【愛情】如地下情一樣嘅癮，係我對你嘅定義: 57. 所有物
黎昕淇行到玄關將門閂上，將書包除低放喺門邊嘅小木櫈上；陸修然換上拖鞋，行入房隨便咁將書包放喺門邊，眼見黎昕淇冇入房，佢行出睡房望一眼
「你企喺度做咩？」陸修然望住仍然企喺玄關嘅黎昕淇問道
「你最近，都好奇怪。」黎昕淇面無表情，認真且嚴肅咁望住陸修然道
「我？唔明。」陸修然嘅眉頭輕皺一下，語氣仍然認真，但喺番到屋企就變成慵懶感重啲嘅語氣
「你最近，成日莫名其妙咁發我脾氣。」黎昕淇企喺原地，語氣平靜得可怕，「我問你做咩你又話冇事。」
「哦，就係，冇事。」陸修然同黎昕淇之間隔咗一個雙門鞋櫃嘅距離，中間企四、五個人都足夠，「你多心啫。」
「唔係我多心，因為你今日又係咁。」黎昕淇雙手翹埋抱喺胸前，喺深呼吸一口之後，黎昕淇緩緩開口：「你唔中意江清懿？」
「我對佢嘅狀態唔到呢種地步，我同佢唔算熟。」陸修然回答
「我同江清懿只係朋友。」黎昕淇望住陸修然嘅冷淡，眼底有一絲難受，佢選擇咗解釋，「只係一齊番工、平時又一齊食飯所以熟啲咁解。」
「我同你都係，只係比其他人早咗好多年識咁解。」陸修然淡然嘅回答令黎昕淇忍唔住皺起眉頭，「不過，又唔止係朋友咁簡單，但你冇向我解釋嘅必要。」
「係因為你最近好奇怪。」黎昕淇踏前咗一步道
「冇奇唔奇怪，只係你唔了解我。」陸修然嘅說話冷淡且有殺傷力，佢微微抬起下巴將氣場開滿，冷冰嘅眼神直刺向黎昕淇，「我向來都唔中意人地掂我嘅嘢。」
黎昕淇愣咗一下，佢有估到係同江清懿有關，但冇諗得太深入
「我又唔係你嘅所有物⋯！」黎昕淇回過神、輕皺起眉頭、聲量稍稍降低，但冇因為聲量降低而有失氣勢
「既然你覺得你唔係，咁你做咩要同我解釋？」陸修然即刻反問，好似對於黎昕淇嘅回答早有準備一樣冇絲毫猶疑
陸修然行到黎昕淇面前，將黎昕淇一直握喺手中嘅手機從手心抽咗出嚟，長㩒住屏幕後拉到第二張wallpaper，將手機嘅螢幕面向黎昕淇遞到佢面前
「而且，呢張相，都唔太應該出現喺wallpaper呢個位置。」陸修然將佢同黎昕淇嘅拎住公仔嘅合照放到黎昕淇嘅面前問，「你唔好話我知，係你隨手揀咗張相擺喺度。」
黎昕淇望住眼前佢親手set嘅wallpaper啞口無言，佢係唔想比人知所以先將呢張相放喺第二張，什至冇開定時切換
「你點解會睇到⋯」黎昕淇拎番手機，氣勢都弱咗三分
「應該係你換咗之後嗰日，你開咗定時切換，咁啱睇到。」陸修然都冇講大話嘅必要，「你冇諗過會比人睇到？既然你係咁唔想比人知。」
「又冇人會特登拎我部手機，我又唔會特登開比人睇。」黎昕淇反駁道
「隨便你。」陸修然微微聳肩，冇想再爭拗落去嘅打算
黎昕淇欲言又止，最近佢同陸修然嘅關係都唔太穩定，好似成日都嘈交，關係忽冷忽熱
黎昕淇嘅手機又響起嚟，佢拎起手機一望，下意識抬眼朝陸修然望咗一眼
陸修然單憑黎昕淇呢個略帶點心虛又留意佢反應嘅眼神，陸修然已經知道打嚟嘅人係邊個
黎昕淇㩒咗手機邊嘅鎖屏冇接聽電話，陸修然側着頭，用冷淡嘅眼神望住黎昕淇嘅舉動
「做咩唔聽？」陸修然嘅雙手插喺褲袋，上身靠住鞋櫃企，「你唔洗太在意我喺度。」
陸修然嘅說話喺黎昕淇嘅耳中聽起嚟格外刺耳，聽起嚟係故意講說話比佢聽一樣
「佢見我冇聽會send message比我。」黎昕淇將手機推入裙袋，有一刻佢自己都有啲懷疑，到底佢係唔係做錯事
「嗯。」陸修然微微頷首，企好轉身就走
「喂！」黎昕淇叫住陸修然，陸修然停低又轉身望向黎昕淇，「你又發脾氣。」
「你自己話嘅，你又唔係我嘅所有物，我發脾氣同你有咩關係？」陸修然反問黎昕淇，黎昕淇又嬲但又冇嘢可以反駁，「你在意咁多做咩？」
陸修然講得直白，完全冇打算隱瞞佢嘅想法，但係佢呢種坦白入面又夾雜咗故意比說話佢聽嘅成份，搞到黎昕淇嬲又唔係唔嬲又唔係
「好呀！既然你覺得你同佢係一樣嘅話，咁你就繼續嬲啦！」黎昕淇眼見陸修然仍然係呢個愛理不理嘅態度，佢都懶得再同佢玩拉鋸戰喺度僵持，直接轉身拎起放喺門邊木櫈上嘅書包，「我番去啦！」
黎昕淇嘅脾氣直接放上面，陸修然無言咁冷笑一聲，望住黎昕淇行出去嘅時候佢都冇去追，兩個人都氣在心頭，喺脾氣上互不相讓
「嘖。」陸修然喺大門「呯」一聲閂上之後煩躁咁嘖咗一聲
黎昕淇番到屋企，煩躁咁將書包掉到衣櫃前嘅位置，氣沖沖咁坐低喺床邊，心情連同呼吸一樣未能平伏
「你自己話嘅，你又唔係我嘅所有物，我發脾氣同你有咩關係？」
陸修然講嘅冷言冷語喺黎昕淇嘅腦海中迴盪，黎昕淇嘅心情就變得更差，佢討厭陸修然故意嘅冷言冷語
「好麻煩⋯」黎昕淇灘喺床上面，佢自己都覺得大腦轉唔切，愈諗愈亂，「我就係，唔想你發脾氣⋯」
陸修然一個人坐喺書枱前發呆，佢同黎昕淇嘅關係，喺一開始已經唔一樣，行到呢一步要番去原來嘅起點好難
「既然你覺得你同佢係一樣嘅話，咁你就繼續嬲啦！」
黎昕淇怒氣沖沖咁將呢句說話掉比佢，陸修然默默嘆氣，目光落喺枱上嘅小白兔公仔上
「一樣又點唔一樣又點⋯」陸修然無力咁靠住櫈背仰起頭，但佢唔後悔佢講咗嘅嘢
佢只係講事實，對江清懿，佢的確稱唔上中意定討厭，因為佢係無感，除非江清懿掂到屬於佢嘅嘢
「好煩⋯」陸修然低聲道，「唔好再提我⋯」
佢討厭每一次見到兩人嘅接觸嘅時候，喺佢心底湧出嚟嘅危機感，每一下都提醒緊佢有人踩到佢嘅領域當中，令佢會不自覺去留意
陸修然心知黎昕淇唔係屬於佢，佢同佢之間嘅關係其實好簡單，只要中斷第二層嘅依賴關係，佢地會係普通朋友
「好煩呀，唔諗啦！」陸修然放棄思考，大腦內部已經夠混亂，唔需要佢令大腦再混亂啲，「愈諗愈亂，不如唔好諗。」
佢地自己都唔知道，今次咁樣鬧一鬧交之後又要冷戰幾耐先回復正常⋯
IG Link: https://www.instagram.com/nd_cotttoncandy/?hl=zh-tw