［搞笑］［打機］收錢幫人戒除網癮，幫到困咗喺遊戲世界: 三十五、塵埃

Reality入面只有兩個S級公會，其中一個就係Dust，另一個叫做鬥牛梗俱樂部。



數量咁少唔係因為啲人唔想做，而係做唔到。



成為S級公會嘅標準係比A級公會高好多，並唔係機械式打吓副本拎道具到一定數量就升到。







佢需要成員有極高嘅平均戰力，而且需要公會全員一齊打升級副本先成事。要集齊一班好打嘅人已經難，要佢哋乖乖哋聽話一齊打副本更加難，如果有人做到嘅話，咁佢實力一定唔低得去邊。



成為S級公會只係一個開始，入面嘅人要定期完成考核任務，如果唔係就會跌返落A級。當然，S級公會成員都享有唔同嘅特權，例如可以搶先買到未上市嘅道具，又或者入限定副本之類。呢啲特權聽落冇乜嘢，其實又真係冇咩特別，只不過S級公會嘅成員行出嚟感覺就係威啲，出面啲人點都俾返兩分薄面你。







連普通成員都咁自豪，可想而之Dust副會長一定更加白鴿眼。米餅對住我串串貢咁都好正常，因為佢身後有成個公會嘅人為佢撐腰，而我只係一個叫做好打少少嘅獨行俠。



Dust唔係開嚟聚埋一班想開開心心打機嘅人，佢地嘅目標只有一個，就係成為Reality最強嘅公會，而Dust內部都係好似一支軍隊咁有紀律。佢地只會收自己覺得勁嘅人，亦都會定期清走公會入面最低貢獻嘅人。



我而家冇咗蛇仔明呢個「靠山」，可想而知，Dust嘅人要對付我係易過借火。







平時我同Dust嘅大部分成員冇咩兩句，但同時亦都冇咩牙齒印，唯一一個對我有較多認識嘅人係佢哋會長。



大部分Dust成員唔知嘅係，佢哋會長係我嘅前女朋友兼前隊友Charlotte，喺遊戲入面佢叫做樂樂，同Dust呢個咁型嘅名唔多襯。



因為Charlotte同Dust嘅元老好friend，基本上咩都會講嗰種，正因為咁，佢哋都知我係樂樂前男友。



Dust嘅元老都好憎我，並唔單止係因為我同佢哋分手，更加係因為佢地知道我以前同Charlotte同隊嗰陣做過咩嘢。







簡單嚟講就係，我同佢當年係打槍game識，之後我哋拍拖，仲一齊打比賽，叫做有少少成就，本身打完香港呢邊嘅大賽有機會代表香港出戰世界賽，但係我為左填自己嘅賭債打假賽。



我知道打世界賽係佢嘅心願，我亦都知佢好想證明自己，但我望住自己銀行account，猶豫咗一陣都依然選擇接受對手教練嘅支票。



我仲好記得，我喺遊戲入面殺咗佢之後，佢係用咩表情望住我。







「B...話俾我聽你係唔小心打中我吖...」



我冇理佢，好快已經搵埋其他隊友出嚟逐一擊殺，呢吓佢已經冇得再呃自己話我係唔小心。



呢幾槍換咗50萬返嚟，夠還清我啲賭債有突，不過我嘅電競生涯就咁結束，因為唔會有人敢要一個公然打假賽嘅選手。



我同Charlotte都就咁玩完。







我同佢喺Reality入面都碰過面，但我哋兩個都好有默契，從來唔會同對方打招呼。



我都好少同人提起呢個故事，畢竟好難開口同人講起自己係個打假賽嘅廢柴。Charlotte雖然有同人講，但佢從來冇叫過人去找我悔氣，如果佢有嘅話，我應該係俾人由開game殺到閂game嗰個。



烏鴉同蛇仔明聽完呢個故事都只係拍拍我膊頭，叫我以後都咪再打搞人，佢哋兩個好少可咁有默契。