[GL] 重遇之後: 08

「可唔可以幫我影張相？」
「可以呀。」
「Thank you. 我想影下啲嘢食…可唔可以幫我移過呢碟少少？嗯，呢個位OK,」
替Tracy拍過個人照後，我按照她的指示移動桌上餐點。跟隨意地只拍幾張留作記錄的我不同，Tracy以多角度捕捉桌上美食，務求展現它們最大魅力。我微笑看著她這副正經八百的樣子，對面女生似乎是察覺到這邊視線，抬起頭不解地問道：
「你笑咩？」
「無，你真係好鐘意影相。」
「我想留住鐘意嘅嘢最美麗一面嘛。」Tracy滿足地滑著手機，她突然想起什麼似的，從螢幕移開視線向我問道：「話時話，我好少見你update個IG」
「係呀，玩得最多係讀書嗰陣，返咗工之後就無乜點擺嘢上去，多數都係用嚟睇人啲嘢多。同埋都無乜好擺…」
「你可以擺下我哋出街啲相呀。」
「我懶…同埋我影啲相都唔靚…」




「同靚唔靚無關喇~我想睇多啲你嘅嘢呀~」
「點解？」
Tracy想了想，說：「唔…我認為如果對方會花時間share同自己嘅嘢，代表佢都享受同自己一齊嘅時間。所以…如果你會擺上網，我就會知道原來你同我出嚟都係開心嘅。」
「我唔擺上網唔代表我唔開心呀。」
「我知……或者應該咁講，我只係單純想同對方喺一個公開嘅地方擁有共同回憶……尤其當對方係自己重視嘅人。」Tracy凝視著我雙眼，此刻她的目光略帶閃爍，似是意有所指。然而，在我的思緒能夠嘗試猜測那藏在眼底下的心意前，坐對面的女生搶先一步開口道：「好啦，其實只係我八卦啦！你就當係滿足我嘅好奇心，更新多啲好無？」
「但係我真係唔識影相…」
「唔使擔心！你好姊妹，我識！等我而家幫你影張相，你今晚就擺佢上IG！」語畢，她把手機對準我，輕輕擺手示意我坐好。她連續按了幾次快門，然後把照片遞給我看，笑問：「收唔收貨？」
「嗯，影得好好呀。」
「有無留住你最美一面呢？」
「…你覺得呢？」




「……我覺得你點影都咁靚。」這唐突的讚美讓我的臉頰瞬間滾盪起來。我生硬地撥了撥耳邊的頭髮，努力壓下猛地衝上心頭的翻騰。一直低頭滑著手機的Tracy並沒注意到我這副緊張的神情，她把照片發了給我，轉而望向桌上佳餚，興奮地笑道：「好！我哋終於可以開餐！好肚餓！等我試下呢碟先~~」
看到Tracy拿起餐具，我也連忙跟著夾了一顆肉丸往嘴裡塞。肉丸有點大顆，雖然嚼得吃力，但此刻的我只想把全副專注力放在吃東西上。
「係啦，前排我同事話呢間嘢好食。」吃到一半，Tracy把手機放在桌上，讓我看她的螢幕。
「啲嘢食好似幾吸引，下次可以試呢間。」
「好呀，你幾時得閒？」
「我哋今餐都未食完，已經諗定食下一餐？」
「嘻嘻，打鐵要趁熱嘛！」
「嗯…就嚟月尾可能會忙啲，下個月可能會好啲。」
「OK，咁我哋遲啲再約實時間~」
「好呀！」