【愛情】如地下情一樣嘅癮，係我對你嘅定義: 23. 視線

「好麻煩⋯」呢句說話就好似黎昕淇嘅口頭禪一樣，喺陸修然面前嘅時候會掛喺嘴邊，「諗唔明。」

「咁唔好諗。」陸修然比咗一個最直接又簡單嘅解決方法，「唔好諗啲冇解決方法嘅事，亦唔好自尋煩惱，搵更多無解嘅嘢比自己諗，平時仲唔夠多嘢諗？」

「哦⋯」黎昕淇伏低喺枱上低聲應咗一聲，「唔諗唔諗⋯」

陸修然拎起放喺枱上未食晒嘅雞蛋仔，摵咗一粒擺入口

「黎昕淇。」陸修然嗌咗黎昕淇一聲，黎昕淇抬起頭，眼見陸修然將手上嘅紙袋捏成一個波，最後一粒雞蛋仔放喺佢面前





「愈嚟愈諗唔明⋯」黎昕淇食咗之後又低聲講咗句，「好麻煩⋯」

陸修然望住獨自苦惱嘅黎昕淇，心入面大概應該知道黎昕淇指嘅麻煩係咩事，不過佢覺得佢冇必要思考太多

⋯

星期六

黎昕淇番工嘅日子，啱啱行入商場門口就遇到江清懿，真係每個星期六都會見面





「嗨嗨～」江清懿行到鄭洛苡身旁

「又見面啦，一星期見足你六日⋯」黎昕淇無奈咁笑道

「幾好呀～」江清懿聳肩，指一指啱啱到G樓嘅𨋢，大步大步行過去，「搭𨋢啦，𨋢到啦。」

黎昕淇轉身小跑起嚟追上江清懿，行到𨋢門前面嘅時候𨋢門啱啱好要閂埋，黎昕淇即刻就縮咗一下

「啪！」江清懿一手擋咗一下𨋢門，黎昕淇即刻行到𨋢嘅小角落





正當𨋢門又一次要閂上嘅時候，忽然又有人喺外面㩒開咗門，有幾個人行咗入嚟，本來都叫寬敞嘅𨋢即刻有啲逼；企喺門邊嘅人㩒掣閂門，門緩緩閂埋

「啪！」「唔好意思。」

一手隻又將𨋢門擋住，門又一次打開，又有兩、三個人要行入嚟，黎昕淇默默後退咗一步，背脊都已經貼住𨋢嘅牆

企喺黎昕淇前面嘅男人因為前面有人入而一步一步後退，佢嘅背貼得愈嚟愈近，黎昕淇已經準備伸手擋一擋

「唔好再行後啦！冇位啦！」黎昕淇輕皺起眉頭，喺心入面默默咁抱怨

「咳，唔好意思。」江清懿忽然間攝咗去黎昕淇同男人之間，將後退嘅男人擋住咗

江清懿背對住黎昕淇企，幫佢擋咗一直逼近嘅人，𨋢門緩緩閂上

「好逼。」江清懿擰轉頭淡然咁低聲講咗一句





「嗯，突然間咁多人入𨋢⋯」黎昕淇小幅度咁點頭

「你噴咗香水？」黎昕淇鼻尖一動

「我？冇呀。」江清懿耷低頭湊近自己嘅衫袖聞咗兩下，「可能係因為我沖咗涼先出嚟。」

「哦，你有咁乾淨？」黎昕淇有少少質疑江清懿嘅講法

「咩意思？」江清懿無語咁問，「我慣咗出門口前沖涼⋯到啦，仲笑。」

𨋢門打開，江清懿微微側身要行出去，黎昕淇跟喺佢嘅身後，有啲艱難咁從擠逼嘅環境中行咗兩步

江清懿回頭望一眼，拉起住黎昕淇嘅手腕幫佢行出𨋢





「你咁行法行到𨋢閂門都未出到嚟⋯」江清懿見黎昕淇一出到嚟就鬆開咗手

「前面啲人唔行開我點出嚟⋯」黎昕淇無奈道，「多謝你拉我出嚟囉！」

「唔洗，我都係照單全收。」江清懿順住黎昕淇嘅說話點頭，完全冇諗住話係舉手之勞之類

「你好厚面皮⋯行啦，遲到啦！」黎昕淇無奈咁講道，推咗江清懿一下之後就加快腳步向前行

江清懿行喺黎昕淇身後，喺黎昕淇冇留意到嘅時候影低喺飛快咁行嘅黎昕淇嘅背影，配上caption「行咁快做咩？」之後po咗喺IG story

喺屋企嘅陸修然拎住手機灘喺床睇緊IG，當IG一刷新嘅時候，就有新嘅story彈出嚟，陸修然自然咁㩒入去睇，隨即輕皺起眉頭

「仲有15分鐘呀⋯你咁趕做咩⋯？」江清懿雖然咁講，但都係追上前跟上黎昕淇嘅步伐

⋯





星期一番學嘅路上，江清懿耷低頭睇手機，耳仔仍然塞住咗耳機，專心咁聽緊歌，都冇察覺到喺佢身後一步一步咁走近嘅黎昕淇同宋楚妍

「喂！」黎昕淇最後行咗一大步，伸手拍江清懿嘅膊頭

江清懿嘅膊頭縮咗一下，猛然回頭見到兩個人望住佢，一臉成功嚇到佢嘅得逞笑容

「嚇死我⋯」江清懿將耳機除咗落嚟放番好喺耳機盒入面，「一大清早就比你兩個嚇咗一跳⋯」

「係因為你睇緊手機又聽緊歌，冇留意到我咋嘛⋯！」宋楚妍行喺江清懿隔離嘅位置，行喺中間

「你今日咁晏嘅？」江清懿有啲訝異呢個時間仲會見到黎昕淇順口咁問咗一句，「平時呢個時間你應該已經喺課室。」

「今日遲咗起身，所以晏咗出門口。」黎昕淇手上拎住個麵包，拎住一半喺膠袋一半露出嚟嘅麵包一啖咬落去，「樂時喺前面，你地一齊番？」





「最近都係，之前佢係同鍾安而一齊番學。」江清懿望一眼前方，離佢大概五、六步遠嘅鍾樂時，「今日鍾安而話有嘢做，所以早出門口，我以為學生會係咪有嘢做。」

「見到黎昕就知唔係，而且會長仲喺後面。」宋楚妍回頭望，陸修然仲喺後面悠悠閒咁睇手機，完全唔似係學生會有嘢做嘅狀況

「江清懿你個衫領冇反好。」黎昕淇嘅目光偶然落喺江清懿嘅後領，伸手輕輕咁拍咗江清懿一下

「我？」江清懿伸手摸一摸後領，隨便咁摺咗兩下，佢都唔太肯定自己有冇反好，「得未？」

「未得，左邊少少，嗰度都係反咗。」宋楚妍講道，黎昕淇睇唔過眼伸手幫江清懿將衫領反番落嚟，「Okay啦。」

「唔該。」江清懿自然咁再摸一摸衫領，將校呔嘅邊都收番好喺衫領下面

行喺黎昕淇正後方嘅陸修然咁啱抬頭向前望，心入面即刻嘖咗一聲：「都話佢唔公平，同其他人行咁埋就唔會比人講？」

雖然心入面係咁樣諗，但陸修然都係會默默按住黎昕淇想要嘅方式進行，不過都係會覺得唔太公平

「講到好似淨係同我熟會比人講咁⋯」陸修然一直喺內心反駁，「平時喺學校同我普通一齊行都話要保持距離，佢同其他人就可以唔洗保持距離啦？」

陸修然嘅不悅寫到喺面上，步速加快，因為唔忿氣而氣沖沖咁大步喺黎昕淇身邊經過，黎昕淇即刻感覺到有陣寒風吹過

黎昕淇成個人都縮咗一下，餘光見到一個人影喺佢身邊快速閃過，直到經過咗佢身邊之後黎昕淇先睇清楚嗰個人係陸修然

「突然間個氣場咁勁嘅⋯？」宋楚妍都感受到嗰陣寒風一樣嘅感覺，望住陸修然嘅背影不禁疑惑起嚟

「邊個惹到佢⋯？」黎昕淇喺心入面畫咗一個問號

IG Link: https://www.instagram.com/nd_cotttoncandy/?hl=zh-tw