(亂寫的) 短篇小故事: 短篇 42 《貓》

短篇 42 《貓》

用以下的字或同音字，寫一個故事，限時90分鐘。

食 sik6
穹 kung4
矛 maau4
亥 hoi6

////// 31 Oct 2024





粵拼：
亥 hoi6 害
食 sik6
穹 kung4 窮
矛 maau4 茅

終於開完 OT 放工喇！夜麻麻行返屋企，行行吓，忽然有一陣怪聲傳嚟。唔係呀嘛，農曆七月已經過咗，萬聖節都過埋⋯⋯

我冇理到繼續行啦，點知啲怪聲仲愈嚟愈近，愈嚟愈大聲。真係吖，你都咪話唔驚。





不過聽真啲，原來係貓叫。呀⋯⋯好彩，嚇得我吖。

但係再行多幾步，發現唔係好對路。喺前面一間鋪頭旁邊，有個細細地嘅紙皮箱，絕對有理由懷疑裡面有隻貓。

我行過去睇吓，真係有隻貓仔喺度！應該係出咗世幾個月，唔係好大隻。

頂你個肺吖！邊個喺度遺棄動物？唔想養都唔隨街掉啦，害 (hoi6) 人害物！

我踎低，伸手摸摸隻貓仔，變晒BB聲咁同佢講：「邊個掉你喺度㗎？咁陰公豬呀？」





我抱起咗貓仔，佢已經係咁𦧺我隻手，睇嚟佢好肚餓。想放返低佢，攞啲水俾佢飲，但係佢勁俾力捉住我隻手唔放，又用個頭係咁磨我手掌：「我冇錢㗎，你會唔會食 (sik6) 窮 (kung6) 我㗎？」

最後，我帶咗佢返屋企。

返到去即刻入廚房攞嘢俾佢食，放低佢喺我腳邊：「喺度等我陣呀。」

我打開廚櫃，拎咗個貓罐罐，確定咗冇過期，然後搵返個貓碗出嚟，洗乾淨。預備完嘢食同水，腳邊嘅貓仔已經唔知走咗去邊，我拎住兜食物行去出廚房搵佢。

原來佢爬咗上去已經有一排冇貓用過嘅貓塔度，坐喺度玩緊第一層、已經被貓玩到殘晒嘅貓抓板。佢有啲細粒，兩隻手仔要伸到好長，先夠高搲到塊板個頂。

我鼻哥突然酸咗一下，索咗兩吓鼻水，忍唔住嗌咗佢一聲：「喂！茅 (maau4) 躉王！」

貓仔同我對視咗兩秒，然後走過嚟。我坐低喺地下，放低咗貓碗。佢一路食，我就一路摸住佢細細又暖暖嘅貓背。





「多謝你返嚟陪我。」