［搞笑］［打機］收錢幫人戒除網癮，幫到困咗喺遊戲世界: 七、現實

一登出遊戲，裝置同Reality嘅連接立刻斷開，發現自己又急尿又肚餓。

未入game嘅時候，我地主要會見到主機既遊戲選擇介面同朋友欄。蛇仔明同烏鴉兩個人仲未訓，不過佢地都玩緊其他遊戲，睇黎佢地都想喺個job開始之前好好放鬆吓。

我嘅遊戲選擇介面塞滿形形色色嘅game，好多我都冇乜點玩，主要都係特價嗰陣貪平買嚟過吓手癮，但好多時上網睇完人玩我就會覺得自己玩咗，𣊬間再冇意慾玩。

因為太急尿，我再冇心情慢慢欣賞遊戲珍藏，只係用好快嘅速度除晒成套裝置再衝去廁所。

明明啱啱係遊戲入面已經開左餐，但飽足感一縷煙咁飄走左。而家個胃好似個銀包咁，係遊戲入面好滿，係現實世界就空空如也。





仲記得新一代VR遊戲面世嘅時候，我好唔習慣登出遊戲之後返到現實世界嗰種抽離感。

明明現時大部分VR online game入面嘅時間都同現實時間同步，但都會覺得好唔習慣。有時候甚至會覺得自己好似電影嗰啲時空穿越者咁，喺唔同世界左穿右插。

我嘅反應同自己仲係電競選手果陣比簡直差得遠，慶幸自己算好耐性研究Reality嘅地圖同打活動，又有好多以前識落既朋友轉晒去打Reality，而家我都算可以喺呢隻game「養老」。

我嗱唪聲屙完個尿就落左樓下快餐店買野食，之後再返屋企。

我喺office附近租咗層樓，入面冇擺任何遊戲機或者VR裝置，生活氣息算係重，朋友上到黎都話估我唔到。記得有次蛇仔明話我屋企睇落「好撚復古」，因為我影咗屋企啲木系裝修俾佢睇。





我發現當一樣好好玩既野變左工作之後，就算佢幾好玩都好，時間一長，你都唔會太想喺工時以外既時間接觸到呢樣野。

一個漢堡包餐唔使十五分鐘已經俾我鯨吞落肚。

血糖上腦，唔覺意喺梳化訓低左，睇嚟係用得太多腦。

以前細個連續打十個鐘機都仲精精神神，大個之後就冇呢支歌仔唱。

一起身已經係三點，龍王都就黎放學，準備返公司開波。