺佢床邊嘅鍾樂時




IG Link: https://www.instagram.com/nd_cotttoncandy/?hl=zh-tw