［搞笑］［打機］收錢幫人戒除網癮，幫到困咗喺遊戲世界: 三十一、戲法

愈打得耐，近戰巫女愈覺得蛇仔明冇乜攻擊性，佢嘅破綻多到可以死十幾次。

反而，呢個白痴嘅補師用緊好麻煩嘅防守魔法，冇咗呢啲魔法，蛇仔明只係扶唔上柄嘅爛泥。因為咁決定先解決Angel呢個咁難搞嘅補師，再搞掂蛇仔明。

視線一轉，只見佢全速衝向一邊嘅Angel。

咪住先，衝向一邊嘅Angel？

我而家睇緊嘅係Angel嘅視角喎，邊度嚟另一個Angel俾佢衝埋去啊？





喺呢個時候，我先明蛇仔明到底搞緊乜。

佢唔係白痴，反而心思細密咁安排咗場精彩絕倫嘅大戲。呢場大戲，人人以為演員只得兩位，其實足足有三位。

首先，我哋一直睇緊嘅確係真Angel嘅視角。

但在場人留意住嘅補師，一直都係假Angel。我本身都覺得奇怪，點解好似冇咩人留意我哋呢邊或者幫手打個掩護咁？原來係因為，佢哋一直睇到嘅補師都係假Angel，而佢哋留意嘅、支援嘅都係假Angel。

假Angel施法過程一直好高調，但實際上施法嘅人係隱咗形嘅真Angel。





近戰巫女嗅覺靈敏，兩位Angel事前都同時喺泥漿碌咗幾轉，所以唔怕俾巫女聞得出。蛇仔明嘅攻擊雖然好低質，但都成功令巫女分心，冇辦法冷靜審視佢眼見嘅嘢係真定假。

佢哋做呢場大戲，就係等緊巫女衝過去，放低防備，全力殺死手無寸鐵嘅補師。

巫女放下晒所有防備，打算打死手嘅時候，佢睇到令自己極度後悔嘅畫面。

呢個所謂補師喺白色法袍下收埋咗把長劍，仲好俐落咁將將佢一劍穿心。

呢個膽識，呢個攻擊手法。





係朗仔。

「你輸咗俾自己嘅自大同莽撞。」蛇仔明望住地下瀕死嘅近戰巫女，細細聲咁講咗一句。