【愛情】如地下情一樣嘅癮，係我對你嘅定義: 20. 小孩子
「點解我要同你一齊嚟？」黎昕淇同陸修然一齊去到離屋企一段距離嘅幼稚園門口，「阿姨係叫你嚟。」
「我唔想自己嚟。」陸修然嘅理由無聊到令黎昕淇冷笑出嚟
「行過去啦陸修然，拎出你做會長嘅霸氣。」黎昕淇輕推陸修然一下講道，「去接你堂妹番嚟啦。」
陸修然捉住黎昕淇，陪佢呢個不情不願咁行到去幼稚園門口嘅人，將接送證拎咗出嚟遞比企喺門口嘅幼稚園老師睇
「清茹～」梳住低馬尾嘅幼稚園老師拍拍手，用溫柔又可愛嘅聲線嗌道
陸清茹聽到老師叫佢嘅名之後，攬住書包行出嚟，見到陸修然企喺門口嘅時候即刻攬住書包跑起嚟
「踏踏踏踏踏！」陸清茹飛快咁跑到過嚟門口，伸手捉住陸修然嘅褲管，「老師再見～」
陸修然行喺前面，陸清茹邁出最大嘅腳步努力跟喺陸修然身後，黎昕淇行喺最後
陸清茹忽然回頭望住黎昕淇，喺黎昕淇行到佢隔離嘅時候，陸清茹伸出小手捉住黎昕淇嘅校裙裙擺
「陸修然，你行得太快啦⋯！」黎昕淇對行喺前面嘅陸修然嗌道，陸修然停落嚟擰轉頭，「人地腳又冇你咁長，你叫人點追呀？」
陸修然企喺原地等兩人行過去，黎昕淇皺起眉頭望住陸修然
「你要行得快都顧下人地小妹妹，睇下佢追上追得幾辛苦⋯！」黎昕淇不滿咁講道，「你一係抱佢行啦，你想快嘅話。」
「唔想抱。」陸修然直接就拒絕，完全唔需要諗一秒鐘就拒絕咗，「你抱咪得，如果唔係做咩帶埋你過嚟？」
「你⋯！我抱咪我抱！」黎昕淇望住眼前嘅陸修然，又低頭望一臉乖巧但又想人抱嘅陸清茹，心入面又嬲又無奈，佢吞下怒氣彎腰問陸清茹：「抱你番去好唔好？姐姐抱你。」
「嗯⋯」陸清茹怯怯咁望一眼陸修然，然後對黎昕淇怕羞咁點頭
黎昕淇彎腰將陸清茹抱起，跟上陸修然嘅步伐行喺佢隔離
「你要一直拎住粒珍寶珠呀？」黎昕淇望到陸清茹一直拎喺手中捏嚟捏去嘅糖，「你係唔係想食呀？」
「嗯⋯！今日老師請㗎！」陸清茹用力咁點頭，然後又望一望陸修然，手一直捏住糖嘅包裝紙
黎昕淇將珍寶珠從陸清茹嘅手中拎走，然後遞比陸修然：「我冇手開。」
陸修然默默咁接過珍寶珠，將包裝紙左轉轉右轉轉摵開，然後遞比陸清茹
陸清茹將糖放入口中嘅時候，臉上都係滿足嘅表情，黎昕淇同陸清茹對望然後笑一笑
黎昕淇覺得做小朋友真係好好，可以一直天真爛漫，一直因為小事而滿足，喺接觸到社會嘅殘酷前保持純真
黎昕淇將陸清茹放低喺陸修然屋企門口，然後打算落番樓下番屋企，點知比陸修然一手捉住咗
「你走咗咁我點算？」陸修然捉住黎昕淇嘅手腕，語氣夾雜咗少許慌張，顯得有啲手足無措
「咩點算，咪睇住佢。」黎昕淇理所當然咁講道
「我唔識湊小朋友。」「我都唔識，佢咁大個應該自己okay啦。」
「清茹，姐姐留低陪你玩好唔好？」陸修然轉身問坐喺門邊嘅木櫈上除緊鞋嘅陸清茹
陸清茹冇思考太多，佢聽到嘅只係玩同唔玩，所以佢即時點頭，陸修然即刻有理由理直氣壯咁望向黎昕淇
「你好嘢⋯！」黎昕淇沉着氣咬緊牙行入屋除鞋，「你最後義工服務揀咗咩？」
「幼稚園，同你一樣。」陸修然將屋企大門閂上
黎昕淇一臉難以置信咁擰轉頭望住陸修然，懷疑自己係唔係聽錯啲咩，陸修然揀咗去幼稚園做義工服務？
「咁你更加應該好好體驗一下湊小朋友係點。」黎昕淇反咗個白眼
三個人坐喺梳化望住電視打機，陸清茹坐喺黎昕淇嘅大髀上面一齊玩賽車，車轉左，黎昕淇就抱住陸清茹向左擰；車轉右，黎昕淇就抱住陸清茹向右擰
陸清茹同黎昕淇笑得好開心，一直坐喺黎昕淇嘅大髀上唔願落嚟，黎昕淇陪住陸清茹玩嘅時候睇起嚟完全唔攰
陸修然坐喺一邊拎住手掣，佢實在唔明白小朋友嘅可愛之處喺邊度，對唔中意小朋友嘅人嚟講，小朋友係小惡魔一樣嘅存在⋯
「飲唔飲水？」黎昕淇喺完場嘅時候側頭問陸清茹，見陸清茹點頭就將水樽遞比佢
陸清茹捉住水樽，有啲吃力咁掀開樽蓋，咬住飲管大啖大啖咁飲水
「你睇下你玩到頭髮都亂晒啦～」黎昕淇嘅語氣溫柔，係平時完全唔可能聽到嘅語氣，「姐姐幫你梳番靚好唔好呀？」
陸清茹騰出一隻手摸一摸自己嘅頭髮，將髮圈除咗落嚟遞比黎昕淇；黎昕淇拎出自己嘅摺疊梳細心咁幫陸清茹梳好頭髮，梳番個整齊嘅雙馬尾
「靚啦～」黎昕淇將摺疊梳放番入裙袋，手再順一順陸清茹嘅雙馬尾
陸修然一直望住佢地兩個人無視自己一樣嘅活動，見到黎昕淇少有嘅溫柔；陸修然喉核微動，忽然好似有種未命名嘅感覺落到心底，湖面悄然咁泛起一陣漣漪
「做咩？」黎昕淇感覺到落喺佢身上嘅目光，於是望向陸修然
「冇咩，我去個廁所。」陸修然回過神，平靜咁回答同時起身行去廁所
陸清茹將水樽放番喺書包，然後由黎昕淇嘅大髀爬到落梳化，坐喺梳化嘅角落頭揉眼打喊露
「你瞓啦，眼瞓嘅話。」黎昕淇拍一拍陸清茹嘅大髀講道
「嗯⋯」陸清茹靠住自己嘅書包微微點頭，乖巧又可愛嘅模樣更討人歡心
黎昕淇靠住櫈背坐，忽然間睡意來襲，佢都有啲眼瞓；陸修然喺廁所行出嚟嘅時候啱啱好見到黎昕淇坐喺度發呆
「發呆？」陸修然探頭望黎昕淇
「眼瞓⋯」黎昕淇緩緩開口道，可能因為攰嘅關係，聲線都變得軟綿綿，「佢瞓咗啦⋯」
黎昕淇望向靠住書包瞓著咗嘅陸清茹，佢自己都想瞓一陣，玩到佢都覺得攰
「瞓囉。」陸修然坐低喺梳化睇手機
陸修然啱啱先講完，一個重力喺佢膊頭上落下，陸修然稍微轉頭望咗一眼
IG Link: https://www.instagram.com/nd_cotttoncandy/?hl=zh-tw