七宗罪: 第一部：《色慾》（9）——父母

話說自從Christine和Dave分手以後，Christine已經沒有和父母聯絡一個月了。這是因為母親為道Christine與Dave分手的事生Christine的氣。而父親是一個怕老婆的人，老婆說什麼他就做什麼，他也不敢私下見Christine。雖然母親是拜金，把自己的女兒當搖錢樹，但正所謂血濃於水，她還是掛念Christine。一個月後，她氣也消了一半，想看看女兒，便叫Christine 這天到自己家裡吃飯。而Christine雖然覺得母親很麻煩，但自己對母親的厭惡程度也未到想和對方斷絕母女關係，便一口答應了。

在這天的晚上，Christine回到以前居住的公屋裡。一進屋，家裡早已準備好餸菜。

「阿爸，阿媽」

Christine叫了父母一聲，簡單洗了個手便坐了在飯桌上。

Christine以為母親已經對Dave的事情釋懷了，不會再提起Dave的事情。然而母親雖然是不再生Christine氣，但望著Christine，她終究放不下這事。吃飯吃到一半，她又開始講起分手那件事。





「唉，我唸起你同Dave散咗我心就唔舒服啦。」母親說道。

「咁都我無法架，佢自己出軌玩女人，佢都唔愛我啦，我做再佢女人都冇意思啦。」Christine開始感到有點不對勁。

「有錢仔玩女人好正常啫，佢地生活咁大壓力都要發洩架啦。Dave都係玩吓渣嘛，你知佢對你先至認真架，你咪忍吓咯。做咩要分手啫？」

「話分手嘅人唔係我，而係佢。」Christine已經不想再繼續這話題了。

「所以咪話囉，你一早就唔應該影佢啦，你當唔知咪得囉。」母親見Christine駁嘴也開始有點生氣。





明明是別人出軌在先，但現在好像是自己多管閒事。Christine最不喜歡明明是別人的錯誤，卻被怪到自己身上。母親此話一說，完全碰到Christine的底線，她的胃口因而全消了。

「我飽啦，我去廁所。」Christine說道語氣明顯帶著憤怒。

「欸～講幾句就唔忿氣就走，所以咪話囉，唔聽阿媽話，咪走寶囉。」眼見自己的女兒不順自己的母親怒道。

「老婆，難得佢返嚟吃飯，你就講少倆句啦，我唔想一見面就嘈交。」此刻連怕老婆的父親也終於忍不住了，說了老婆一句。

「咩啫，我有講錯咩？你地倆父女都唔唔講道理，唔食啦。」話畢，母親便扔下碗筷，箭步回到自己的房間，並大力關上房門。留下父親一個在客廳中。





Christine在廁所裡聽到外面的一切，知道母親進了房，便從廁所走了出來。

父親揮手示意Christina坐近自己，Christine照做了。

「你阿媽癲架，佢一直都係咁，你唔好放係心上。你要知你老竇個心一直企係你度架，我都覺得成件事你冇錯。不過你阿媽始終係我老婆，我冇可能為咗呢件事日日同佢開波。」父親壓著聲說道。

「阿爸，我明架啦，我冇嘢喔。」Christine微笑地說道。

「不過你阿媽真係好蠢，一廂情願覺得你地有可能。係人都知Dave係人渣啦，佢剩係當你係免費雞咁玩渣嘛，就算冇呢件事發生，佢遲早都會主動同你分手。」父親不忿地道。

Christine雖然沒有說話，只是低頭看著桌上的飯菜，但她心裡是非常認同父親說的話。

「雖然阿爸支持你同Dave分手，但係我都好想你快D搵返個終身伴侶，始終你都唔細啦，我地都老啦，我唔想死咗都抱不到孫。」父親苦笑道。

「阿爸，但係我真係未搵到我鍾意嘅人呀。」





「所以我都無催你呀，我只係想你去識多啲男仔，你咁靚又叻，去邊都自然有人追啦，你得閒就多啲同人social吓啦。」父親說道

「我儘量啦。」Christine回應到。

「唉，個個男人你都睇唔上，我懷疑你鍾意嘅唔係男人，而是女人。」父親嘆氣說道。

說起喜歡女人，Christine第一時間就想到Eve和Yuki，儘管她並不反對她們的同性戀，但不知道為何每次想到她們，就覺得有點滑稽。這樣Christine不禁笑了一聲，剛才母親帶給她的不快一掃而空。

「笑咩啫，又唔講嘢，笑而不語啫係默認啦。」父親笑到。

「冇呀，我係異性戀，我鍾意男人架。你唔好唸多咗啦。」Christine笑著回應到。

「係咩？唔信囉，你都冇同我講過你對邊個男人有興趣。唔係呀，你如果真係lex嘅直接同老竇講，我好開放架，絕對會支持你。如果你真係異性戀，我真係咁覺唔到，你唔好同我講你唯一鍾意嘅男人係老竇我呀？」





「係呀係呀，我剩係鍾意老竇你。」Christine開玩笑說。