[重寫版][校園驚悚]從前有個校長，佢禁錮咗全校人: Day 2f 重返2B

《李佑年視角》
11：30
留堂室位於新翼大樓的三樓，需要在走廊轉彎才能到達，比起課室更隱蔽，是一個不錯的避難所。在進課室前，Katie卻拉住了我。Jason站在門前，遲疑地看着我們，但Katie只揮揮手示意他先進去。

「我想你幫我一個忙。」她等房門完全關上後說。
「吓？」我驚訝地回望她「我幫唔到啲咩㗎喎，我只係個普通嘅藍卡咋。」

「我想你加入班會，幫我管理2B。」Katie看着剛發生混戰的走廊，真誠地說「阿朗拎到 【筋肉人】之後，已經無能力再勝任副主席一職。我需要有多個人幫我，一個企喺我呢邊嘅人。」

「但係⋯⋯」





「唔好睇而家風平浪靜，羅雨韋班人只要一有機會，就會興風作浪。」我不會用風平浪靜來形容現況，尤其我剛剛才殺了個人。

「但點解係我？即係咁，我哋同班咗成年，你應該睇得出我唔係啲咩領導嘅材料。我對呢班唯一嘅貢獻，只係年頭嘅壁報設計比賽，仲無贏到𠻹⋯⋯」

「如果要喺我哋班，揀一個我信任嘅人，就只有你一個。」

Katie堅定的眼神使我動搖了，也許我內心一直渴求得到其他人的賞識，得到一個證明自己的機會。

「小年，雖然我哋平時都無乜計傾，算唔上係朋友。不過我無忘記當我比人恰嘅時候，只有你會安慰我，只有你同我一樣咁憎羅雨韋。我相信你會做得好好，一個出色嘅副主席⋯⋯」





「呼！」一聲巨響，火光乍現，打斷了Katie的話。
三樓前梯的方向傳出慘叫，火焰灑落在雜物房門外，木門化為灰燼。雜物房跑出六七個著火的身影，奔往4A班。

「水呀，快啲攞水嚟！」
「唔好比佢哋入嚟！」

那幾個慘遭焚燒的男生無助地拍門，但4A的門已被裡面的同學緊閉，最終只能獲得活活燒死的下場。我能理解4A班的無情，假如他們真的開門救人，那幾個火人只會令課室的一切都燃燒起來。到時候死的就不只是七個人，而是三十人了。

無情，但明智。





「我哋幫唔到㗎啦，就算救到佢哋，都係得返半條命，無謂冒呢個險。」Katie說。
「咁我哋入返去先嚟，佢哋可能會引埋隻怪物過嚟。」我推開留堂室門，和Katie前後腳進去。

「外面發生咩事呀？」一進門，Jason便焦急地問我，他雙眼快速地掃視了我全身。是我錯覺嗎，怎麼他好像在檢查我有沒有受傷？

「唔知呀，我哋一見到火就決定入返嚟，以防萬一嘛。」我回答，Jason似乎鬆了口氣「話時話點解無啦啦會咁大火？仲要幾個人都燒著咗。」

「係趙正儀，佢嘅技能一定係同火有關。」站着窗邊的賢仔說。
「你點知㗎？」
「因為佢就企喺走廊囉。」

一個戴着眼鏡的女生，手中握着兩團火球，追捕着落跑的獵物，臉上掛上高傲的、瘋狂的笑容。
「佢哋唔係同班㗎咩？」Katie問。





趙正儀的目光落到我們身上，接着又望向其他班看戲的傢伙。
「唔想死嘅就唔好阻頭阻勢！」她警告一聲，火球被發射到那群男生身上，發出慘絕人寰的尖叫。

羅雨韋立刻把窗關上，隔絕外頭的行刑現場。
「我哋等外面平靜落嚟，先返去2B啦！」Katie宣布，不少人都點頭贊同。

14：06
等到三樓回歸太平時，已經是兩個小時後的事。趙正儀處決完她的同班同學以後，焦屍遍佈走廊的角落。其中一人差點就跑上後梯，但被Jason殺的那具屍體跘倒，不久就燒死了。

過了一會，正當我們打算起行時，青蛙又再度出現。牠一奔一跳來到三樓，拖走一具屍體，來回數次才清理好走廊。想不到怪物有收集屍體的癖好。

「大家準備好未？」我鼓起勇氣在全班面前大喊，心跳得比青蛙追殺時還要快。不出所料地，全班鴉雀無聲，只有Moon他們的零星回應。

在Katie的懇求下，我還是擔上了副主席一職，阿朗則心滿意足地退居二線。





「咁⋯⋯準備好就行啦。」每人至少分得一枝燃燒彈和一把武器，由最強壯的同學帶頭。
返回二樓的路程出其地順利，除了遠處的怪物叫聲以外，都相安無事。

來到熟悉的班房，終於可以鬆一口氣，有一種回到家的感覺。「學校是我家」這話是如此真實。

14：30
「好啦，大家一齊brainstorm下下一步嘅對策。而家我哋有足夠嘅物資，生存應該唔成問題。」Katie在教師桌前說。

「我覺得我哋應該出多次去。」Jason率先提議「要逃出呢度，條件係殺晒所有怪物，目前已知嘅只有曱甴同青蛙。我覺得揾到其餘三隻係目前最重要嘅目標！」

「但我哋人丁單薄喎……」文柔苦笑着，她身旁的May不知何故正處於崩潰狀態。
「除非我哋可以揾到其他班合作！」我頭頂燈泡一亮。「孤狼死，群狼生，只要搵到盟友，我哋嘅勝算就會大啲。」

「呢句係咪權力遊戲嘅對白嚟㗎？」
「但我哋應該搵邊個？」





此時，一下地動山搖，恰巧Katie的手機響起來。
「喂？」
「尹依琪⋯⋯救命⋯⋯滋滋滋⋯⋯」另一頭的人顯然信號接收得不太好。

「邊個嚟㗎？」我問。
「2A嘅主席，我哋上年同班。」Katie打開了speaker，臉露憂色。

「怪物喺一樓⋯⋯好多Form 1都死咗，我哋走唔到⋯⋯黃若然！」通話來到這裡便結束，他們到底在經歷甚麼。

2A是非常理想的結盟對象，在此事發生之前我們兩班關係友好，比賽時AB班同仇敵愾，一致對抗精英班，我也有不少舊同學在2A。

「仲等咩？我哋快啲落去救人！」阿朗急躁地站起來，走到門邊準備出去。
「咪痴線啦，家陣落去咪等於送死，制唔過！」羅雨韋抱着手搖頭道。





「乜你咁冷血㗎？」程紀靜也有朋友在2A，自然比自私自利的羅雨韋更積極。
「一早就知你係啲咁嘅人，胡基言死嗰陣⋯⋯」黃美娜挺身支持她的姊妹。

胡基言死的時候發生了什麼事，我聽不到，因為羅雨韋又一次起哄打架。程紀靜的追求者，以馮明軒Hinson為首，紛紛撲向羅雨韋，課室堪入一遍混亂。
「如果要同A班結盟，我哋而家就要去救人。」我拉着Katie和賢仔說，Moon正嫌事不夠多地吶喊助威。

「你對我哋班啲人嘅技能有幾了解？」賢仔問Katie。
「我知道狗公Hinson係紅卡，咸魚好似係個幾厲害嘅動物卡⋯⋯」
「打佢打佢！插佢眼，麥包你點做嘢㗎？」Moon站到桌上看戲。

「仲有阿朗同Jason，我聽文柔講May個技能好OP。」我提議。
「千祈唔好，亞馬遜太恐怖啦，一唔小心，死嘅就係我哋。」Katie連忙拒絕。
「大力啲窩佢魂精！⋯⋯」

「有冇嘢可以幫手？」Jason往我們探頭，看他樣子似乎花了一番功夫才脫離戰圈。
「唓，無銀用嘅。」Moon頹喪地從桌子上下來，她支持的麥包已經打輸了，現在被文柔和芯培合力拉走。

「你唔係打緊交㗎咩？」我指向後頭毆成一團的人群，幾個嘗試上前勸交的人都掛了彩，轉而加入混戰。
「我唔做啲咁小學雞嘅嘢。」Jason浮誇地翻白眼道「話時話，Katie你係時候控制場面。」

14：37
「大家冷靜啲！」Katie對着人群大喊，可惜沒人聽見。
「呯！」賢仔抬起椅子，敲往黑板發出巨響，成功吸引注意。

「唔該。」Katie耐着性子說「要贏呢個遊戲，我哋需要合作。唔單止係同其他班，更加要班內合作，所以唔該唔好再打啦！要打嘅就出外面打，唔好搞住其他人。」

再沒腦子的羅雨韋，一聽到要出去，立即知趣地停下手，這場架也宣告結束。
「Thank you。」Katie對他虛偽地點頭致意「2A班危在旦夕，我哋而家拖以援手，日後就會多一個朋友，少一個敵人。」

「今次嘅救援行動成功嘅話，唔止會多一個強大嘅聯盟，好彩嘅仲可以對怪物造成傷害，增加我哋贏面。所以我哋需要所有有能力嘅人出戰，藍卡黃卡嘅人留守班房。」我站出來說，雖然以前從未試過在全班面前演講，但這番說辭很自然就從我口中吐出，我甚至沒有尷尬的感覺。

「Katie，我同賢仔會留喺度hold場，你帶住其他人出去，一定要平安返嚟。」我堅定地看着Katie，又看一看Moon。

第一次，我如此確定自己要做的事。