異世界重生，職業選地產霸權: 被消滅的真相
被消滅的真相
回到飛迅村，我立即找來三位族長問話，但想不到他們竟先問起我來。
「夏娃大人有無同你商量點樣消滅妖星？」
「夏娃大人對我哋咁多族有無咩指示？」
「夏娃大人對飛迅村有咩意見？」
「夏娃大人……」
他們三人你一言，我一語問了各式各樣的問題，我未及回答，於是我喊停了他們，嘗試一次過回答︰「夏娃其實乜都無提，淨係叫我留低，同埋講咗少少上次消滅妖星嘅故事，仲有一個震驚我嘅『事實』。首先我想問你哋一樣嘢，你哋要如實作答。」
待三位族長都點頭後，我便斬釘截鐵的問︰「你哋有無嘢瞞住我？」
面對我突如其來的一句，他們先是詫異，然後認真回想，最後一致回答︰「無。」
顯然我對他們的回答並不滿意，於是再問一次︰「我指係任何範疇嘅事，有無嘢瞞住我？」
這次他們想得再久一點，但答案還是一樣︰「無。」
既然他們不說出口，那麼唯有由我自己提出︰「我係咪永遠返唔到現世界，因為我已經喺現世界死咗？」
聽到我的問題後，他們沉默了，這種沉默不是因為不知如何回答我，而是那種做了虧心事被揭發後不知如何面對的沉默。雖然他們沒有親口回答，但由他們的身體語言我便能得知答案。
「好，第二個問題，死亡係咪真係唔係完結，而係另一個世界嘅開始？」我再問。
「係，咁多任救世主大人就係一個好例子。」瑪瑪露肯定的說。
魯啦也忍不住答︰「我哋女母人無一個會怕死亡，因為我哋知道死亡只意味住喺女母完結，唔代表我哋完結。」
「死就死，」曬仁鐵士也豁出去說︰「我哋試過用科技去過第二個世界，見返部份以前死咗嘅人。」
聽完他們的說話，我清楚夏娃所言屬實，我亦有了一個想法，但這要取決於他們之後的答案。
接着，我又問︰「咁你哋知唔知上任救世主消滅妖星嘅事？夏娃已經講咗佢知嘅我聽，而家差你哋。」
他們又沉默了，大概是認為我在騙他們說出不能說的秘密，於是我決定拋磚引玉，先告訴他們夏娃的版本，再引他們說出他們的版本。
「夏娃話當時妖星受到攻擊之後就產生咗好多個細嘅分身反擊，直接攻擊女母，令成個女母毀於一旦，死傷眾多。」我憶述。
「……」他們聽完都沒有作聲。
「連你哋咁崇拜嘅夏娃都講咗我聽，你哋仲要隱瞞？唔通你哋懷疑夏娃嘅判斷？」我故意用激將法刺激他們。
果然他們落疊了。
瑪瑪露語帶傷感的說︰「上任救世主攻擊妖星嗰次，我好清楚睇到。嗰次我記得係葛族首先帶頭攻擊，然後我哋咁多族再一齊用救世主大人畀我哋嘅武器幫手。」
曬仁鐵士接着說︰「無錯，我哋成個女母都全力進攻，但妖星絲毫無損，我好清楚見到啲攻擊係埋唔到妖星身，佢好似有保護罩咁擋哂。」
魯啦也開口說︰「擋住哂啲攻擊之後，妖星開始反擊，嗰時喺妖星上面傳嚟一聲巨響，之後成個女母都好光，乜都見唔到，直到我哋可以再睜開眼時，個天已經有好多妖星嘅分身飛緊落嚟，我哋完全避唔到，有好多人都死咗。」
「聽你哋咁講，即係啲攻擊係完全擊唔中妖星，即係嗰啲唔係佢被擊中而產生嘅碎片，咁唔通佢真係識反擊？」我充滿疑惑，嘗試用正常邏輯去解釋這件事︰「會唔會係其實唔係咩保護罩，只係佢同大氣層磨擦產生高熱，令到啲攻擊畀高温引爆咗？而啲分身只係妖星嘅碎片，啲攻擊雖然無直接擊中妖星，但爆炸造成嘅震波都傷到妖星嘅結構，令到佢有部份脫落變成隕石飛落嚟？」
「聽落又好似幾合乎科學理論，但真係咁簡單？嗰一聲爆炸同白光又點解釋？」曬仁鐵士有尋根究底的精神，果然是一名科學家。
「我唯一諗到一個原因，就係嗰個攻擊係同其他唔同，佢係核彈。」我想起很多電影的橋段，炸毀一顆隕石都是動用核彈。
「但係點解要剪咗呢段佢？」我的疑問又湧上來。
「我有另一個版本。」我身後又一次傳來啲悲的聲音，不知為甚麼，他很喜歡在我身後突然出現。
「攻擊妖星嗰時，妖星就喺我哋加本族頭頂，我好清楚見到啲攻擊全部都喺仲有一大段距離嘅時候就自爆，但個感覺係自己引爆，而唔係你哋所講嘅有保護罩，因為我清楚見到啲攻擊引爆嘅地方有近有遠。與其話啲攻擊係要消滅妖星，我覺得實際係用嚟改變妖星軌道更貼切。」啲悲分享自己所見及所想。
「改變佢軌道？」這個新的想法立即搶佔我的腦袋。
「我記得啲爆炸都係沿住一條隱形嘅向上軌道咁升上去，攻擊過後，粒妖星又真係好似有啲變向，不過一切嘅努力都畀最後嘅大爆炸所摧毀，爆炸嘅威力令到妖星去返原來嘅軌道，仲爆出咗好多分身攻擊女母。」啲悲有點失望的道。
「咁最後嘅攻擊係失誤？」我立即問。
啲悲搖搖頭，用氣音道︰「我覺得唔係。」
其餘三位族長與我同時「吓」了出來。
啲悲繼續用氣音說︰「我認為係有人特登咁做，目的係想妖星墜落女母，大家一齊死。」
啲悲的推測又令我有了新的疑問，我亦不吝嗇跟大家分享︰「會係邊個有攬炒呢個諗法？」
大家你眼望我眼，同時安靜了，這樣的沉默令我有點不安。
突然，他們像有了共識般，由瑪瑪露嚴肅的回答我，首先她對我作出警告︰「接住落嚟我講嘅嘢你聽完就算，唔好去查、唔好四圍講，得唔得？」
要是我敢說「不」，大概就聽不到他們四人隱瞞的真相，於是我二話不說、爽快的答︰「得，無問題。」
得到我的承諾保證後，瑪瑪露便放膽把被埋藏的真相說出來︰「嗰個最後嘅攻擊，係時任夏娃大人嘅命令，而佢係其中一任救世主同史拉族所生嘅後代……」
聽到這裏，我腦內零碎的碎片好像找到了膠水，全都能黏起來。
我大膽猜想︰「嗰時嘅夏娃想幫祖先報仇，唔想祖嘅遺物，即係粒妖星就咁無咗，或者直情想粒妖星撞落女母，完成祖遺願，所以見嗰時救世主個計劃竟然行得通，就用最後嘅核彈令到救世主全部努力都白費。至於嗰個救世主我估都凶多吉少，而條片跳格無咗啲嘢，估計就係無咗呢一段，因為條片流出嘅源頭就係伊甸園，夏娃想洗白自己埋藏真相，於是特登發佈後製過嘅片洗大家腦。」
「係，事情大致就好似救世主大人講咁樣。」瑪瑪露簡單總結。
「呢啲事應該得嗰個夏娃知，最多都係亞當知埋，點解你哋會知？」我好奇問。
瑪瑪露點點頭，續說︰「無錯，除咗夏娃大人，就係得亞當大人知，所以件事嘅始末係當時嘅亞當大人臨終前講畀我哋四族嘅族長知，佢仲警告個真相只可以傳畀繼任嘅族長，同埋各族長一致認可嘅救世主知。」
聽完事情的真相，我第一時間想到一個重要問題，於是問︰「而家嘅亞當同夏娃係邊族嘅血統？」
「而家夏娃大人係柯卡族，亞當大人係艾芙族。葛族規定每任嘅夏娃大人同亞當大人唔可以嚟自同一族，避免壟斷。」瑪瑪露回答，我聽完後立即放下了心頭大石。
「我聽完你哋講，諗到一個新嘅方法對付妖星。」我充滿信心的說︰「就算打到佢粉碎，佢嘅碎片散落女母都會引起好嚴重嘅傷亡，搏唔過。」
「咁可以點做？」魯啦問。
「我哋可以整條軌引導佢飛走。」我驕傲的答。
「好似前任救世主大人咁？」曬仁鐵士問。
我雙手交叉示意他猜錯了，然後拿起樹枝在地上邊畫邊說︰「我係想整條U型路軌，好似過山車咁，等妖星飛落條路軌度，再沿住路軌，用佢自身嘅速度飛返走，順便改變埋佢軌道。」
「好似好兒戲咁，真係行得通咩？」曬仁鐵士問。
「理論上係得，但實際上操作起嚟有啲難度，不過可以大家一齊度度。」我解釋道︰「首先妖星嘅軌道其實離女母好遠，呢條路軌要收到效果，就要起到上宇宙，基本上係無可能，建築技術要勁高超；再者，要計算埋佢嘅速度、角度、力度，係要超精密嘅科學計算，我覺得好難咁短時間做到；最後，呢個只係理論上可行，但實際上可能真係行唔通，會白忙一場。」
四位族長聽完後都面有難色，最後還是能言善道的啲悲先開腔︰「花咁多人力物力，最後可能係白忙一場，好似唔划算，而且啱啱聽你講嘅嘢我覺得都好難實現到，我建議都係再諗其他方法。」
有了第一聲反對，其他人也不怕發聲表達反對意見。
「我都認同，救世主大人你頭先講嘅嘢，你自己都覺得好難做到，你都懷疑個可行性，我諗都係再諗其他方法好啲。」魯啦說。
瑪瑪露也表達出自己的顧慮︰「假如真係成功做到，妖星真係會唔再返嚟？一日妖星仲存在，一日都仲係有威脅，直接消滅佢好啲，一了百了。」
曬仁鐵士作為科學家，心裏計算過各種數據、腦裏模擬過各種可能後，說出自己的見解︰「我認為成功嘅機會實在太低，難度太高，個計劃有好多嘢都遠超我哋能力，相反，毀滅佢反而仲容易。」
「既然大家都反對，咁我提議用另一個方法。」我話鋒一轉，又說出了第二個辦法︰「唔消滅佢，同佢共存，反正佢係永遠唔會跌落嚟，夏娃同我一樣都知呢個事實。你哋當係每七十五年一次嘅天文現象咪得，甚至可以搞個慶典，等大家一齊開心吓。」
聽到我的建議後，他們四人又交投接耳，最後還是推了瑪瑪露出來作為代表說︰「同妖星真係可以共存？每次佢嚟到都引起好多唔同災難，我之前都有同你講過，而且真係有人可以保證佢唔跌落嚟？我哋唔係懷疑救世主大人同夏娃大人，但我哋經歷過佢嘅恐怖……」
的確，我未經歷過這些事情，永遠也不會明白他們的恐懼，他們有PTSD也是合情合理，但我作為現世界人，清楚知道妖星，即哈雷慧星是永遠不會墜落地球，可是要怎樣才能說服他們？我真的想不到任何方法，只好將現世界的情況直接告訴他們。
「妖星係現世界都有，已經好幾百年，甚至更耐，但一直都無跌落嚟，而我哋都無人擔心跌落嚟呢個問題，因為大家都知唔會有呢個問題出現。更甚嘅係，隔七十幾年先嚟一次，好多人都無留意原來佢嚟咗同走咗，一樣如常生活。加上而家飛迅村係唔受影響嘅地方，建築又防哂天災，比你哋所想更安全。與其再杞人憂天，不如努力生活仲好。」我嘗試以鼓勵作結，但效果好像不太理想。
「如果你唔幫我哋，我哋會自己諗辦法。」瑪瑪露總結了他們的討論結果。
「所以我咪安排咗你哋嚟呢度住囉。」我沒好氣的說。
「我哋要消滅佢！」瑪瑪露重申他們的訴求。
「你哋咁想消滅佢的話，咁用上任救世主嘅方法，不過今次直接炸落去，等粒妖星粉碎做好多粒細嘅跌落女母，之後大家一齊祈禱唔好擊中自己。」我承認我是動怒了，但一言既出，於是便補充多一句︰「夏娃應該有上次攻擊嘅資料，你哋跟住設計圖就整到飛彈。」
說完我便頭也不回的離開了。