【愛情】如地下情一樣嘅癮，係我對你嘅定義: 43. 承諾

偶然望向陸修然嘅手機，見到佢只嘅指尖隨便咁喺螢幕上下掃，睇起嚟冇特別睇緊啲咩

有人send嘢比陸修然嘅時候，黎昕淇順便咁偷望一眼，睇下陸修然嘅對話記錄入面有邊個

「冇咩女仔⋯江清懿嘅手機一大堆女仔send嘅message⋯」黎昕淇偷瞄一眼之後喺心裏道，「不過江清懿本來同好多女仔都好熟，陸修然反而會保持距離⋯」

黎昕淇悄然轉頭望向陸修然，放喺書包上嘅手指不禁捲縮起嚟輕握着拳，雙手攬住自己嘅書包

「你睇緊啲咩？」陸修然一早就察覺到黎昕淇嘅視線所在





「冇睇啲咩，好奇下我地會長係咪有收到好多女仔嘅message。」黎昕淇坦白直言，冇隱瞞嘅打算同必要

「冇，好可惜。」陸修然搖搖頭，將手機嘅螢幕側向黎昕淇，將螢幕一直向上撥，「基本上都係男仔。」

「哦。」黎昕淇唔在乎咁哦一聲，但目光一直留喺螢幕上

「安心未？」陸修然問咗一句不明所以嘅說話，以佢地嘅關係，呢句說話冇咩意義

「冇安唔安心，就係⋯好奇下。」黎昕淇道，「你識到女朋友同我又冇關係。」





難以言喻嘅心情凝聚喺心頭，不過黎昕淇冇太在意呢種感覺，因為最近都係咁

而且，黎昕淇好清楚陸修然係屬於受歡迎嘅類型，本來就係唔難搵女朋友嘅種類

「如果你話要搵女朋友，好多選擇比你揀⋯」黎昕淇愈係咁講，凝聚喺心頭嘅感覺愈沉重

「唔啦，講咗陪你單身。」陸修然呢句說話帶點搞笑同時又帶點認真

「隨、隨便你。」黎昕淇撅一撅嘴，仍然用唔在意嘅語氣回答





「我陪你單身，你唔好偷偷地去搵男朋友。」陸修然一臉嚴肅咁講

「唔會。」黎昕淇道，望住陸修然嘅時候喺心入面無奈咁啖一口氣，下意識吞口水：「有個咁大嘅癮喺度，點可能會搵男朋友⋯」

黎昕淇攬住書包，手捏住掛喺書包上嘅小黑兔公仔，唔知係因為咩原因，手一直將小黑兔捏嚟捏去，想紓緩心入面嘅唔自在

喺到站嘅時候，陸修然起身，輕拍黎昕淇嘅膊頭一下，黎昕淇頓時回神攬住書包起身

陸修然行喺前面，黎昕淇跟喺身後；陸修然發現黎昕淇唔喺佢身旁，停低回頭朝身後望，黎昕淇孭好書包小跑上前，拉住陸修然嘅書包

「行得好慢。」陸修然瞄咗黎昕淇一眼道

「宜家咪追上嚟⋯」黎昕淇伸手喺陸修然嘅手臂上搣咗一下，「麻煩⋯」

「同你一樣麻煩。」 陸修然嘅眼中閃過一絲笑意，彎腰喺黎昕淇嘅耳邊低聲道





黎昕淇擺出高傲嘅表情輕哼一聲，快步行到陸修然前面，陸修然雖然無奈，但都係追上前，跟上黎昕淇嘅步伐，打打鬧鬧咁番屋企

⋯

江清懿一手拎住麵包，一手拎住手機，邊食邊睇邊行番學；鍾樂時手上拎住一盒牛奶，行喺江清懿隔離邊行邊飲

佢地好少會一齊番學，多數都係江清懿最遲出門口，鍾樂時會同江清懿一齊出門口，大多數係因為佢遲咗起身

「唉⋯早知今日早啲起身⋯」鍾樂時望住手上嘅牛奶盒嘆氣，今日急住出門口冇食埋早餐先出門口，「最衰係你啦江清懿⋯！」

「你遲起身同我有咩關係？我平時都係呢個時間出門口。」江清懿不可思議咁望向鍾樂時，「你唔話鍾安而？」

「你同鍾安而都唔叫醒我嘅⋯」鍾樂時鼓起臉頰不悅咁抱怨





「叫醒你係鬧鐘嘅責任，唔係我同鍾安而嘅責任。」江清懿都冇佢咁好氣，連遲起身都可以賴落佢度，佢真係服咗佢，「你較多幾個鬧鐘會唔會實際啲？」

「唉～你點做人地阿哥㗎⋯！食人地啲雪糕，又唔叫人起身⋯！有冇作為哥哥嘅責任感㗎？」鍾樂時委屈咁扁起嘴

「真係唔好意思，我都係最近兩年先有個妹，我真係冇作為哥哥嘅責任感。」江清懿理直氣壯咁講，再加上微微側着頭帶住微笑道

「哥哥你恰我嘅⋯！」鍾樂時擺出更委屈嘅模樣，「好傷心⋯有兩個哥哥但冇雙倍嘅兄長愛⋯」

江清懿無語到極致，不過呢兩年佢都算熟悉咗鍾樂時嘅性格，用一句概括就係同鍾安而完全相反；佢冇太多做哥哥所要嘅責任感，同佢地兩兄妹其實更加似係朋友，多數喺屋企最嘈嘅都係鍾樂時，睇個遊戲節目興奮到好似佢喺入面玩緊一樣

「我走先啦拜拜～」江清懿怕咗鍾樂時，一秒開啟逃跑模式

「江清懿！」鍾樂時即刻追上前拉住江清懿嘅書包帶，江清懿怕佢一跑會扯跌鍾樂時，所以佢都係行番喺鍾樂時隔離

「兄妹」嘅日常，睇起嚟更加似朋友嘅日常；不過江清懿覺得鍾樂時嘅外向活潑係一件好事嚟，至少喺兩、三年前，佢同媽媽啱啱到呢個屋企嘅時候，鍾樂時喺中間做咗主動調和嘅角色，令大家唔尷尬又可以融入到新環境





江清懿行到課室，直接行到locker前拎書，抱住書就行番埋位；佢番到嚟嘅時候，黎昕淇一早番到，平時黎昕淇都係早過佢番，如果喺番學嘅路上見到黎昕淇，大概只有「同鍾樂時一樣唔知醒」呢個解釋

「你居然有未做完嘅功課呀？好少見喎～」江清懿留意到放喺黎昕淇枱上嘅英文功課簿

「聽日交㗎⋯」黎昕淇望咗江清懿一眼之後講道，「你估我係你？」

「唔該黎昕～」宋楚妍將借咗去改正嘅數學簿還番比黎昕淇

「出咗更表，睇咗未？星期六番朝早。」江清懿打開書包執嘢出嚟嘅時候順口提起

「你番朝早？我番咩？」黎昕淇有啲愕然，佢平時好少番朝早更

「我地都係番朝早。」江清懿將儲存咗喺手機入面嘅更表開比黎昕淇睇，「食唔食早餐？食完早餐再番去。」





「番朝早⋯可以一齊食早餐呀⋯」黎昕淇點點頭，未到星期六已經覺得好攰

「可以喺商場對面間茶記食早餐。」江清懿提議道

「哦好呀。」黎昕淇冇諗太多，只係覺得番朝早好攰，又要特登早起




IG Link: https://www.instagram.com/nd_cotttoncandy/?hl=zh-tw