異世界重生，職業選地產霸權: 通關佐呼村
通關佐呼村
全靠樂蒙和亞旺努連日趕工，足夠全村人住的二十間房子終於在兩日後全部建成，而街市和我的房子則合二為一，為村民騰出多一間房子，換言之，現在整條村已經有二十一間房子。
「首先，我要喺度多謝樂蒙同亞旺努呢幾日嘅努力同為條村嘅無私奉獻，終於大家都可以上到樓，唔駛再瞓山窿，唔駛驚飛牙、天空之淚同森林之氣，請大家畀啲掌聲佢哋。」說完我便帶領村民為他倆鼓掌。
「其次，我要多謝村長瑪瑪露畀我放手去做，無任何顧慮，仲無限量支持我，令我順利完成啲屋同錢，等大家可以現代化，麻煩畀大力啲嘅掌聲瑪瑪露。」我又帶領大家為瑪瑪露鼓掌。
「最後，我要多謝咁多位村民對我嘅信任，願意住我起嘅屋，用我整嘅錢，而且仲對我咁好，呵護備至，關心我慣唔慣呢度嘅生活，畀啲掌聲自己。」我再三帶領各人鼓掌。
「我希望我真係盡到救世主嘅責任，你哋嘅屋我會再諗吓點變得更好。另外我都想救到你哋，幫到你哋解決每七十五年一次嘅滅世，我諗應該係滅世啩，唔係都唔駛要救世主啦……」我尷尬了，突然才發覺，我一直都沒有問清楚每七十五年究竟會發生甚麼事。
「Anyway，一直以嚟嘅救世主都幫到大家，即係我go with the flow，自然乜事都會迎刃而解，係咪？」不知何時開始，我變得樂觀了，可能是我在這裏要風得風，要雨得雨，所以才覺得我有解決這事的能力。
然而，在我說完這段話後，在場眾人的臉都變得憂心忡忡，有的甚至像在額頭刻着前景堪虞四個字般，這詭異的氣氛把我也嚇怕了，我立即衝到瑪瑪露跟前問清楚︰「其實每七十五年女母呢度係發生咩事？前面咁多任救世主最後又點？全生奉獻咗畀女母即係點？」
「係全身，唔係全生。」瑪瑪露糾正我，接着開始將女母的歷史娓娓道來︰「代代相傳嘅歷史講，女母係由好多族共同組成嘅樂園，係千幾年前由神創造。本身大家都好開心咁一齊生活，但係可能咩都有，久而久之，我哋呢班祖先就想自己做埋神，於是一齊夾計殺咗佢取而代之。」
「殺神？咁夠薑？咁肯定係失敗收場，之後神離你哋而去，再每七十五年懲罰你哋一次，等你哋唔敢再諗呢啲嘢啦。」我自作聰明道。
瑪瑪露搖搖頭，繼續平靜的講下去︰「相反，佢哋好輕易咁就成功咗，仲維持咗一段幾百年和平同平等嘅蜜月期，我哋稱之為『平平無期』。呢段美好嘅日子直到大家再一次各懷鬼胎，引發戰爭先結束，畢竟每個人都想做最有權力嗰個。」
我專心側耳傾聽，這次不敢再自作聰明，以免再次出醜。至於瑪瑪露，她說到這裏也停了下來，舉頭望天，指着遠方天際，突然大聲說道︰「就係呢粒紅色妖星！就係嗰場『女母亂戰』有人召喚咗佢嚟，令到而家成個女母每七十五年就有一次危機！」
我順着她指的方向望去，發覺天空真的多了一夥紅色的星，是之前沒有的，不知何時冒出來。我緊張起來，慌忙問︰「就係佢？佢幾時出現㗎？仲有幾耐會到？我要點做？」
瑪瑪露平伏了心情，冷靜又冷酷的答︰「三個月，其他就交畀你諗，我哋咩方法都試過，最終都係無用，唯一可以做嘅就係匿埋喺地底。」
「咁即係解決唔到？」我已經六神無主，不知道該說甚麼好，只懂自言自語，不斷重複道︰「咁你哋召我過嚟做咩？我唔想死……」
「救世主大人！」村民突如其來的喊道，把我拉回現實。
「我哋信你，你一定可以救到我哋。」村民對我的期望越大，我的無力感就越重。
「不過，」此時瑪瑪露沉寂了一會後又再次開口︰「你做自己就得。既然你係被選中嘅人，就一定係有能力，只係你未發覺啫。之前歷任救世主都可以幫我哋順渡危機，只係做唔到永久解決啫。」
不知為甚麼，聽到瑪瑪露這樣說之後，我如釋重負，整個人也豁然開朗了，可是我還是要確認一次︰「你意思係咁多個救世主都無辦法解決問題，只係逃避問題？」
瑪瑪露點頭，我立即放下心頭大石，整個人軟坐在地，暗自竊笑，心裏想︰「咁都好啲，之前啲人都做唔到，咁我做唔到都好正常。」
「咁呢粒妖星嚟到嘅話，女母會有啲咩災難？」好奇心驅使下，我追問道。
「有好多，我都講唔哂，例如成個女母都會沉落水底、四圍有好多條龍肆虐，甚至有喺水底跑出嚟、天空會落火雨、女母會裂開、群獸會亂性等。」瑪瑪露沉重的說︰「我哋嘅村民全部都經歷過最少一次，每次我哋都做足準備，無咩人命傷亡。但上次妖星嚟到，我哋決定同救世主一齊對抗佢，可惜徒勞無功，最後救世主連同啲壯士都犧牲哂。」全體村民聽到這裏，眼睛都濕透，甚至有些直接哭了，氣氛很沉重，就像去了集體哀悼會現場。
「犧牲？」我聽到這個詞語後，剛放鬆的心情又再次繃緊，想逃避的念頭再一次浮現在腦海，但還是問多了一個問題︰「佢哋嗰時點對抗粒妖星？」
瑪瑪露不徐不疾的答道︰「佢哋嗰時準備咗好多你哋曉文族嘅先進武器，打算將妖星擊碎，點知最後都係無用。」
「用埋武器都搞唔掂？咁我實死無生㗎喎……」我盤算着各種可能性，但都想不到可以安全兼一定能毀滅妖星的方法。
或許瑪瑪露看到我擔心的表情，於是打圓場道︰「咁你又唔駛咁驚，你係我見咁多個救世主嚟講最聰明嗰個，我相信你可以做得到。」
經她這麼一說，我的信心彷彿再次建立起來，雖然這是毫無根據的信心，但她剛才說的天災，其實現世界也有，如果無推測錯誤的話，陸沉可能是真的整個大陸下沉，又可能是水位上升，即是大潮汐導致水浸，或者更嚴重的是海嘯；龍的肆虐，甚至在水中發生，或者是龍捲風和水龍捲；落火雨有機會是流星雨，妖星由外太空來，隕石部份剝落再跟大氣層磨擦造成流星雨絕對不出奇；大地裂開肯定是地震；群獸亂性大概是動物有感知天災的天賦，所以會亂竄逃避。
既然這一切都說得通，那便參考現世界的做法便可，只是此時我忽略了一個最危險、最能滅頂的可能性。
「其實，相傳有一個辦法可以消滅妖星。」瑪瑪露突然又語出驚人，我立即以表情完美傳譯了「咩話？」兩個字，她看到後也不打算再賣關子，直接了當的道︰「只要我哋咁多族嘅首領一齊完成一個魔法陣，咁就可以令妖星消失。」
「咁就易喇，點解仲唔一齊搞掂佢？」我不解的問。
「有好多原因，並唔係咁易，而且呢個方法都未經證實。」瑪瑪露面有難色，小聲得像自言自語︰「如果失敗咗，咁我哋就會白白犧牲。」
「咩話？」我完全聽不到。
「無事無事。」瑪瑪露立即展露笑容，對着我以萬分期待的眼神說︰「女母可唔可以從此無事就睇你喇。」語畢，他喚來樂蒙及亞旺努，他們拿着一個寶箱放到我面前。
「呢個箱入面嘅嘢係我哋全族為咗今次嘅救世主而準備，希望可以幫到你。」瑪瑪露衷心的說︰「另外佢哋兩個都會同你一齊踏上旅程拯救女母。」
有禮物還有旅伴，整個走向開始與動漫劇情無限接近，與我一開始的目標越走越遠。
「等陣先，我係諗住嚟做地產霸權，點解會變咗拯救世界？唔係咁啱喎。仲有，我喺呢條村仲有嘢未完成，未想咁快走住。」我突然清醒，回憶起初心。
「時間唔容許你再喺度逗留，你仲有好多地方要去，時間無多，我哋要靠你幫手徹底解決件事。」坦白說，瑪瑪露的語氣像命令多於懇求，不容我拒絕。
最後，我只能留下磚頭房子的設計圖和理念，由他們自行興建，然後便上路。
如是者，我在佐呼族的日子亦宣告結束，踏上與兩位佐呼族一起消滅妖星、拯救女母的旅程，而開寶箱所得的裝備，穿起上來真的很像飛雲呢！