異世界重生，職業選地產霸權: 應許之地
應許之地
翌日出發前，我最後一次與啲悲討論，選好了地址，畫好了設計圖，留下了樂蒙和亞旺努當總工程師，之後便開始我與亞骨多它的的十日之旅。
我們依序拜訪了佐呼族、艾芙族和柯卡族，每到一個地方，他們都夾道歡迎我們，而且只要是我說的話，他們都很願意聽從，整個遊說過程異常順利，連我也有點意外。
當然，其中也有少數問題需要解決，當中佔最多數的問題是財產問題。他們離鄉別井到全新的地方居住，之前累積的財富和購入的房屋很難、甚至不能帶走，於是有部份人堅持不走，我只好祭出前所未有的大優惠，承諾他們的房屋能一換一，財產亦有銀行能存款，他們才願意跟着我們到應許之地。
不消七日，我們便帶着其他族的全部人一起回到鑊嘉村，而興建中的新村也已經有雛形，為了確保品質和趕上進度，我安頓好他們後便去協助建設，而各族的人也紛紛過來幫忙，結果新村比原定竣工之日早了兩天。
「多謝大家鼎力相助，呢條新村先可以咁快完成。呢條村係咁多族合作嘅證明，證明大家係可以共融，我想幫呢條村起個名去紀念呢件事，叫做飛迅村，大家覺得點？」我站在中央講台大聲說，台下的人都熱血沸騰，不斷叫好，不過只要是我說，他們的反應也是一樣。
我說完之後，作為地主的啲悲也上台演講︰「歡迎咁多位女母的人民，我代表加本族同史拉族歡迎你哋。以後呢度就係你哋嘅新家園，希望大家都吸收到前人經驗，可以好好相處。呢條村我哋都根據你哋各自嘅特性分開咗幾個部份，入面嘅設計同你哋本身住緊嘅近乎一致，盡量減少你哋思鄉嘅情緒，希望你哋可以住得開心。」
啲悲說完後，樂蒙和亞旺努以及亞骨多它分別帶着他們的部族到屬於自己的領地安頓，而我則領着艾芙族到他們的領地。
「救世主大人，」魯啦飛到我身旁悄悄的問︰「佢哋真係信得過？特別係史拉族，之前就係佢哋召喚妖星，我有啲擔心。」
我看着魯啦，十分明白他的恐懼，畢竟他們的身體最細少，在各族中是最弱的存在。以前大家各自畫地為王，要逃要躲也較容易，但現在全住在一起，而且還暴露了自身所在，要被攻擊也是輕而易舉之事。
我能做的便是給他信心，於是我微笑着對他說︰「放心，你哋喺度會好安全，而且呢班史拉族唔係以前嗰班，佢哋唔同哂㗎喇，所以唔駛擔心。」
的確，現在的史拉族都是由其他族人所變，而且絕大部份都是啲悲的奴隸，與以前有自主意識不同，所以危險性大減。同時，為免魯啦會引發恐慌，我故意省略了啲悲能把不同人變成史拉族的事。
「不過有一樣嘢千祈要記住，」我鄭重的對魯啦說︰「一定一定一定唔好喺鑊嘉村過夜，每日喺嗰面逗留唔可以超過四個鐘，呢個係之前同加本族族長啲悲嘅協議，違反咗就會被趕出飛迅村。」
此番說話我千叮萬囑樂蒙和亞骨多它要跟他們自己的族長說，而且還要瞞着啲悲進行。
走了若十分鐘，大家隱約嗅到一陣陣的花香。再多走約一分鐘，一個比艾芙庭園還絢麗、還繽紛、還龐大的花海便出現在大家的眼前。
「嘩！」現場的人立即嘩然，四處嘩聲四起，大家都被花海吸引，二話不說便飛到花海裏遊玩。
「大家邊玩邊聽我講，」我不打算打擾他們的雅興，但有些話我還是要說︰「呢度以後就係你哋嘅屋企，記住要好好愛惜。至於圍住花海嘅都好似之前咁係有屏障作用嘅住宅大廈，我會根據返之前嘅名單畀返單位你哋。你哋可以自由揀，如果有撞嘅同我講，我幫你哋解決。」
安頓好艾芙族後，我再逐一到柯卡族和佐呼族處看，一切都非常順利。
就在同一晚，我召集了三大族舉辦了一場洗塵宴賀他們新居入伙，雖然各族體型有異、習性不同，但都有講有笑，相處得非常融洽，這令我放下了心頭大石。
當晚，我找來了三族族長聚舊，促膝長談，討論了飛迅村的未來發展。
「你哋同啲族人滿唔滿意自己嘅領地？我參照返你哋之前嘅村設計，盡量還原同升級得更好。」我收集他們的意見，而他們都表示非常滿意。
「滿意就好。」我一臉滿足，然後又再問︰「我離開咗之後，你哋生活成點？」
「我哋族過得好太平，無再受到任何嘅威脅。經濟都好咗，多得救世主大人嘅石幣，我哋同其他族多咗交流，了解多咗，磨擦、誤解同芥蒂都無之前咁多，大家啲物資都物盡其用，發展都快咗。」瑪瑪露首先開腔稱讚。
曬仁鐵士也緊接着說︰「無錯，雖然我哋族用石幣時間最短，但係都好有感受。本身我哋都諗緊其他族係咪真係流通緊，點知去到艾芙族，佢哋都用緊，我哋啲商人買咗好多唔同嘅藥，又賣咗好多唔同嘅發明，大家都互相進步咗。」
「係啊係啊！」魯啦回應道︰「嗰次你哋第一次嚟，我哋仲嚇親，刑天仲幫手想趕佢哋走，不過經過一輪溝通，大家都無造成衝突，仲做咗好多生意，有石幣真係好。」
聽到他們的評語，我也老懷安慰，於是總結道︰「聽到你哋咁講我就放心，不過可惜刑天唔跟埋嚟，但都無辦法，佢有選擇嘅權利。以後你哋喺度都可以繼續用石幣交易，鑊嘉村嗰面我都會短時間將石幣打入佢哋市場，到時就方便好多。」
聽到我的承諾，他們三人也都放下心，於是我繼續說︰「平時無咩事都唔好行咁近鑊嘉村，要入村都唔好逗留多過四個鐘，否則後果不堪切想，呢個亦都係點解妖星消滅唔到嘅原因。」
「係因為加本族族長唔願意犧牲？」曬仁鐵士問。
「貪生怕死！」魯啦一面嫌棄。
「卑鄙小人、自私自利！」瑪瑪露也換上一副鄙視的面容。
我為免誤會加深，立即出言阻止他們無憑無據的猜測，並對他們說出真相︰「呢件事你哋三個族長知道就好，畢竟你哋係一族之長，應該有知情權，而且應該足夠成熟去面對同處理呢個情況。其實史拉族喺引發完女母亂戰之後已經被不斷驅逐、追殺，佢哋嘅文化同傳統都無哂，族長嘅責任同召喚魔法陣嘅方法都已經失傳，而家所見嘅史拉族人，已經唔再係真正嘅史拉族人，佢哋係中咗咀咒嘅啲悲係不能自控嘅情況之下將其他人變成嘅，預防辦法只有避！」
聽到我這番說話，三大族長都非常震驚，這是他們首次聽的事，但他們的着眼點竟然不是中了咀咒會使人變成史拉族。
「咁即係話妖星以後都會存在？」瑪瑪露抱着一絲我答「唔係」的希望問，但我只能以令她絕望的「係」來回答。
「咁叫我哋嚟呢度有咩用？死埋一齊温馨啲？」魯啦激動的問。
「妖星係永遠唔會墜落地面，因為呢粒係哈雷慧星，我哋現世界都有，軌道好穩定，無墜落嘅可能性。不過你哋話每次飛近都引起災難，所以我帶你哋定居喺度，係可以避開哂啲天災。」我試圖向他們解釋。
「荒謬！」可是他們並不接受，特別是魯啦，他生氣的回應︰「你作為救世主，竟然話粒妖星唔會墜落？明明佢每次都飛得近咗，連葛族都話今次會墜落，我哋點樣信你？」
「葛族話今次會墜落？無可能！葛族上次想打爆粒星但失敗咗，但條片好明顯有剪接過，究竟係咩一回事？曬仁鐵士你同我解釋清楚！」我趁着這機會問個明白。
瑪瑪露此時也忍不住發聲︰「我哋都唔好再瞞，向佢坦白好啲。」
瑪瑪露的勸說產生了效果，本身絕口不提、三緘其口的曬仁鐵士終於道出了真相︰「嗰次葛族表面上係想打碎粒妖星，但實際上係一次武力嘅展示，不過失敗咗……」
「失敗咗？但我睇條片係喺妖星上面爆炸㗎喎，點失敗？」我問。
「其實係喺半空就爆咗，有排都未到妖星，所以先要剪接，有嗰一秒嘅跳格。」曬仁鐵士解釋說。
「即係話其實從來無試過用科技打爆粒妖星，咁你哋又話唔可能？」我感到更加疑惑，繼續問︰「仲有，武力展示畀邊個睇？你哋咁多族都已經當佢神咁拜，仲有邊個會威脅到佢哋？」
「……」三位族長你眼望我眼，大家都沉默了，空氣一下子冷卻。
「呢度得我哋幾個，唔怕講喎。」我鼓勵他們道出真相。
「我咪講過，有啲嘢你唔知好過知。」身後傳來了啲悲的聲音，我猛然轉身，發覺啲悲就站在我身後一米處，我嚇得跳了起來，而三位族長也下意識的後退了一步，生怕被變成史拉族。
「人嚇人，嚇死人咩！你嚟呢度做咩？唔係講好咗你唔嚟得咩？」我故作強勢的質問他以免我驚魂未定的心情被其他人察覺到。
啲悲無視了我，整個人散發着很強的氣場，他看了其餘三位族長一眼後，冷笑着說︰「你哋唔駛咁驚，快極你哋都唔會一眨眼就變史拉族，我嚟都係揾救世主大人講幾句就走。」
被看穿了的三位族長即時心虛，試圖迴避啲悲的眼神，不敢與他有眼神接觸，倒是我冷靜下來後盯着他，頂着他的氣勢問︰「咁急揾我有咩事？」
「啱啱收到通知，葛族嘅人聽日會嚟，似乎係衝住呢座新起嘅飛迅村而嚟。」啲悲故意大聲說，好讓其餘三位族長也能聽得到。
「咁就好，聽日可以會一會佢哋，同佢哋當面傾傾。」我信心滿滿的說，但其餘三位族長卻瞪大雙眼，狀甚恐懼。
「葛族過嚟絕對唔係好事，你唔好咁不知天高地厚。」啲悲拋下最後一句便離開了。
我有點不解，於是問三位族長，但他們沒有回答，只是匆忙告辭，這次的洗塵宴亦結束了。