[GL] 重遇之後: 43

雖然九月已經過了一半，但悶熱天氣依然持續，絲毫沒有初秋的涼意。我以慵懶的姿勢躺在野餐墊上，點開Tracy剛才傳來的影片。
『Tracy，你拍緊片？』
『嗯！你keep住推架車！』
『買嘢有咩好影？』影片中的我沒好氣地苦笑道，按照情人的指示推著購物車。『我哋仲有咩要買？』
『你開返電話張list嚟睇。』
『嘩，車又係我推，嘢又係我揀，而家仲要我自己睇要買咩！』
『我忙住拍片唔得閒，嘻嘻。』
『食呢隻薯片好無？』我拿起貨架上的商品，朝鏡頭問道。
『你話事。』
拍片的人只顧看手機，完全沒有要過來幫忙的意思，我鼓起臉頰道：『唔好再影喇，過嚟幫我。』




『我都話你揀咯。』
『OK……黃婉怡，係你迫我出手。』我瞇起雙眼，露出一個不懷好意的微笑。
『嘻嘻，你想點。』
『我想……』
「你睇緊咩？」
從洗手間回來的Tracy彎下腰，對著不自覺揚起嘴角的我投以好奇目光。我維持平躺的姿勢，舉起手機給站在頭頂處的人看。「睇緊頭先超市段片。」
一聲驚叫從屏幕中傳來，雖然看不到畫面，但身為主角的我，清楚地記得影片的後續。那時的我，朝鏡頭方向伸出五指，作勢要搶走Tracy的手機。拍片的人尖叫了一下，然後發出清脆開朗的笑聲，躲避我的攻擊，影片亦於此時完結。
看畢短片的人彎下眼梢，對我報以微笑，「拍片好好玩，我哋以後可以拍多啲。」
關掉通訊軟體的聊天室畫面，我瞇起雙眼，故作生氣地說道：「片就你拍，嘢就我做，都唔知你係咪想借拍片為名，乘機推晒啲嘢比我做！」
「我邊有？」Tracy裝傻笑道。




「你個樣出賣咗你。我唔理你。」
「嘻嘻，係咪有人嬲豬。」
「係。」
「Jane，我今日買嘢做咗埋單嗰個，可唔可以當無數？」彎下眉的情人坐到旁邊，屈起膝蓋，掌心輕輕包住我的手背，放軟聲音撒嬌道。
「唔可以喎。」
「唔好嬲喇，好無？」
「唔好。」我別過臉不理她。
她提起我的手，於手背上落下一吻，以哄小孩的語氣道：「唔好嬲喇BB，好無？」
「邊、邊個係你BB！？」我猛地縮回被捉住的手，面紅耳赤地喊道。
「除咗你仲有邊個？」




「你嗌出口唔覺肉麻咩！？」
「唔覺呀，BB。」她又打開掌心，想要再次抓住我的手。我連忙把手枕在後腦下，不讓對方得逞。
「……你想點。」
「你話呢。」
「哈，你係咪又想偷襲我？你以為我會衰喺你手上第二次咩？」我揚起一邊眉頭，語帶挑釁地說道。
旁邊的情人聽畢此話，盯著我的臉看，一副若有所思的樣子。片刻過後，對方好像想到什麼主意似的點了點頭，在我旁邊躺下，溫柔地勾起嘴角。這副過於柔和的神情，在此刻看來意味深長，心裡有種不好的預感，我咽了咽口水，作勢坐起身來。然而，對方搶先一步，伸手輕按稍稍抬起的肩膀，不讓我就此逃之夭夭。
我無力地躺回地上，與側躺的人四目相交。放在肩膀的手緩慢地往上移動，以指尖勾勒頸項、下顎骨的線條，然後到達正在散發微熱的右邊臉頰。近在咫尺的情人以姆指輕輕撫掃眼睛下面的位置，一副看得出神的模樣，輕聲問道：
「Jane，我可唔可以錫你？」