佛誕怪奇短篇 - 廢棄村落之浴「罰」節: （三十一）成功逃脫
阿棠和小雅兩人看着擋在前方的子晴，不敢輕舉妄動。
「過嚟呀，你哋夠膽就過嚟呀！」
此刻的子晴，手中握着小刀看着兩人，感覺就像是盯上獵物的野獸一樣，只要兩人稍為放鬆警惕，便會馬上撲過去。
「點算呀阿棠，我哋兜路行？」
「唔得，萬一我哋兜路搞到又蕩失路就煩。而且，啱啱地震完之後，本來仲見到紅色煙圈，但依家已經完全見唔到。我哋一遠離呢度，就可能再走唔到出去。」
「吓，啫係我哋無退路......點，點算好呀？」
阿棠思考了一會後，便在小雅耳邊說。
「你聽我講，唔好做任何反應。陣間我哋分左右兩邊衝過去，子晴應該會將你視為目標先，始終你力量上唔及我，但速度比我快，佢應該會想對付你先。等佢將注意力放喺你身上嘅時候，我會喺側邊將佢撲倒，到時你就乘機逃走！」
「吓，咁......」
「唔好咁大聲，佢會聽到！」
聽到阿棠的計劃後，小雅意識到這樣很大機會會危害到阿棠的性命，便忍不住大喊，幸好阿棠早預料到小雅的反應，及時制止了他。
「你兩個唔駛旨意走到出去，喺你哋過嚟嘅時候，我會用呢把刀割穿你哋嘅喉嚨！一秒，只需要一秒，我會將你哋血獻畀血尊，你哋嘅靈魂會永遠困喺牛屎湖村，永永遠遠都再離唔開呢度！」
子晴站在原地看着兩人，似乎並不打算主動出擊，大概認為這樣是抓住兩人的最好方式。
「小雅你聽我講，子晴暫時唔過嚟，但難保佢隨時會主動出擊，到時我哋完全無計劃下，可能會令到我哋兩個人都失救。與其係咁，我哋應該趁依家合力逃走，至少可以救返你。好彩嘅話，我可能仲可以等到你搵人返嚟救我。」
「但......但係，我都可以負責阻止子晴。」
「唔好傻啦，你頭先都感受到子晴力量有幾大，就算係我都可能係同佢差唔多。而且如果係講速度，你絕對快過我，成功逃走嘅機會點睇都係你大好多。總之你離開呢個樹林之後，有咁遠走咁遠，確保安全之後去搵人幫手，報警又好點都好。但記住，要過咗十二點先好搵人嚟，如果唔係搵人嚟都無意思。」
小雅聽罷，雖然理性上明白這是比較合理的安排，但他也知道，即使自己成功逃跑，再找人回來幫忙時，阿棠很有機會已遭遇不測。
「阿棠，我，我......」
「得啦，有咩事我哋離開咗再講啦，我無諗住犧牲自己嘅，你記得返嚟救我呀。準備啦，我數到三就跑。」
阿棠也不等小雅回應，說完後便開始倒數，大概是不想讓小雅想太多而妨礙了行動。
倒數聲過後，兩人馬上分開兩邊往子晴跑去。
「仲以為你哋想做啲咩，原來係想犧牲一個嚟救一個，發夢啦你哋，你哋唔可能走得出牛屎湖村，因為你哋都會死喺我手上。」
子晴拿着刀子，眼睛卻是盯着小雅，果然像阿棠說的一樣，他是以小雅為目標了嗎？
當兩人離子晴大概廿米左右，子晴果然開始往小雅方向跑過去，而小雅亦沒有停下腳步，他相信阿棠一定會阻止他。
「小雅，留低陪我啦！」
小雅聽到子晴的咆哮，害怕的感覺油然而生，就在兩人相隔不到十步，阿棠便從旁邊撞向子晴。
小雅看到這情況，心想計劃成功了，卻沒有想到阿棠會發出慘叫。
「你以為我唔知你想點咩？想犧牲自己救人？唔好咁天真啦！」
原來在阿棠撲向子晴的瞬間，子晴馬上轉身把握着的刀子刺向阿棠的腹部，那流暢的動作，大概是早已預料到阿棠的動作一樣。
「小雅，下個到你啦，我講過你哋兩個都唔駛旨意走！」
當子晴想抽回刀子，改為襲擊小雅的時候，他才發現阿棠的傷口沒有想像中的嚴重，而阿棠亦趁子晴鬆懈的瞬間，把他整個人緊緊抱住，制止他的行動。
「我都估到你會扮嘢㗎啦，我一早攝定啲嘢喺身度，好在頂得住啫。小雅你快啲走！」
「你個死肥仔，無理由，我明明有拮中皮肉嘅手感！你無可能無事！」
子晴其實並沒有說錯，雖然阿棠把背包中的衣物綁在身上，但其實未能完全防住子晴的刀子，只是阿棠身材夠胖，刀子才不至於傷到內臟，但痛楚和流的血量可不算少。
「我就係無事，小雅，快啲走！唔好嘥時間，只要你走得甩，出去再搵人幫手！」
「死肥仔放開我！小雅你唔係諗住見死不救呀？條肥仔被我拮傷咗，佢唔會捱到好耐！」
小雅聽着子晴的說話後，心態有所動搖。
「走呀！仲等咩呀！你唔走我哋兩個都會死㗎！快啲走！」
「你走呀，你走咗就係見死不救，你就係人渣敗類，你呢世都抬唔起頭做人！」
阿棠見小雅猶豫不決，內心焦急了起來，他知道如再讓子晴說下去，小雅只會更難做出決定。
於是他不顧自己腹部受傷，把力氣都用在壓制子晴身上，不讓他再說話。
「走呀！你再唔走我就真係死得不明不白㗎啦！快啲走呀！」
「我，我......」
「走呀！」
「我會返嚟救你，你要頂住呀！」
小雅用手抹掉眼角的淚水，終於下定決心逃走。
他一直往前跑，一直往前跑，終於，他成功離開了樹林，回到了原先雜草叢生的道路上。
然後他看到了，之前阿棠沿路上灑在地上的模型黏土，只要沿着這些黏土往回走，便能回到三椏村了。
「阿棠，等我返嚟。」