【愛情】如地下情一樣嘅癮，係我對你嘅定義: 73. 晚安
夜晚8點
陸修然同黎昕淇陪爸媽企喺路邊等佢地叫咗嘅車
「你記得食飯呀，夜晚記得餵貓，出門口記得拎鎖匙，有事就搵阿然知唔知？」媽媽喺車到之前再三叮囑黎昕淇，「呢幾日屋企靠你啦～」
「知啦⋯你啲寶貝貓我會餵啦⋯」黎昕淇無奈笑道，「你地玩得開心啲啦。」
「有咩搵阿然啦，唔睇得都打得下嘛～」陸媽媽推咗陸修然出嚟，喺佢膊頭拍咗兩下，「阿昕有嘢搵你嘅話你記得聽電話，唔好較晒做靜音搵都搵唔到你。」
「知道。」陸修然微微點頭
「車嚟啦。」黎爸爸望住停喺佢地面前嘅車，司機幫佢地打開門同後尾箱
「我搬。」陸修然接過佢地嘅行李拎到車尾箱放好，黎昕淇將行李推近陸修然
將所有行李都擺好之後將車尾箱閂好，同要去旅行嘅佢地揮揮手，望住車開動直到前面嘅紅燈位
「番去？」陸修然問黎昕淇
「嗯，你食咗嘢未？」黎昕淇微微點一點頭
「未，買埋番去食？」陸修然道
「嗯，好。」黎昕淇跟喺陸修然身旁行
⋯
獨自在家第三日嘅夜晚
黎昕淇沖完涼，洗完頭之後頭髮都濕漉漉，拎起風筒吹頭，頭髮吹乾咗一成，髮尾仍然有水珠凝聚
「嗯？」黎昕淇望住忽然冇風出嘅風筒有啲困惑，拔走插頭重插再開幾時都係冇風，「你雖然係個虧虧地嘅風筒，但你都壞得幾啱時候⋯媽咪佢地去咗旅行你就嚟壞⋯」
黎昕淇將風筒插番喺架上，將毛巾搭喺頸上後行番房拎手機
「呢個時間，阿然應該未瞓⋯」黎昕淇望一眼時間，「我send message比佢嘅話佢會唔會睇唔到⋯？我唔想等個頭自然乾，瞓嗰陣仲濕漉漉⋯」
再三思量後，黎昕淇覺得自己要吹乾濕漉漉、髮尾仲滴緊水嘅頭髮比較緊要；黎昕淇搵到陸修然嘅電話號碼就直接打咗過去，電話響咗兩聲，陸修然就接聽咗
「你瞓咗未？」黎昕淇問道
「未，做咩？」陸修然有啲困惑，抬頭望一眼放喺枱上嘅時鐘，宜家先差唔多10點
「我屋企個風筒壞咗，想借風筒。」黎昕淇都唔轉彎抹角，直入主題
「哦好呀。」陸修然講完就聽到對面嘅人掛斷電話，佢將手機放番喺枱上
5分鐘都未到就聽到門鐘響，陸修然起身行出房去開門，黎昕淇嘅頭髮仲滴緊水，頸上面搭住毛巾，衫上面都有水跡，手上拎住把梳
黎昕淇直接行去廁所拎起風筒吹頭，陸修然行番房將房門虛掩住
黎昕淇吹完頭將風筒插番喺架上面，用梳將頭髮梳順，然後行出廁所行到陸修然嘅房門前推開虛掩住嘅門
「吹完頭？」陸修然回頭望一眼
「吹完。」黎昕淇將手機同鎖匙放喺陸修然嘅手機隔離，「屋企冇人好悶。」
「唔係有芝麻牛奶陪你？」陸修然問道
「人同貓點同？」黎昕淇坐低喺陸修然嘅床邊，側身瞓低喺床上，「得我一個好悶。」
「搵我攝時間？」陸修然瞄一眼黎昕淇，開玩笑問道
「媽咪叫我有事就搵你。」「你宜家有咩事？」
黎昕淇理直氣壯，陸修然無言以對；黎昕淇瞓喺床上面，目光落喺陸修然身上
「不如就咁瞓著算⋯」黎昕淇心裏講咗句連佢自己都覺得意義不明嘅說話
黎昕淇自己都嚇咗一跳，一秒從床上彈起身坐好；陸修然感覺到有嘢快速閃過，回頭望向黎昕淇
「冇嘢⋯」黎昕淇露出尷尬嘅笑容搖頭
陸修然一直凝視黎昕淇，望到佢都覺得唔自在，陸修然連人帶櫈轉過去面向黎昕淇，手放喺櫈嘅扶手上抬住下巴
「你應該唔會係諗緊喺度瞓之類？」陸修然瞇起眼，憑直覺說話
「我點解要諗呢個？」黎昕淇嘅面子唔容許佢承認
不過最近，黎昕淇感覺到佢同陸修然接吻嘅頻密程度有啲高，但明明冇覺得癮嘅出現程度頻密咗
「點知道。」陸修然笑一笑，佢忽然覺得黎昕淇嘅心思幾易估中，「我冇所謂，隨便你。」
「咁咪好益你？」黎昕淇輕皺起眉頭不悅道
「得呢樣嘢益我？」陸修然又笑問道，緩緩收起笑容從櫈上離開，右腳跪到床上湊前
喺無人知曉嘅時候，悄然嘅熱吻，放肆嘅熱吻，或者喺夜晚嘅氣氛更令人產生慾望
就算屏住呼吸都冇辦法將熾熱嘅氣息隱藏起嚟，默默加快嘅呼吸同心跳令慾望嘅感覺明顯提升，步步退縮又步步逼近，距離只會愈嚟愈近
陸修然鬆開黎昕淇，黎昕淇泛紅嘅臉頰加上微微閃爍嘅雙眸，忽然間露出嘅柔弱令陸修然有啲想再繼續落去
但每一次嘅熱吻都令黎昕淇負荷過重，電力一瞬間流失一樣，成個人都會變得特別疲倦、特別想瞓覺
「昕？」陸修然感覺到黎昕淇伸手抱住佢嘅腰靠喺佢懷中，過咗一陣佢低頭望一眼黎昕淇，無奈一笑，「點解每次都可以話瞓就瞓⋯？又話唔喺度瞓⋯」
陸修然伸手將被掀開，輕手輕腳咁將黎昕淇放好喺床上後幫佢蓋好被，幫佢將手機叉電，鎖匙放好喺手機旁邊
佢坐喺書枱前，目光卻不自覺咁落喺黎昕淇身上
「成日都咁冇戒心喺我面前直接瞓著⋯」陸修然有啲苦惱咁托住額，「完全冇辦法做到唔想獨佔⋯」
陸修然由得黎昕淇霸佔佢張床，一直到陸修然都眼瞓，時間都到咗12點嘅時候，陸修然閂咗電腦準備瞓覺
「唔叫醒佢都唔緊要⋯？」陸修然企喺原地猶疑咗一下，然後拎住手機行出睡房，輕力將門閂上
陸修然行出廳將大門鎖上、扣上防盜鏈，閂晒燈之後佢行到爸媽嘅睡房瞓，畢竟冇理由同黎昕淇一齊瞓，感覺太似乘人之危
陸修然將房門虛掩住，灘喺床上嘅時候完全冇睡意，或者因為黎昕淇就喺隔離令佢輾轉反側瞓唔到
「瞓覺瞓覺，唔好諗嘢⋯」陸修然將手機駁上叉電線，平瞓好之後合埋眼試圖催眠自己
半夜嘅時候，黎昕淇轉一轉身，迷迷糊糊咁就醒咗，佢側身望向門口嘅方向呆咗一陣
IG Link: https://www.instagram.com/nd_cotttoncandy/?hl=zh-tw