返去兩年前就真係會有用咩？: 第一章-開始？

「我已經有鍾意嘅人，我唔想同你一齊」喺電話入面嘅女仔喺ig咁同我講。不過都慣咗，呢兩年都試過5-6次咁俾人拒絕，嚟嚟去去都係嗰啲「我唔想拍拖住」「你好好人」「我有鍾意嘅人嗰啲」反正之後佢就會好快同第二個一齊。我叫阿俊，係一個中五學生係A0、身高176體重77kg都幾肥、唔靚仔、手腳唔協調、好鍾意音樂、算係有兩種樂器喺手。
你睇完呢度大概會覺得我係一個溝唔到女嘅毒撚，咁我的確係，不過喺二三年前我都冇咁仆街，一個唔得就溝第二個，成個狗公咁。只係因為一個女仔令我改變咗唔少。佢叫阿穎、樣唔太差、好多嗜好、係一個好外向嘅女仔。中二嗰年我好着迷咁溝佢。但係經過一年嘅努力我發覺自己成日犯啲好on9嘅錯同埋覺得自己唔係佢會鍾意嘅人所以就放棄咗。不過至少當年好多人都覺得我哋會一齊甚至以為我哋一齊咗。不過我都係自己衰on9唔識氹女仔搞到佢都係唔鍾意我，有時我都會想知變咗咁多嘅我會唔會溝到佢呢？不過算啦，佢已經有男朋友，仲要係我以前嘅兄弟，活在當下最重要。
「天文台在晚上8:30時宣布8號颱風現正生效」手機突然之間彈咗呢個message出嚟。不過聽日就要開學，個風今晚就過㗎啦算啦，早啲瞓好過。「轟隆，轟隆，啪！」我突然之間俾一道閃電劈到「啊！」我突然之間見到自己離開咗間房，入咗一個好似多啦A夢嘅時光機經過嘅時光隧道。