【愛情】如地下情一樣嘅癮，係我對你嘅定義: 79. 親眼所見

「唔好凍親。」陸修然拎起搭喺櫈背上嘅外套披到黎昕淇嘅身上，順手將拉鏈由最底拉到上最頂遮到嘴前

「你包埋我對手喺入面⋯」黎昕淇望住套住自己嘅外套輕皺起眉頭，艱難咁將雙手從手袖穿番出嚟

陸修然嘅外套著到黎昕淇身上顯得有啲大件，將黎昕淇本來已經唔大脾一半都唔到嘅短褲遮到剩番褲管嘅白色邊

「著住啦。」陸修然坐低喺書枱前迴避視線，合埋雙眼仰起頭消除雜念

「你眼瞓啦？」黎昕淇雙手搭喺櫈背上低頭望住陸修然





「唔係。」陸修然搖頭，黎昕淇行到床邊坐低，「你條短褲會唔會太短？」

「唔會呀，係你件衫太大件。」黎昕淇坐低唔夠兩秒又企番去身，低頭望向自己嘅短褲，「我啲褲都係呢個長度，唔算短。」

黎昕淇又一次行到去陸修然嘅櫈後，從後用雙手托起陸修然嘅下巴，陸修然輕皺起眉頭，涼浸浸嘅感覺喺佢嘅下巴同頸擴散開

「你隻手真係好凍⋯」陸修然嘅手搭喺黎昕淇嘅手上，將佢嘅手覆蓋住，冰涼嘅感覺從手心散開

黎昕淇貼喺陸修然頸上嘅手覺得暖笠笠，好似拎咗個天然暖包，食指不為意咁輕輕掃過陸修然嘅喉核





「你點解咁暖？」黎昕淇感覺到陸修然離開櫈背坐好，佢自然就將雙手鬆開，「好似天然暖包。」

「男仔嘅體溫高啲。」陸修然伸手將黎昕淇拉到床邊示意佢坐低

陸修然嘅手踭靠喺扶手上面，黎昕淇坐喺床邊，將櫈拉近床邊嘅位置，陸修然連人帶櫈拍到床邊

陸修然嘅視線一直落喺電腦上，黎昕淇嘅左手搭喺扶手嘅後半部分，指尖輕碰陸修然嘅手踭一下

陸修然稍微望咗一眼，靠喺扶手上嘅右手微微提起，指尖碰到黎昕淇嘅手後將佢嘅手握喺手心中，手踭靠番喺扶手上面，黎昕淇嘅前臂貼住佢嘅前臂





「唔⋯」黎昕淇帶啲疲倦咁將額靠喺陸修然嘅手臂上，感受住指縫被撐開、手被扣住、暖意從手心傳嚟嘅感覺，「今晚食咩好？」

「你想食咩？想食炸雞咪叫炸雞。」陸修然側着頭，身側向床嘅方向坐

「都好喎。」黎昕淇嘅臉頰貼喺陸修然嘅手臂，眼睛望住電腦播緊嘅影片內容，「陣間睇餐牌。」

看似親密，想要親近⋯呢種念頭一直喺腦海中盤旋，唔係親密到某一地步，唔可能咁樣拖住、緊扣住

如果戳穿咗中間嘅一層紙，事情嘅發展可能又會喺掌握之外，戳破唔可怕，可怕嘅係結果不似預期

「你隻手好似冇咁凍。」陸修然嘅手輕握咗黎昕淇嘅手一下

「著咗外套，而且你隻手好暖。」黎昕淇嘅右手捉住陸修然嘅手臂，冰冷感隨即由手臂擴散開

「但你嘅右手好凍⋯！」陸修然不禁笑道，雖然有啲冰，但佢冇縮開手，由得黎昕淇捉住佢取暖





親密嘅依偎令人覺得關係都上升咗一層，陸修然望咗黎昕淇一眼，黎昕淇輕哼一都聲，右手將陸修然嘅手臂捉得更緊，好似表達緊佢唔會理陸修然怕凍而縮手一樣

「洗唔洗蓋被？」陸修然掀起被嘅一角問

「唔洗。」黎昕淇唔太在乎咁望一眼被角，視線又落番喺電腦上

「捉住我夠暖啦？」陸修然嘅語氣比平日溫柔，察覺到嘅黎昕淇抬頭望向佢

「勉強夠啦。」黎昕淇撅一撅嘴，佢偏唔講出完全肯定嘅說話

但佢嘅左手一直冇從陸修然嘅手中掙脫嘅打算，右手亦仍然捉住陸修然嘅手臂

如果所有線索同證據都指向同一個結果，有啲說話係唔係就算唔講出口都唔緊要？係唔係就算唔講得明明白白，都可以察覺得到？





畢竟，凡走過必留下痕跡，更何況痕跡咁明顯？

⋯

朝早番學嘅路上，鄭洛苡見到行喺佢前面但離佢唔遠嘅鍾安而，冇猶疑太多就上前拍佢

鄭洛苡企喺鍾安而嘅後方，伸手拍佢嘅右邊膊頭，鍾安而自然咁擰向右邊望

「早晨～」鄭洛苡喺鍾安而轉頭嘅瞬間就行到左邊

「早晨。」鍾安而見到突然喺佢左邊嘅鄭洛苡，一朝早就忍唔住露出笑容

「你今日要上台係唔係？」鄭洛苡諗起喺琴晚嘅對話中鍾安而有提過

「嗯，樂時捉咗我陪佢。」鍾安而無奈道，「我本來都唔想，但比佢纏咗兩日，所以放棄啦都係答應佢算。」





「可能同你一齊去有安全感多啲呢～」鄭洛苡被逗笑

「佢只係要拉個人陪佢，係邊個都一樣。」鍾安而嘆氣道，佢本來就唔太想去，但鍾樂時次次最後都揀佢嚟問

「我再眼瞓都會睇你宣傳㗎～」鄭洛苡同鍾安而一齊嘅時候，笑容都冇收起過

「唔睇都得，我會緊張。」鍾安而搖搖頭，「會唔記得要講咩。」

「我地班條隊都唔係喺台嘅正前方。」鄭洛苡反駁道，「所以都唔緊要啦～」

早會嘅時候，前面宣傳其他活動嘅學生仍然喺台上，鍾安而同鍾樂時喺台下等緊

「鍾安而呀，我好緊張⋯！」鍾樂時捏住手中嘅講稿





「你又唔係第一日上台做宣傳。」鍾安而悠閒咁抹眼鏡，然後整理校服，「你唔搵張詩楠陪你？」

「你喺我隔離我會覺得安心啲踏實啲⋯」「得啦得啦，已經聽咗100次，好冇新意。」

鍾樂時嘅解釋聽到鍾安而都聽唔到落去，次次都用同一個解釋嚟要求鍾安而同佢一齊去宣傳

「你點可以咁樣講㗎⋯」鍾樂時扁起嘴不滿道，拎起講稿擋喺嘴前，「我一片心意⋯」

「你望緊咩？」鍾安而望住一直向右邊望嘅鍾樂時問道

「今日同你一齊番學嗰個女仔係咪你嗰班？」鍾樂時見鍾安而問佢，佢毫不客氣就問起朝早嘅事

鍾安而其實預咗鍾樂時一定會問，迎面見到佢點可能唔問？唔問嘅話同鍾樂時嘅性格就完全唔符合

「你做咩唔答我？」鍾樂時探頭望向鍾安而，「今次仲唔比我親眼斷正？你淨係話我知係唔係同班嘛⋯」

「係同班。」鍾安而回答

「係唔係平時send message嗰個女仔？」「你話淨係答你係唔係同班。」

鍾安而冇中圈套，佢一早就估到鍾樂時會好多問題問，不過既然鍾樂時比個優惠，答一題就可以，咁佢就答一題

「你好奸茅呀⋯！」鍾樂時不滿抱怨，不過佢冇時間抱怨太多，因為台上嘅同學轉身落嚟

「行啦。」鍾安而用講稿嘅角戳咗鍾樂時嘅膊頭一下，然後將講稿收入褲袋




IG Link: https://www.instagram.com/nd_cotttoncandy/?hl=zh-tw