［搞笑］［打機］收錢幫人戒除網癮，幫到困咗喺遊戲世界: 十七、安樂死

雖然冇辦法登出，但玩家而家仍然可以登入遊戲，聽講登入遊戲時會有警示俾玩家，算係好人性化咁確保呢班勇者係自願登入遊戲。

仆街就仆街在，佢冇俾過登出呢個選項我哋。

但而家登入伴隨極大嘅風險，因為一登入遊戲就會俾系統自動傳送去入旺炎之森嘅隨機位置，分分鐘一登入就會俾紅玉龍發現。雖然係咁，但都仲有好多人選擇登入遊戲，大部分人係因為屋企人或者好朋友困左喺度先入嚟，得少部分人係因為貪玩先登入。

最特別嘅一少部分人係為咗自殺先登入。

自從電視新聞有報Reality發生嘅事之後，就有人睇上咗佢，但唔係作為一個遊戲，係作為一個自殺工具。





佢地之中，有啲人本身根本冇Reality嘅帳號，甚至連AR裝置都冇，佢地當咗Reality係安樂死裝置咁用，想無痛咁終結自己嘅一生。

一部分人喺遊戲入面自殺之後腦死亡，俾屋企人發現送院。一部分知道自己冇人理，登入之後喺旺炎之森漫步，渡過最後嘅時光，之後喺現實生活中斷水斷糧、真正步入死亡。

我唔想變睡王子，但我更加唔想坐以待斃。

遊戲入面嘅主城格露達有一個圖書館，入面既藏書好豐富。因為要搵唔同隱藏副本既位置，我成日去睇書搵線索，但點睇都只係冰山一角，因為書真係太多，多得有啲離譜。

如果我地想過呢關，要集齊更多人嘅力量反攻先有可能，靠我地幾個嘅力量係痴心妄想。以前過關或者可以只靠蠻力，因為死咗都仲可以重新嚟過，打到贏為止。但呢個情況下，如果想減低死亡率，一定要用腦。





我地嘗試梳理整合一下遊戲嘅資料，等我哋圍內大概知道之後會發生咩事，之後分享俾其他人睇。

呢個時候，共享筆記功能大派用場，因為我哋可以用佢分享資訊俾成個旺炎之森嘅玩家。