［搞笑］［打機］收錢幫人戒除網癮，幫到困咗喺遊戲世界: 十九、白玫瑰

Angel同我哋分享佢嘅位置，我地嘅地圖上瞬間彈咗個白色交叉出嚟。由於我地幾個組咗一隊，所以我地喺地圖上係幾個紅色交叉。

「Jesus，係白色，係象徵純潔嘅白色。」

我哋就一路喺地圖睇住白色交叉慢慢咁接近我地幾個嘅紅色交叉，烏鴉話呢個係紅玫瑰同白玫瑰嘅浪漫邂逅，一諗到隊伍將會有可愛嘅女孩子加入，佢心情興奮到只係差在未練習求婚。

「邊個！」附近一個草叢有一個男人行出嚟，烏鴉即刻提高警覺，一嚟怕來者不善，二嚟慌死人地老笠咗佢素未謀面嘅天使。

「乜你地咁冇禮貌㗎，又係你地想Angel入隊嘅。」朗仔反一下白眼，將肌肉男拉近我哋。





係喎，佢遊戲個名叫Angel唔代表佢英文名叫Angel，而天使又唔一定係女人。

眼前男人相貌堂堂，身穿白色法袍，手執金色法杖，一身都係橫練既肌肉。拍埋佢隔離，我地幾個人嘅身型都相形見絀。

「天龍，唔好勞氣，我都知道好多人睇到我既遊戲名會有誤會。」Angel面容和善呢點都好符合佢全職補師嘅角色設定。

蛇仔明係側邊睇到入晒神，我一度以為佢係餓得太緊要所以想食人肉。

喺Reality入面，全職補師算係非常稀有，可能係因為補師唔夠「過癮」，佢嘅稀有徨度係，有人會俾錢全職補師一齊打副本。





Angel佢戰力唔算高，所以我冇喺排行榜上見過佢，不過聽佢講，喺隻game公測期間佢已經開始玩緊，而佢由一開始已經專攻補師嘅技能。

「Hello，好耐冇見。」Angel突然行近蛇仔明，想同佢握手。

在場另外三個人眼都突埋，因為我哋完全唔知蛇仔明原來識Angel。

「原來你叫Angel…我嗰陣都冇問清楚𠻹…哈哈…」同蛇仔明相識咁耐都冇見過佢露出咁尷尬嘅表情，佢就好似一個蜥蜴版嘅花季少女咁嬌羞。

蛇仔明好耐之前同我哋講過，佢有一次做任務俾一個補師救咗，不過個補師走得太快，所以完全冇機會搵返佢。





當年佢差少少就可以打贏隻boss，如果佢死咗，補師就算攻擊力低都可以補多一刀、坐享其成。不過，個補師選擇幫蛇仔明治療之後即刻走人。

蛇仔明淨係認得出件白色法袍。

上面用金色線繡咗一朵曼陀羅。