急需二百萬個人俾錢我贖身: 【3】

【3】
 
部份同學待在體育儲物室，部份同學待在更衣室，部份同學待在自己的課室，部份同學待在圖書館，部份同學待在多元化活動室，部份同學選擇了洗手間。
 
至於小食部，想必是最多同學前往的地方，不過小食部裡面的食物不知何時已經清空，聽說是剛才那些「工作人員」拿走的。
 
至於我們的老師們，他們選擇回到教員室，不過教員室門外就聚集了一些同學，而且看來群情淘湧。
 
門內傳來一位老師篤定的語氣：「同學，你哋先返自己課室先，我哋而家要商討對策，我哋一定會全力以赴保護大家，對唔住我哋而家唔可以開門，因為我哋呢度容納唔到太多同學。你哋要記住，無論點都好，唔好用嗰支所謂顏料槍傷害其他同學，大家一定要堅持住，一陣我哋一定會出嚟指示大家。」
 




啪啪啪！
 
「開門呀！你哋係咪想唔理我哋呀？」
「貪生怕死！唔理學生生死！」
「枉為師表啦！」
「信錯你哋呀！」
 
「我再講一次！我保證！我保證一個鐘！喺一個鐘之內我哋會打開呢隻門！我哋需要時間商討對策！亦都需要一個安定嘅地方諗辦法同警方聯繫！」老師斬釘截鐵地重申，語氣加強再加強。
 
同學們面面相覷，似乎有點被信服。




 
我和陸欣怡也站在這群同學的一旁。
 
「你估佢哋一個鐘頭內係咪真係會開門？」陸欣怡疑惑地問。
 
「唔知道，或者會。」我聳聳肩說，「不過如果裡面嘅固網電話係可以打得通外面，而且可以同警方商討對策 ，佢哋的確唔可以受到太多人騷擾。」
 
「咁又真係照顧唔到咁多學生嘅。」陸欣怡明白事理地說。
 
我脫下了外套，然後圍在自己的頸，說：「要保護呢個疑似炸彈嘅頸環。」




 
「係喎，俾枝槍射中會死。」陸欣怡驚醒地說，連忙跟我一樣把外套圍在自己的頸。
 
其他同學看見又跟著我這樣做。
 
「走啦，我哋去第二個比較安全嘅地方。」我說。
 
「邊度？」陸欣怡問。
 
我和陸欣怡前往的地方是學校正口，正門旁邊站著兩個身穿黑色制服的工作人員，看來似是監視，但他們都不是直立不動的，偶然會轉轉身子，動作很有規律。他們雖然看見我們，但對我們不理不睬，彷彿把自己當成一個機械人。
 
「喂喂……」陸欣怡拉著我，「你想做咩？你想走呀？唔得㗎！真係會死人㗎！你都見到IG條屍㗎啦！你睇吓啦，連啲警察都唔敢入嚟呀！」
 
「你睇吓，啲警察喺我哋視線觸及嘅範圍。」我從門外望去對面馬路，在封鎖線後面有大批穿著重裝的機動步隊嚴陣戒備，並且注視著我們。
 




「妳唔覺得咁樣安全啲咩。」我在玻璃門邊盤腳坐下，面對面望向警方。
 
「吓？」陸欣怡環視四周，說，「呢個環境會唔會太開揚？」
 
雖然我從來不相信警察，但我不覺得其他同學會在警察面前搶奪物資甚至進行犯罪性傷害，這樣做或多或少都要衝破一些心理關口。
 
當然，我知道這不是長遠的策略，畢竟事件拖得越長，人心就越難測。
 
「呢個時候我哋應該要研究下我哋個背包裡面啲物資點用。」我打開背包，把裡面的東西取出。
 
陸欣怡蹲在我旁邊，望著我。
 
「做咩望住我？」我尷尬問。
 
「無呀，睇你個樣傻下傻下咁，但感覺你又好似有啲聰明咁。」陸欣怡摸摸我的頭說，「我可唔可以除低你嘅口罩，見吓你嘅真樣呀？」




 
「唔好。」我皺眉說，邊拿出一個手機，並轉移話題：「呢部手機應該可以上到會長所講嗰個贖金APP。」我按動開關。
 
這個APP的設計好像IG，裡面的朋友列表就是我全校所有同學。
 
「咦，好似已經有同學Post咗嘢，好快啊。」我驚嘆。
 
影片中是一位中一的女生，背景是某間課室：
「嗲哋媽咪，嗚嗚……你哋睇唔睇到我呀？我好掛住你哋呀……我好驚呀……」
 
影片只是短短一兩分鐘。這個貼文的張貼時間是三分鐘前，滑去下面還有數則貼文。
 
影片下方沒有任何可以給予Like的按鈕連結，只有一個寫住「投放贖金」的按鈕連結。於是，我按下去，裡面有數個付款方法，八達通、PayMe、轉數快等。
 
「咁……意思係咪全香港人都可以download呢個APP，然後投放贖金？」陸欣怡疑惑地問。




 
根本不需疑惑，肯定就是了。
 
我再按入去那位哭泣女生的個人檔案，看見這個女生的累積贖金是……三萬元……
 
「咁就收到三萬蚊……」我驚嘆又驚嘆。
 
「只要收到二百萬個三千，就可以離開……」陸欣怡望向玻璃門外。
 
我返回主頁，發現繼這女生後，開始有十幾個貼文與影片陸續放上。
 
看了好幾段直播，同學們除了藉此向父母報平安，還展現了各種淒淒慘慘的哀求，似乎抱持獲得贖金的希望。
 
「我哋係咪應該都要拍下片？」陸欣怡問。
 




「我見暫時都係得兩三個人會真係有少少贖金。」我悲觀地說，「睇嚟唔係喊下就咁容易籌得天文數字嘅贖金。」
 
「但我睇學生會短短時間已經賺到七萬幾蚊喇。」陸欣怡帶著讚嘆地說。
 
「佢哋搞咁多嘢，呢啲少少嘅錢都未圍返個本。」我抓抓頭。
 
「咁我哋而家可以做啲咩？」陸欣怡嘆氣地說，「唔通真係只有等……？」
 
「嗯……」我很難過，暫時未有更好的主意，唯有從背包裡面取出一個朱古力忌廉包來吃，我邊咀嚼邊說：「我哋嘅目標唔應該係籌款，而係諗辦法離開呢度。」我望著外面的警察，又望一下門邊的工作人員。
 
我們不應該順應綁匪。
我覺得……
 
「嗯……」陸欣怡沒有反駁我，只是若有所思地說，「唔知道其他同學喺度做緊咩呢？」

如果你喜歡我的作品，希望大家可以like我IG，謝謝。

https://www.instagram.com/soldieronpaper/