【愛情】如地下情一樣嘅癮，係我對你嘅定義: 50. 輕吻
靠住櫈背坐嘅陸修然坐起身，背脊離開櫈背，雙手放喺木枱上面掩住臉深呼吸，佢仲係好攰好想瞓
「會長你好攰呀？」宋楚妍出於關心咁問道
「嗯，有啲眼瞓。」陸修然見有人同佢講嘢，出於禮貌同尊重抬起頭望向宋楚妍
「你琴晚通宵咩？」莫淮禮放低手機喺枱上面，望向就嚟坐喺度都瞓得著嘅陸修然
「唔係，不過瞓得唔係幾好。」陸修然搖搖頭，佢強忍住濃濃嘅睡意等食飯
所有人嘅注意力都喺陸修然身上嘅時候，只有黎昕淇耷低頭，聽到江清懿同佢講嘢嘅時候佢先抬頭答佢
陸修然喺望向門口嘅時候，目光自然咁喺眼前嘅黎昕淇同江清懿身上劃過，下一秒卻喺臉上輕描淡寫咁掛上一個只有嘴角笑但眼冇笑嘅微笑
坐喺宋楚妍隔離嘅鍾安而啱啱好睇到呢一幕，因為係圓枱嘅關係，佢要睇到兩人嘅表情都係輕而易舉嘅事
望住壓抑同時又忍唔住變化嘅表情，鍾安而更加覺得呢件事有意思，喺佢眼中，陸修然係努力壓抑佢嘅不悅，黎昕淇係見到對面嘅人嘅不悅而唔知點算
「如果鍾樂時喺度一定激動到笑出聲⋯」鍾安而冇咩大反應，但佢第一個諗到嘅係鍾樂時嘅反應，「我嘅話，應該冇咁好耐力去地下情咁耐⋯」
鍾安而就算知都只係默默咁留意，佢只係單純覺得咁樣觀察其他人唔知道嘅事好有趣
握喺手中嘅手機一震，鍾安而即刻拎起手機睇，係鄭洛苡；鍾安而嘅注意力從「地下情」嘅兩人轉移到手機上，畢竟有更重要嘅事等緊佢
⋯
晏晝嘅堂特別飯氣攻心，上堂嘅時候陸修然完全冇心思去聽書，老師講嘅嘢喺左耳入完右耳出
「放5分鐘break。」阿sir似乎都察覺到大家飯氣攻心，仁慈咁比一個短嘅休息時間
附近嘅同學仲有精神可以傾計，但陸修然已經直接伏低咗小睡
莫淮禮擰轉身望一眼，本來打算問陸修然關於啱啱上堂嘅嘢，但見佢咁攰就打消咗呢個念頭
隔離課室仍然上緊堂，鄭洛苡都就嚟瞓著，耷低頭托住額頭一直釣魚
鍾安而嘅餘光可以見到坐佢隔離嘅人一直點頭，以為佢好專心，但當佢悄然轉頭望向鄭洛苡，嘴角就忍唔住微微上揚偷笑
鄭洛苡嘅頭用力一耷，忽然嘅重力令鄭洛苡即刻醒咗一醒，抬起頭望向黑板又望一眼自己嘅書
「呼⋯」鄭洛苡深呼吸一口，將腰背挺直拉筋
鍾安而見鄭洛苡瞓醒，佢即刻就收回視線低頭望書
放學嘅時候，鄭洛苡企起身要去開locker嘅時候伸咗個懶腰，餘光見到鍾安而輕笑一下
「偷笑啲咩？」鄭洛苡喺鍾安而行出座位嘅時候追上前問道
「你啱啱上堂有冇聽書？」鍾安而帶住微笑問道
「唔⋯聽咗少少啦～」鄭洛苡側一側頭，帶住可愛嘅笑容道
「行啦！我搞掂啦～」宋楚妍已經孭好書包，一蹦一跳行到黎昕淇嘅座位
「Okay，我擺埋嘢去locker就行得啦。」黎昕淇孭起書包，拎起枱面上嘅嘢行去locker前
黎昕淇將書放好喺locker，餘光留意到陸修然同莫淮禮喺窗外經過，黎昕淇小幅度轉頭望過去，剛好見到陸修然嘅笑容
「係喺我面前唔會有嘅笑容⋯」黎昕淇眸色一暗閂上locker嘅門鎖番好
佢地喺對方面前嘅笑容同喺學校對其他人嘅笑容都完全唔一樣，可能佢地自己都冇察覺到呢一點，佢地都只係睇到對方唔一樣嘅笑容
「行啦楚妍⋯」黎昕淇轉身同宋楚妍一齊行出課室
黎昕淇行喺宋楚妍隔離，目光一直望住前方
「佢應該番去瞓覺，我番去做咩好⋯？」黎昕淇望住陸修然嘅背影時喺心裏思量
上車之後，宋楚妍靠住玻璃坐，陸修然同莫淮禮上車嘅時候，莫淮禮見到兩人，自然就走向兩人企喺兩人面前
「嗨～」莫淮禮對兩人打咗個招呼，陸修然靠住扶手企，企喺黎昕淇嘅面前垂眸望向佢
「你地都咁準時呀～」宋楚妍笑道
「今日好彩，唔洗補課，我地會長要番去休息啦～」莫淮禮笑住望向陸修然，陸修然掛上疲倦嘅微笑點頭
黎昕淇見宋楚妍同莫淮禮笑，佢都配合咁露出笑容，陸修然打咗個喊露，睇起嚟係真係好攰，不過失眠嘅原因只有佢自己知道
落車嘅時候，宋楚妍同莫淮禮都已經喺早幾個站落咗車，所以只係剩低兩人一齊；黎昕淇跟喺陸修然身後落車，兩人一前一後行到上層，陸修然出閘之後轉身等埋黎昕淇
「你係唔係要番去瞓晏覺？」黎昕淇加快腳步行喺陸修然身旁嘅位置
「你想打機？」陸修然留意到黎昕淇小心翼翼嘅表情，「你咪上嚟，我冇所謂。」
「你唔係要瞓晏覺？」黎昕淇見陸修然咁樣答就有啲遲疑
「冇關係，我瞓覺，你打機。」陸修然行到玻璃門邊㩒密碼，然後開門比黎昕淇先行入去
黎昕淇見陸修然咁講，最終都係跟咗佢番屋企；黎昕淇駁緊遊戲機，陸修然換完衫就灘低喺床、掀開被蓋好瞓覺
黎昕淇將遊戲嘅音量較細，佢唔想影響到陸修然休息，所以坐喺櫈上要郁嘅時候都唔敢太大動作
「呼⋯」完咗一場之後，黎昕淇輕呼一口氣，轉望向陸修然嘅時候發現佢已經瞓著咗
陸修然側身向住書枱嘅方向瞓，黎昕淇直盯住陸修然嘅睡顏
「嗰日佢講咗幾耐劇集解說比我聽⋯？」黎昕淇諗起上次佢瞓唔著打比陸修然嘅事，「我連自己係幾時瞓著嘅都唔知⋯」
黎昕淇淨係知道係第二朝早起身睇先發現佢地嘅通話時間有差唔多三個鐘，一諗到呢度，心中平靜嘅湖面又一次泛起陣陣漣漪，一圈一圈慢慢擴散
「掛咗喺呢度，小白兔⋯」黎昕淇靠住櫈背，望向書枱嘅時候見到掛喺枱上嘅公仔
黎昕淇伸手將小白兔從掛勾上拎咗落嚟，拎喺手中捏咗兩下，偷偷地將公仔放到鼻尖前
「香水味⋯」小白兔嘅身上沾染到陸修然嘅香水味，雖然只係聞過一次，不過佢已經將呢隻味記喺腦海中
黎昕淇喺小白兔嘅臉頰上輕吻一下，然後將小白兔放回原位，就好似冇事發生一樣
IG Link: https://www.instagram.com/nd_cotttoncandy/?hl=zh-tw