【愛情】如地下情一樣嘅癮，係我對你嘅定義: 10. 放心

星期一嘅朝早係全個星期中最難捱，經歷咗兩日嘅假期，星期一又要繼續番學，朝早又攰又冇心情

黎昕淇同陸修然搭同一班車番學，兩人喺車上企嘅位置係一個大斜角，中間隔咗兩排位，企喺可以望到對方嘅位置

陸修然：「又未瞓醒？」

黎昕淇：「醒啦⋯只係仲有啲眼瞓」

陸修然：「好夜瞓？叫咗你早啲瞓」





黎昕淇：「冇，同平時差唔多時間瞓」

陸修然微微側一側頭望向黎昕淇嘅方向，見到黎昕淇成個人已經靠住門邊嘅扶手企，膠起嚟下一秒就要即刻瞓著

陸修然：「今日朝早要上台分享」

黎昕淇靠住扶手打個喊露，然後企直個人，拎起手機：「咁你加油，你啲小迷妹會專心聽」

陸修然：「你唔聽？」





黎昕淇望向陸修然嘅方向，兩人對望嘅時候，黎昕淇搖搖頭，然後喺對話框內打道：「休息」

早會嘅時候，陸修然企喺台上用流利嘅英文作分享，台下嘅女同學聽到會長嘅聲音都醒咗一醒，明明係最啱用嚟放空嘅時候但冇人放空發呆

黎昕淇深呼吸一口，令自己稍微清醒少少，望住台上嘅陸修然，佢都可以理解陸修然受人仰慕嘅原因，企喺陽光下嘅佢睇起嚟真係閃閃發光

整齊乾淨且燙得畢直嘅校服、行路嘅時候永遠都係昂首挺胸、偏低沉嘅聲線唔會用喺廢話上、沉穩且冷靜、可靠有條理

「難怪連冷笑都可以令小迷妹尖叫⋯」黎昕淇喺心裏講道，不禁嘴角上揚冷笑一聲，「可惜，大家睇唔到私下嘅佢⋯」





企喺台上嘅陸修然講到中段嘅時候，同台下嘅黎昕淇對望咗一眼，陸修然嘅神色依舊平靜，臉上嘅一抹淡笑自然唔突兀

「會長真係講得好好！」宋楚妍對黎昕淇講道

「見到靚仔，你就嚟連自己姓咩都唔知啦。」黎昕淇立馬回神，只係平淡一笑回答

「我記得我姓宋，未到嗰個地步。」宋楚妍豎起手指公講道

陸修然一講完，大家即刻用力比掌聲，最清醒係呢個時候⋯

陸修然將講稿摺起放入褲袋，然後行番去自己班嘅列隊，啱啱番到班隊，就比莫淮禮捉住咗

「會長果然係會長，好有氣勢。」莫淮禮嘅眼神中係滿滿嘅肯定同自豪，「作為你嘅朋友我好自豪⋯！」

陸修然有啲無言以對，只係上台對稿講都可以比莫淮禮一份自豪感





番到課室之後就係短暫嘅班主任時間，然後準備上堂，星期一無論係上咩堂都覺得疲倦萬分

「會長，數學簿唔該～」數學科長攬住喺前面收番嚟嘅簿行到陸修然嘅座位，陸修然將簿放喺最面，科長又繼續向後面嘅座位行去

陸修然托住頭，指尖一直喺枱上畫圈圈發呆，平時嘅佢同其他人無異，一樣係咁樣上堂，咁樣聽書，有時都會發下呆

唔中意嘈吵環境嘅佢多數小息同午飯時間都會去會室，避開嘈吵嘅環境，食個飯、打鋪機、睇陣手機又差唔多完結

食飯之前上四堂，對大家嚟講都真係好足夠，同莫淮禮加另外幾個男仔食完飯番到學校，陸修然就會「自動消失」

「會長呢？」莫淮禮只係去咗個廁所番嚟，陸修然就唔見咗人

「佢除咗會室仲可以去邊？」坐咗陸修然嘅座位嘅男仔講道，大家都好清楚佢嘅避難所喺邊





喺只有陸修然一人嘅會室中，陸修然戴上耳機準備喺會室補眠，今日上完堂之後佢都覺得眼瞓

「唔知係咪因為今日係星期一⋯」陸修然揀好歌播放之後將冷衫摺成一個枕頭伏低喺枱上，「好眼瞓⋯」

陸修然瞓到中途聽到會室開門、有人行入嚟嘅聲音，因為耳機較嘅音量好細，所以外界嘅聲音佢都係可以聽到

腳步聲由遠至近，行到去會長坐嘅主席位右邊嘅位置之後停落嚟，然後係電腦椅嘅轆同地面磨擦嘅聲音，聽到少許嘅嘰嘰格格嘅零件聲之後又一聲磨擦聲

「應該係阿昕⋯」陸修然大概估到入嚟嘅人係邊個，於是抬頭單起眼快速咁望一眼確定，「真係⋯」

「你繼續瞓得啦。」黎昕淇語調平緩咁講咗一句，坐喺陸修然隔離安靜咁睇手機

陸修然見係黎昕淇，就安心咁伏低繼續補眠，黎昕淇喺佢隔離嘅時候，佢好少會覺得不安，可能係出於識咗好耐而有嘅信任感

過咗一陣又傳嚟開門聲，坐喺電腦前嘅黎昕淇望向門口，從門縫探頭入嚟嘅係平時幫學生會做支援人員嘅同學





「師姐你好，我幫手拎print好嘅poster同其他物資上嚟㗎⋯！」對方係比黎昕淇低一級嘅男仔，所以叫佢師姐都好正常，「樂時同詩楠唔夠力搬上嚟，所以我幫佢地幫過嚟會室。」

「哦，唔該你呀！」黎昕淇連忙起身去將門推開至90度，等對方唔洗自己用背定住門，「擺喺枱面先啦！」

「唔該師姐！」對方將手上嘅紙箱放到枱上，本來已經比較亂嘅長枱，位置又少咗一部分，「師姐你洗唔洗開箱睇一睇？」

「好呀。」黎昕淇去閂番會室嘅門，然後鎅開封住箱嘅膠紙打開紙箱望一眼，「啲嘢都啱㗎啦，麻煩你啦～」

「唔麻煩！」師弟連忙搖頭，之前佢嚟會室嘅時候都好少見到黎昕淇，「師姐，我同樂時佢地一班㗎！如果有咩要幫手可以搵我㗎！」

「好呀。」黎昕淇微微一笑，「唔該。」

「咁我番去先啦！」師弟行到門前，開門前一際又回頭望咗黎昕淇一眼，再打量一眼





喺師弟閂埋門離開會室之後，黎昕淇坐番喺佢本來坐緊嘅位置，陸修然都坐咗起身

「佢係特登嚟自我介紹⋯？」陸修然梳一梳自己嘅頭髮

「佢係學生會嘅支援人員呀⋯」黎昕淇無奈咁講道，「會長你公務繁忙都留意下學生會有咩人幫手好唔好⋯？」

「佢都已經係支援人員，仲要特登過嚟自我介紹⋯？本來瞓著咗都醒番⋯」陸修然輕皺起眉頭

「你宜家繼續瞓咪得，打鐘前叫你。」黎昕淇又一次起身行到紙箱前，將紙箱內嘅嘢都拎出嚟睇清楚

「你平時唔係小辣椒嚟？今日心境咁平靜？」陸修然伏番低，又一次攬住冷衫，「對住師弟咁友善⋯雙面人⋯」

「你激少我一陣，我日日都咁平靜。」黎昕淇邊睇poster內容邊嘆氣道，「唉，而且有邊個唔係雙面人？得一面嘅話邊夠應付所有人？」

黎昕淇望一眼陸修然，又望一眼手錶，默默咁將紙箱嘅蓋蓋好，坐番喺陸修然隔離嘅位置




IG Link: https://www.instagram.com/nd_cotttoncandy/?hl=zh-tw