異世界重生，職業選地產霸權: 革命
革命
距離妖星來臨只餘下不到一個月，要革命成功阻止夏娃恐怕趕不及。幸好這次攻擊由我請求，或許我可以故意將攻擊打偏，收到阻嚇作用之餘又不會造成傷亡。
「早啊夏娃，」我一大早便去拜訪夏娃，向她提出我的地產霸權計劃︰「消滅哂其族之後，我打算將伊甸園擴展，令到成個女母都變成伊甸園，藍圖都已經有埋，首先
我會將現有伊甸園分四部份，分別係科技、經濟、藝術、生活，全部都會係走到最前，係呢個世界嘅指標；跟住再以伊甸園為中心，擴展到成個女母大陸都係咁分成四部份，實現伊甸園擴展計劃。」
夏娃聽到後非常滿意，這正好滿足了她滅四族統一女母獨大
的野心，也沒有多認真的看我預備的發展藍圖便決定放手讓我去實行，於是我便向她要了一班最強壯最聰明的葛族男士作為幫手，好讓這偉大的工程能順利進行。
這班人作為革命的主力部隊，我首先篩選出心腹，看看哪些人不甘成為女性的附庸，想不到第一個站出來的正是亞當，可是他作為夏娃身邊的男人，極有可能是間諜，所以我還要慢慢評估他，計劃暫時還不能告訴他。
「你哋仲有邊個覺得自己可以比起女性做得更多，而且做得更好？」我問，然後又有五個人站出來。
「你哋介紹吓自己，同埋講吓點解覺得自己更好。」我引導他們說出來，為自己增添自信。
「我叫亞伯拉罕，我認為自己唔只係日日耕田，我都可以去改造農作物嘅基因，令到生長週期更短。」紮了一條辮子的亞伯拉罕說。
接着，是光頭的彼得開腔︰「我叫彼得，我覺得自己大力過佢哋，可以勝任更高嘅職位，唔駛佢哋做咁多粗重嘢。」
然後，留着辮子頭的摩西也說︰「我係摩西，我都覺得我可以做養家打獵嗰個。」
「到我，我叫大衛，我認為我可以領導成個葛族變得更好，幫埋其他幾族一齊發展得更快。」滿臉雀斑的大衛說。
最後，滿臉鬍渣的挪亞說︰「我係挪亞，我覺得我聰明過哂其他人，可以擔正做發明嗰個，而唔係永遠做無關痛癢嘅助手。」
「好，多謝咁多位，今次呢個計劃，我打算畀你哋好好一展所長，你哋六個就係今次伊甸園擴展計劃嘅小隊長，我會分派唔同任務畀你哋，之後每日同我匯報進度。首先，我會同咁多位講返呢個計劃嘅目的同點樣做……」我把整個擴展計劃闡述了一次，但對創造父權社會則絕口不提，因為我要他們自我覺醒，而不是受我唆擺。
根據他們的特點，我指派了各種崗位給他們，主要是以發揮他們的長處為依歸，對建設伊甸園並無實際幫助，畢竟建設都是交由其他工人去做就可以，只要能根據我的設計圖去做就無問題。
就這樣，在我的刻意為之之下，這班男士的男權意識開始萌芽，漸漸覺得自己並不比女性差，甚至是能夠凌駕於她們，可是這意識始終是萌芽階段，幼苗是需要悉心照顧才能茁壯成長、長得茂盛，所以我在有意無意之間向他們灌輸一種想法︰在女性面前要保持風度，不要逞強，除非她們開口求助，否則絕不出手。
當然，我會暗自製造不同的機會令到葛族的女性要開口求助，向男士示弱，逐步摧毀她們自身的優越感，令她們意識到自己的不足，非依靠男士不可，這就是伊甸園擴展計劃的終極目的。
例如我刻意將不同的農作物放在同一車上，體積上一樣，但重量卻是平時的一倍
與此同時，我亦要與時間競賽，在四族攻擊妖星時製造反噬假象，攻擊無人之地。
在這樣爭分奪秒的情況之下，妖星來臨的時間只餘下三日，伊甸園的改造也已經完成了一半，而對男士的改造也接近完成，最少現在這班人已經認為新的伊甸園該由他們領導，女性應該退下來，餘下的就是教他們男女平等及令他們主動站出來爭取。
「夏娃，關於之前提到嘅攻擊，叫你整嘅偽裝整成點？」我問夏娃。
夏娃笑着回答︰「救世主大人嘅要求我哋已經做好，你可以嚟驗收。」
接着夏娃便帶我到軍工廠，現在的軍工廠跟石礦場無異，滿倉都是偽裝成石頭的飛彈。
「而家啲飛彈唔係流線型，受到嘅空氣阻力會大咗，噴射器嘅馬力都有根據我咁講改大咗？」我以防萬一，再次確認。
「當然，照你咁講，加大到兩倍。」夏娃微笑道。
「好，果然做到嘢，」我稱讚說︰「嚟緊嘅事就交畀我，一定做得好好睇睇，你哋到時留喺界就得，我搞掂先叫你哋過嚟收貨，不過你哋可唔可以幫我運咗出去先？」
「無問題，我哋會運出去你之前講嘅位置，不過呢批武器數量多同重，可唔可以請你班男士幫手？」夏娃謙恭的問。
我欣然同意，然後便命以彼得為首的男士用挪亞發明的縮小電筒，把武器輕鬆運送過去，同時這亦是夏娃首次因能力不足而提出請求，證明我過去這段時間做的事總算到能收割的階段。
終於萬事俱備，現在等東風來就能夠成事。
這夜，我舉着杯對一眾男士說︰「三日之後，就係你哋崛起之時，今日夏娃嘅請求已經係最好嘅訊號，我哋一齊為男士崛起而飲杯！」
「救世主大人，呢段時間真係多謝你嘅幫助，我代咁多位兄弟多謝你。」亞當代表眾人說，然後大伙都開心的把酒一飲而盡。
「喺呢一刻，我有最後一樣嘢要同你哋講。」我突然認真的說︰「縱使你哋真係成為領導人帶領葛族，但記住一樣好重要嘅事，就係男女平等。的確男性喺某啲能力上比女性強，但同樣地，女性都有比男性強嘅能力，而且男女雙方都有只有自己先能夠做到嘅事，所以記住一點︰唔好打壓，而係要發揮各自所長。每一個人都有可能做任何一件事，知人善任先係最好嘅方法，而且唔會因為內鬥而消耗自己資源，咁先可以一直強大。我只可以幫到你哋咁多，之後嘅發展就要睇你哋自己嘅造化。」
「唔係呀救世主大人，」亞伯拉罕站起來對我說︰「我哋都打算繼續跟住你嘅領導，我哋想你做葛族嘅領導人！」其餘的人也歡呼起鬨。
這正好如我所願，在他們起鬨了數分鐘後，我假意不好意思的接受了領袖一角，並對他們說了我一早準備好的講辭︰「真係多謝大家嘅器重，大家盛情難卻，我都唔好意思推，我會盡我所能去做，帶領大家有更進一步。伊甸園擴展計劃喺三日後會正式進行，而家嘅伊甸園都差唔多尾聲，剩低要做嘅就係令其他幾族嘅人都成為伊甸園嘅一員，之前同大家講嘅計劃，三日後就要進行，一切都已經就緒，光明嘅未來好快會蒞臨！」
我的演講結束後，接着發生的事我已經糢糊不清，只依稀記得有掌聲、歡呼聲，以及數之不盡的乾杯聲，翌日醒來已經日上三竿，他們已經工作去了。
「早晨，救世主大人，」亞當看見我醒來，立刻上前跟我匯報︰「四族已經準備好武器消滅妖星，我哋嘅佈置都已經完成，要攻擊嘅地點都已經瞄準咗，淨係差最後發射。」
此時我心生一計，對亞當說︰「將十六至二十號發射器對住佢哋五條村，我要將佢哋嘅村夷為平地。」
「但咁咪會造成好多人命傷亡？有違我哋初衷喎……」亞當表示懷疑。
我連忙堆砌歪理解釋︰「首先，佢哋原本嘅三條村已經無人住，炸平都唔會出人命，而且仲慳咗以後我哋建設嘅拆卸時間。其次，而家住滿哂人嘅兩條村，喺攻擊妖星嘅時候都唔會有好多人喺度，因為佢哋都會全民攻擊，無出動嘅都會喺村入面留意住，所以唔會有好大嘅人命傷亡。最後，我哋想佢哋成為伊甸園嘅一員，唔將佢哋啲舊嘢徹底清除，佢哋又點會走投無路而入嚟？」
亞當聽完我的歪理後意外地受落，沒有再多說話便依我意思去做，而我心底的終極原因──成為真正的地產霸權──則絕口不提。
「救世主大人，」此時，一把清脆的女聲從遠處傳來，此人正是夏娃，她滿臉笑容，容光煥發，整個人散發着青春陽光氣息，向我喊道︰「仲有兩日就到四族末日，我而家真係好興奮好開心，就快呢個女母就得返最完美嘅葛族人。」
「但咁真係好咩？」我衝口而出，然後連忙解釋︰「揾佢哋做奴隸，有人崇拜你哋，唔係仲爽咩？」
「科技已經可以取代哂，佢哋咁多人絕對係威脅。」夏娃肯定的說。
我沒有回答，夏娃也識趣的轉換話題︰「伊甸園改建得好好，全部都係我未想像過嘅建築，真係好神奇。」
「差唔多完工，等真正完工之後，你見到嘅成果會仲神奇。」我賣關子道。
夏娃似乎很滿意，開懷的回到界裏面去，而我也鬆了一口氣，誰知道如果她現在知道我的計劃，她會怎樣對付我？所以還是先斬後奏才是最佳辦法。