人生如夢 — 奇夢/奇事分享: 奇事分享《一》

大家好，我叫阿力。

由細到大我都成日見到啲唔應該見到嘅野，即使細個屋企人帶過我做啲儀式，都係治標唔治本。 何出此言？ 今日我就分享一個我本人經歷過嘅靈異事件。話說以前仲住喺舊屋個陣，可能舊屋長時間都冇太陽入到屋嘅關係，屋企總係感覺陰陰沉沉。 基本上仲喺舊屋住緊個陣，屋企人同我都輪流每個禮拜都要去睇醫生，但我哋一家都捱到八年先搬屋。因為喺第八年嘅時候發生咗一連串嘅事令到我哋一家三口都覺得真係「此地不宜久留。」

當年我準備緊文憑試，壓力好大。我父母得我一個所以都好睇重我嘅成績。因為實在有太多書同筆記，我溫習嘅範圍都由自己間房慢慢擴展到客廳。 我覺得我自己擺書嘅方式都算係「亂中有序」。只係有時會擺曬係枱上面搞到睇落去好似好亂咁。 好好嘅係我屋企人都從來唔會掂我啲野，特別係我啲書。

有一日我唔見咗本紅色封面嘅筆記，你可能就諗，你啲野咁多又咁亂，唔見好正常姐！但係我有個習慣就係筆記會擺係當眼處方便我寫野。 雖然當時未出現「跌咗野試下唔好搵」，但我都深信我唔搵佢就會出返黎。 個晚我就問我屋企人有冇見過，佢哋兩個都不約而同咁講：「邊個夠膽掂你啲野啊大小姐，唔驚比你鬧咩！」 我父母當時都有幫手搵個本筆記，我媽當時都勸我寫過一本就算，唔好再嘥時間搵，搵咗幾日後我都認命寫過一本新嘅筆記。

出奇嘅事就出現啦。 放棄搵筆記後幾晚，我發咗一個夢，記得好清楚，因為喺我阿婆報夢。 外婆每一個夢我都會好記得，因為佢報嘅夢每一個都會好有意思，都係講將來會發生嘅事，但佢都係用啲比較隱晦方式表達。 講返今次個夢， 係夢入面我同外婆同外公喺茶樓飲茶。 其實我出世之前我阿公已經走咗，相信喺阿婆嘅關係，阿公入到我個夢，不過呢個唔係重點。 我記得喺夢中食食下粉果， 我阿婆遞本筆記比我，仲同我講： 「 唔好再周圍擺啦，比人拎走咗就緊係搵唔到啦！ 我好難得先傾掂數拎返比你嫁！」





未黎得切講多謝，我就醒咗，一起身望到我本紅色封面嘅筆記擺咗喺我張枱面中間。 而我前一晚好記得張枱都幾亂下，一起身彷彿有人幫我執過房一樣。我平時一向都鎖門訓覺，相信我屋企人若用鎖匙開門我一定會醒。 我當下心諗： 「玩到咁大？」 我行出房問我屋企人前一晚有冇入過我房，佢哋都異口同聲話冇，仲話前一晚唔知點解個人好攰，兩個好早就訓咗覺仲一覺訓天光，而我回想都同佢地一樣。然後我入返房拎本筆記比佢哋睇， 佢哋問返我點搵，我講返個夢出黎比佢哋聽，佢哋個樣都好難以置信。

當然搵返本野係開心事，畢竟都用咗好多時間先寫到。 但係因為呢一件事同我阿婆個句說話，我明白屋企唔淨只有我地一家三口嘅存在。 可能你會問，咁你阿婆呢？ 佢一直都喺祖屋到，佢唔喺係我屋企，至於點解外婆會幫到我或者邊個咁大整估？ 鍾意睇我故事嘅下次再同大家分享！