[GL] 重遇之後: 22
「呢間啲海南雞飯真係好好食㗎！你有無食過？」點過餐後，Susan向坐在對面的Tracy問道。
「無呀，不過Jane有send過相比我睇。」
「哦！係啦，聽Jane講你平時多數帶飯。」
「係呀，可以順便慳錢。」
「哎呀，咁今日咪要你破費囉……」
「梗係唔會喇！日日留喺公司食都會悶，間中出嚟呼吸下新鮮空氣都好呀！」
「真係？咁我哋下次再約出嚟吖！我同你一樣，日日對住同一個人都有啲悶，偶爾都需要啲新鮮感！」
無故中槍的我揚起嘴角，對著故作嫌棄的同事擠出一個燦爛的假笑，說：「要新鮮感呀？咁我以後唔同你食，等你自己一個人食，夠晒新鮮。」
「對唔住大大係細嘅錯，你唔好唔要我~~」
Susan將雙手合十，假裝內疚地朝我哀求道，我忍不住給眼前這張裝模作樣的臉翻了一個大大的白眼。坐在旁邊的Tracy被我倆的拌嘴逗得發笑：
「嘻嘻，你哋兩個感情真係好好。」
「係呀，佢原本眼中得我呢個好同事，但自從佢心有所屬之後，就變得有異性無人性！」
「我幾時有異性無人性呀？」我不滿地反駁道。
「哼，唔係今日有Tracy喺度，你又點會咁得閒，面對面同我傾計呢？」
「講到我當你透明咁。我有無咁沉迷手機呀？」
「你有。」Susan向我吐了吐舌，別過臉不理我。
一直好奇地聽著我們一來一往的Tracy搭話道：「佢點有異性無人性法？我都好想知呀。」
她的話令我感到一股不好的預感，正想要開口轉換話題之時，服務生端來了餐點。待他上完菜後，Susan拿起餐具繼續被打斷的話：
「唉，Tracy你聽我講，你個好姊妹，平時一到食晏時間就掛住WhatsApp唔理人！你唔好比今日嘅佢呃到，佢平時邊會咁專心聽人講嘢！」
「佢冷落你咁衰嘅。」Tracy壞心眼地對我笑了笑。
「你唔好聽佢亂講，我先無佢講得咁誇張。」
聽了我的話，Susan睜大眼睛回嘴道：「我邊有誇張！你前排先比佢搞到神不守舍嚟，跟住前幾日又喺度煩對方重唔重視自己！自從嗰個人出現之後，你成個人都變得多愁善感！明眼人都得出，你隻船已經沉到落海底，撈都撈唔返上嚟！」
「你就沉船！Tracy，你有咩可以問我，唔好接收啲錯誤訊息。」
「邊個叫你咩都唔同我講，我之前都有問過你㗎。」這次換旁邊女生裝作生氣別過臉去。
「我唔係唔同你講，只係唔知點開口……」
被集中攻擊的我已亂成一團，只能以虛弱的聲線向她解釋。她似是看穿藏在內心的彷徨，對我露出一個令人安心的微笑，輕柔地緩緩問道：「咁你同嗰個心上人而家發展到咩地步？」
「呃……」
「Jane，復活節！」
「咩復活節？」
對面女生朝著支吾以對的我以口型作出提示，想不到卻是旁邊女生先給了反應。Susan聽罷代我開口說：「哦，Jane佢呀，復活節……」
「Susan，夠喇！」預想到對方接下來要說的話，我連忙搖了搖手，慌張地阻止她說下去。然而，一切都太遲了。
「約咗佢個心上人去野餐！」
Susan得意地喊道，掛在Tracy臉上的笑容隨即變得僵硬，她就這樣拉著嘴角停頓片刻，不明所以地小聲問道：「嗯？野餐？」
「嗯。」坐對面的人理所當然地點了點頭。
「你指……同佢野餐嗰個……係佢心上人？」我雖然馬上小聲地說了聲不是，但這微弱的否定並未傳到對方耳中。旁邊女生滿臉驚訝，被同事的話嚇到的她就這樣愣了一會，神情複雜地說道：「我復活節都約咗Jane野餐喎。」
「你？Tracy？你約咗同Jane去野餐？」
「嗯……」
「Jane，呢個係咩一回事？」Susan茫然地問，然後閉上嘴巴，摸著下巴陷入沉思。片刻過去，她以試探的語氣說：「唔通……一直以嚟……你嗰個WhatsApp對象係……」
同事的雙眼越睜越大，似是要把這邊看出個洞來似的。這副難以置信的眼神，讓我感到很害怕。我很害怕事情會變得一發不可收拾。更害怕她們會對此作出的反應。
不要再看著我了。我只想逃離這裡。於是……
「唔係！嗰、嗰個係另一個人嚟！」我說了謊。
「吓？另一個人？」
「等等，我好亂，即係點？你同Tracy去野餐，跟住又同嗰個人去野餐？去足兩次？」
旁邊女生跟對面同事先後著急地對我投下疑問，以迫切的眼神催促我立刻給予回答。情急之下喊出來的話，已經收不回去。腦海一片空白，我只能緊閉雙唇，以無助的眼神交替看著她們。
過了一會，Tracy首先開口道：「嗯……即係你同我去完野餐，跟住又同嗰個心上人去野餐？」
「唔係……」
「咁即係點？」
「……」
「唔通……你將我哋嘅野餐當做係綵緋？利用好姊妹去做預習？」旁邊女生面無表情地問著，平靜的語氣讓人猜不出蘊藏在說話背後的心思。
我不知道她為什麼會這樣想，只知道要是現在不解決掉這個誤會，事情將會往更壞的方向發展！「Tracy，你聽我講。」
「咁妳應該一早就直接同我講吖嘛！唔使我估估下！一場好姊妹我當然會幫手啦！你就盡情用我嚟練習，做好準備再去見你嘅心上人！」
剛才還板著一張臉的女生，突然揚起嘴角，笑著打斷我的話，突兀的轉變讓人搞不清狀況。坐在旁邊的人，臉上掛著平常那個和譪的笑容，她拿起餐具，不給我說任何話的餘地、接道：
「嘩，講咗咁耐，我哋都差唔多應該食飯！」
一直沉默地看著這邊的Susan似是鬆了一口氣般用力地點了點頭，籠罩於頭頂的緊張氣氛稍稍和緩下來。我們之後各自吃起飯來，思緒扭成一團的我只是機械式地把無味的飯菜，一口接著一口的塞進嘴裡。途中，Tracy以開玩笑的口吻淡淡拋下一句：
「你呀，果然係有異性無人性。」
坐對面的同事也跟著附和了幾句，然而，在我聽來，這句話似乎滲著一絲揶揄的味道。