［搞笑］［打機］收錢幫人戒除網癮，幫到困咗喺遊戲世界: 九、巫女

「你今年小心啲。」眼前呢個𡃁仔竟然因為一件裝備恐嚇我，我當堂打咗個突。

「和氣生財、和氣生財。」

我控制角色對佢友善一笑，廢事喺度同佢開片，好戲一陣先上場。

喺呢個尷尬嘅時刻，雷嗚咁嘅鐘聲救咗我，示意我地呢堆喺後排既人都要開始向前，龍王怒睥我一下就跟住隊伍快快咁向前走。

我身處隊尾都唔心急，反正冇幾多人真係想衝到前排，好多都只係志在參與，拎活動參與獎，要去前排既人點都會順利去到。





途中，我見到好多排名靠前嘅玩家，好多都選擇以小隊形式出動，睇落對今次圍獵志在必得。

蛇仔明同烏鴉應該仲有一段時間先行到紅玉龍前面。因為佢地都算早出發，紅玉龍復活既時候，佢地應該飲頭啖湯，做頭幾個攻擊者。

身後有好多用白布蒙住眼、身穿日式巫女服裝嘅黑髮女人，佢地係活動限定NPC-紅玉巫女。

紅玉龍被視為其中一位象徵火嘅神祇，而紅玉巫女嘅設定係世代侍奉佢嘅巫女，所以紅玉龍祭以外既時間我地都唔會見到佢地，因為佢地住喺旺炎之森深處嘅神社入面，無時無刻都為紅玉龍嘅回歸作準備。

紅玉巫女一直唱我聽唔明嘅歌，雖然好煩，但玩家係唔可以攻擊紅玉巫女，如果攻擊佢，佢會除低白布，反一反你白眼，請你專心喺紅玉圍獵上面。





今年嘅巫女數量似乎比上年多左幾倍。

咁啱收到蛇仔明message，其他Snake嘅人係另外方向進入旺炎之森，都係見到隊尾有好多巫女。

就好似佢地包圍緊圍獵嘅參加者咁。

我冇心機再諗原因，諗住只係一個新彩蛋，打算專心做完單job好過。

行咗一段時間，終於到旺火之森深處，前面嘅人群無法阻止我見到紅玉龍龐大嘅身影，俾人打擾到睡眠既紅玉龍吐出陣陣龍息，高溫似係要燒著呢個森林，赤紅色既龍身好似烈焰咁，似係準備要將圍獵參加者燃燒殆盡。





好多法師喺呢個位已經停步，選擇一陣用遠程魔法攻擊，又或者治療佢地喺較前方嘅隊友。