異世界重生，職業選地產霸權: 浴火重生
浴火重生
一日之內，飛翔城已經接近重建完成，只欠少量民居和公共設施尚未完工，但依今日進度來推測，只要多一個早上便能全部竣工。
「大家，如果間屋起好，今晚就可以返屋企瞓覺，感受吓磚屋嘅好，如果差少少未完成嘅，可以嚟街市過一晚先，有好多空間可以瞓。」我宅心仁厚的說。
豈料有趣的是，全部人也不打算回家睡覺，大夥都打算一起到街市過夜開派對。
「曬仁鐵士大人，」此時我感到身後有很強的怒氣，而民眾也高興的叫嚷︰「你醒返喇？我哋好擔心你，多謝你嘅設計，呢個新嘅飛翔城我哋好鍾意，而且有一樣嘢一定要你過嚟親手親眼去揭幕。」
曬仁鐵士看到群眾的熱情，立即把憤怒的樣子收起，露出慈祥的樣子融入到群眾當中，有說有笑。
「果然我無估錯。」我心想，然後會心微笑。
群眾擁着曬仁鐵士到城中心的水池前，着他把一塊蓋着高高建築物的布揭開，這東西並不在我規劃之內，而之前我也留意不到它的存在，我也是頭一遭看到它，所以我也十分好奇。
「要我揭開佢？」曬仁鐵士重複確認，民眾點頭齊心發出「嗯」的聲音。
「咁好喇。」他高興的用力一掀，一個四米高的曬仁鐵士雕像栩栩如生的出現在眼前。
「嘩！」他無修飾、發自真心的叫喊，想不到他們竟然會準備了一個雕像，頓時感激流涕，而人們則圍着他歡呼，我借勢上前飛到他耳邊耳語︰「點啊？我將啲功勞都畀哂你，係咪仲要咁嬲咁不滿先？」
他面紅耳赤，不發一言，默默看着自己的雕像和新的飛翔城，享受着群眾的歡呼，良久才回答︰「今次係你贏咗，我願賭服輸。」
我以勝利者的姿態笑了，對着他說︰「魔法陣其實真係唔需要，但你嘅幫手就真係好重要。見識過你哋嘅科技之後，我覺得妖星根本不足掛齒，有過百種方法可以解除佢嘅威脅。」
「唔可以用科技去解決妖星問題！」曬仁鐵士激動道︰「以前葛族已經試過，佢哋嘅科技比我哋仲先進，但佢哋都唔成功，而且仲承受咗好大嘅反噬，從此佢哋就告誡我哋千祈唔好咁做，我哋咁多族都好尊重佢哋嘅嘗試同犧牲，所以唔會重蹈覆轍。」
「係咩咁恐怖？佢哋嗰時係點做？」我忍不住追問。
「我都唔知，好耐之前，應該係上次妖星嚟嘅時候咁上下，嗰時我仲好細個，淨係記得有日葛族嗰面大爆炸，個程度係成個女母都見到聽到感受到，然後成個女母咁多族就一次過毀於一旦。」他憶述時仍然心有餘悸。
「咁誇張？咁勁嘅爆炸，你哋有無見到佢哋點攻擊粒妖星，然後粒妖星點反噬佢哋？咁大件事，應該有好多目擊者，好多人都睇到先係。」我好奇的追問。
他搖搖頭，沒精打采的答︰「可惜我哋無人見到，咁大件事，我都想作為其中一個見證者。」
「咁都真係幾可惜，但既然粒妖星真係咁難對付，而且大家都知淨係得魔法陣可以消滅佢，點解真係唔一早搞掂佢，而要拖呢？我真係諗唔明。」我始終不解。
「好多原因嘅，不過最少今次我會幫你，因為你真係令到佢哋滿意。」他微笑並向我伸出拳頭，我也伸出拳頭跟他碰拳。
在一片歡樂中，大家又在街市開了一次派對，慶祝曬仁鐵士和飛翔城浴火重生。派對直至天亮，我也不記得何時結束了，只知道翌日醒來，已經是日上三竿，飛翔城所有建設已經竣工，大家又開開心心的生活，科技變成輔助和提升生活質素的工具。
「救世主大人，你醒喇？」亞骨多它第一個迎接我。
「嗯，早晨，已經全部搞掂哂？」我想不到應該說甚麼，便隨口問。
「係，而家大家都好似之前咁，如常過生活，不過大家多咗交流，人人都開朗咗。」他以高興的語調回話，聽得出他是多麼的高興。
我看着飛翔城的人，的確面上多了一抹笑容，整座城感覺沒有以前般陰沉和死氣沉沉。
「不過大家都仲等緊你。」樂蒙不知從何走來，亞旺努也說︰「大家等緊你教街市同其他公共設施點用點運作。」
我被他們嚇了一跳，或許是因為柯卡族人太高大，已經習慣了抬頭向上望，對於身材矮小的佐呼族便自然的察覺不到。
好不容易調整好心情，便對他們說︰「以為你哋跟咗我咁耐會搞得掂㖭，咁我哋而家搞掂埋啲手尾佢，之後再向下個目的地進發。」
「幫我召集大家去城中心水池等。」我對亞骨多它說，之後又對樂蒙和亞旺努說︰「街市你哋好熟喇，交畀你哋教。」
對於我的委以重任，他倆既興奮又緊張，為了令他倆放心，我對他倆說︰「佢哋咩都唔識，你哋話係就係，無人知你哋啱定錯，最緊要淡定，放膽講啦！」
經過我的鼓勵之後，他倆的表現非常好，柯卡族各人也爭相想做檔主，可是由於檔位有限，最後還是以抽籤決定。
街市處理完後，便到我逐一介紹體育館、醫院、學校、泳池、運動場、公園、遊樂場和銀行。比較複雜的銀行之前已經教了，營運決定交由餐廳老闆負責；醫院交由亞骨多它管理，主要用它的醫療床來醫治病人；學校則交由曬仁鐵士管理，由他安排適合的人選去教授大眾，使柯卡族更先進；而餘下的都只是普通營運，分派了給有興趣的人去做，除了公園免費外，其他全部自負盈虧，大家都很滿意。
「好，介紹完又分配完，希望大家鍾意呢個全新嘅飛翔城，我哋喺度嘅使命告一段落，都喺時候走，大家後會有期。」我直接宣布離開的決定，因為妖星變得更接近了，但我還未邀得全部族長幫忙，所以要趕緊出發。
「救世主大人，我想跟埋你哋一齊去，我想喺你身上學多啲現世界嘅科技。」亞骨多它把我叫停，懇求我帶他一起上路。
「好呀，有你喺度應該會順利好多。」我爽快答應，但同時亦擔心曬仁鐵士會不滿，於是我們一起望向他，他簡單的點頭，用眼神示意批准，亞骨多它立即興奮得飛起來，沒錯，他是真的飛起了。
「咁你返去收拾行裝，我哋喺度等你揸飛碟嚟接我哋。」我說完，他便用傳點返回家，而我則跟曬仁鐵士交代最後的事。
「呢啲石幣，喺佐呼族同艾芙族都已經通行緊，暫時你哋可以同佢哋做住生意先，佢哋自己都已經做緊，而女母其他各族遲啲都一定會用石幣，我會令佢流通全女母，成為穩定幣。」我充滿信心的對曬仁鐵士說。
「但你哋真係要咁快走？既然你都知妖星係唔會墜落，點解仲執着要消滅佢呢？留喺度同我哋一齊生活都幾好，大家都好愛戴你。」他嘗試挽留。
我不識趣地拒絕了他，並向他解釋︰「妖星消唔消滅到其實唔係最重要，畢竟我知佢對女母影響其實有限，而且都幫咁多族做好哂防備，所以一啲都唔怕。之所以要消滅佢最主要係因為我應承咗人，想遵守承諾，同埋最重要係我想返現世界。」
「過往無一個返得到去現世界，點解你咁有信心？」他問。
「如果人無咗信念，仲點活下去？而且我相信佢哋返唔到去係因為未完成到嚟女母嘅使命，即係消滅妖星，所以只要我成功，咁就一定可以返到去。」我抬頭看着妖星，緊握拳頭道。
他聽到我的解釋後也再沒強行挽留，反而送上祝福︰「好，完全明白，我祝你順利消滅妖星，可以成功返到去，我一定會盡力幫你。」
此時，亞骨多它的飛碟飛到我們頭上，於是我便跟曬仁鐵士作最後道別︰「多謝你先，我都希望飛翔城係你帶領之下更加進步，亞骨多它都到，我哋係時候要走。」
「你等我一陣，我有啲嘢要畀你。」他到最後一刻還是要叫停我，就像老套的離別劇情一樣，只差未跑來擁着我。
他飛到家裏又再飛回來，手上拿着一個細小的裝置。他把裝置遞給我並說︰「呢個係我咁多年對妖星嘅記錄同預測，希望對你有幫助。」
我接過並道謝後，便與樂蒙和亞旺努乘上飛碟離開，飛翔城的眾人也歡送我們，只是他們很快便在我們眼皮底下消失。
「救世主大人，我哋下一站去邊？」亞骨多它問。
「好問題，我都無idea，一直以嚟我哋都係跟風咁行，無特別目的地，始終我哋都無地圖。」我答。
「Idea？咩意思？」他問，我才記起他們不懂英文，那粒萬言丹也是有限制的，只是之前好像又無出現過這問題。
「即係我都無諗法，隨緣，或者最近嘅係咩族？」我完全無頭緒。
他按了一個鍵，一張女母立體投影地圖便出現在駕駛座前，上面詳細標注了各種數據和地名。他撥了一下地圖，放大其中一個位置，然後指着問︰「應該加本族最近，係咪去嗰度？」
「好，就去嗰度，反正對我嚟講，最後邊度都係要去，所以分別不大。」我說完後，他便全速前進。
「係呢，」我把玩着曬仁鐵士給我的裝置，始終弄不明白，便問亞骨多它︰「呢個裝置應該點開嚟睇？」
「哦，呢個應該係容器七十，可以儲存七十腦力，只要將佢放喺額頭前，你就會睇到入面嘅記憶。」他解釋道。
「咁有趣？試下先。」我照着他的話做，果真在腦內突然多了關於妖星的資訊。我仔細閱讀這些資訊，當中發現了一個可疑的地方，發生在上一次妖星來襲，葛族攻擊妖星，被妖星反噬時的一段短時間內。
「點解粒哈雷慧星會有一秒跳咗位？」我心裏產生了很大的疑問︰「究竟件事真相係點？」
我反複重播這幾秒的片段，但都是毫無頭緒，唯一想到的解釋是片段經過加工。就在我陷入沉思的期間，亞骨多它突然說︰「我哋到咗喇。」
「咁快？我哋先啱啱出發。」亞旺努驚奇道。
「睇嚟識飛真係好方便，唔駛兜路。」樂蒙冷靜說，與亞旺努形成善明對比。
我聽到亞骨多它的說話後往外看，這個加本族的村莊非常精緻，房子都是四、五層高，類似村屋的設計，空間十足，而且顏色鮮豔有條理，明顯是有用心設計過。除了房屋外，其他的民生設施也一應俱全，跟現世界的基本無異。
「睇嚟加本族係最接近現世界嘅一個族，驟眼望根本一樣，希望佢哋肯幫手。」我自言自語道。
「我哋喺樹林嗰面降落，之後先入村，咁佢哋戒心會無咁大，而且架飛碟都無咁易畀人發現，容易啲收埋。」亞骨多它提議，我也贊成。
我們把飛碟藏好後，便準備入村。我們先由遠處觀看，加本族的村有點像圍村，有幅略比人高的牆把整條村包圍起來，而入口處有守衛看守，每隔數十米更有瞭望台隨時警戒着，守衛非常森嚴。
「有必要守衛咁森嚴咩？又唔係要打仗。」我吐槽着︰「不過原來加本族係史萊姆，難怪要咁多守衛，畢竟史萊姆都係最廢嘅存在。」
「廢？加本族一啲都唔廢，佢哋係最接近葛族嘅一族，雖然論體能比其他族都差好遠，但單憑轉數同口才，已經足以碾壓除咗葛族以外嘅其他族，甚至令到史拉族做咗佢哋嘅奴隸，即係而家守門口嗰啲。」樂蒙說出來時都語帶恭敬。
「聽講之前咁多族都想滅史拉族族，因為佢哋發起女母亂戰，仲召喚妖星，但就係靠當時加本族族長一個舌戰咁多族咁多人，最後拗贏哂全部人，令大家心甘情願放過史拉族，所以史拉族為咗報恩，從此就做咗佢哋嘅奴隸。」亞旺努補充道。
「原來係史拉族，之前瑪瑪露都無同我講得咁詳細，而家我終於知件事係邊個引起。」我終於解開了其中一個謎團。
我們在遠處再觀察了一會，還是未看到任何一個加本族人出現，只有史拉族不斷進進出出。
「我聽過一個傳聞，」亞骨多它神秘的說︰「加本族而家已經名存實亡，真正嘅加本族得返幾個人，其他嘅都係史拉族扮。」
「吓？真心咩？如果係咁真係大件事喎，缺少一個族就發動唔到魔法陣。」樂蒙慌張起來。
「咁咪消滅唔到妖星，拯救唔到女母？我哋全部都要死？唔可以畀呢樣嘢發生！」亞旺努亦恐懼起來，決意要阻止。
「冷靜啲先，傳聞啫，都無人證實到，可能只係有人服侍，自己可以足不出戶，所以先見唔到啫。」我嘗試把事情合理化，但明顯他倆並不買賬。
「好喇好喇，咁我哋一齊去驗證吓，睇吓個傳聞堅定流。」我沒有其他選擇，畢竟我也要請這兩族的族長幫忙。
於是，我們終於踏出樹林，豈料即時便有一枝箭插在我腳前五厘米處，接着便有一個大的史拉族人以時速一百公里滾過來，說了一句︰「你哋已經畀我一個人包圍住，鬼鬼祟祟咁，快啲束手就擒。」
「吓？」我表示疑惑，正想吐槽之際，「嘭」！他爆炸了，把自己炸成無數的小塊，有些甚至彈到我們身上，把我們黏住，而每一塊都有自己的意志，真正的把我們包圍了。
「我知你哋想講乜串我，而家咁就無話可說喇？」他怒火中燒，而聲音就像杜比全景聲般，非常震撼。
「冷靜啲，聽我解釋先……」我本想跟他說明我們的來意和經歷，怎料他一口拒絕︰「我無咩好同你哋講，有咩留返同啲悲講，帶走！」
於是他和他的分身便把我們押進村內的大牢，等待他口中的啲悲來臨。