[GL] 重遇之後: 50

抬起滿佈淚痕的臉，橙紅色的晚霞已被黑夜吞噬。夜幕低垂，我們互相依偎，看著換上黑紗禮服的海景。
「覺得好啲未？」被我靠著的人稍稍低頭問道。
「嗯……」
「你個傻妹，成日都將啲嘢收埋喺心入面。之前又話以後有啲咩都會同我講……你知唔知我頭先好擔心你？」
「Sorry……」我垂下哭得紅腫的眼，語帶內疚地向情人道歉。
「下次有啲咩事，無論大事小事，都同我講，好無？」對方說罷親了一下我的頭頂，抱著肩膀的手稍稍往下移，溫柔地撫掃上臂哄慰道：「我哋身邊有大家，你有我，我有你。有啲咩事，我哋可以成為大家嘅safe zone，知道未？」
Tracy彎下眼梢，對我投以滿溢慈愛的目光。眼前的人，總是那麼鎮靜，好像沒有害怕的東西。抬眼看著戀人的臉，我迷惘地問道：「你點解可以咁淡定？」
「我睇起嚟好淡定？」被問的人有點意外地眨了眨眼。
「嗯，我覺得你好似咩都唔驚咁。」
她一直都予人無所畏懼的形象，好像那個並肩坐在碼頭，互訴心跡的晚上，也是對方這副毅然的態度，給了我往前邁步的勇氣。




旁邊女生沉默片刻，露出苦笑回道：「我其實一啲都唔淡定……老實講，我同你一樣，都有好多擔心嘅嘢。你頭先講嘅嘢，我雖然無你諗得咁深入，但都足以令人煩惱。我都有……彷徨嘅時候。」
「你都會咁？」這次換我臉帶驚訝地看著對方。她輕輕點了點頭，我續道：「咁你係點樣去克服佢哋？」
她皺下眉，以食指搔了搔臉頰，略帶困惑地回道：「我其實……無特別去克服，都無特登去在意佢哋。我只係……由佢順其自然，哈哈。」
「順其自然……」
「我覺得……我哋無辦法改變人哋，或者強迫人哋去接受自己，每個人對每件事情都有唔同睇法，佢哋點諗係佢哋嘅自由。但係同樣，人哋都唔可以強迫我哋接受佢哋嗰套，我哋都有選擇嘅自由。」
她臉朝前方陷入思考，以緩慢的語調將心中想法化為語言。她稍作停頓，重新抱上我的肩，彎下眼梢微笑道：
「所以，我哋可以做嘅，就係按自己心意，過自己想過嘅生活。」