佛誕怪奇短篇 - 廢棄村落之浴「罰」節: （二十七）逃

「等我睇下先，呢邊！」
 
阿棠邊拉着小雅，邊四周觀察一輪後，又會拉着小雅前行，仿佛真的知道怎樣才能逃離這茂密的叢林。
 
兩人走了又走，走了又走，雖然仍然是在叢林中徘徊着，但他們都發現了，四周的叢林出現了變化，似乎真的有成功逃離的感覺。
 
「吁吁，吁吁，我頂唔順啦，我，我要抖一抖先。」
 
本來體力就不好的阿棠，加上剛剛在廟宇裡被子晴刺傷，又經歷了連串可怕的記憶體驗，體力早已到達極限，要不是求生慾戰勝了疲勞感，他早已一屁股坐下來休息了。
 




而在拉着小雅跑了一大段路後，也沒有感受到子晴有追上來的跡象，失去了那逼切的危機感後，換來的是體力透支的身體傳來的抗議。
 
「唉，叫咗你平時做下運動減下肥㗎啦。拎隻手嚟啦，仲流緊血呀。」
 
小雅嘴上雖然沒有甚麼好話，但還是明白阿棠剛剛救了他的事實，而且兩人本來也認識了好一陣子，之前因坤達的事吵架的二人，此刻已放下了心中的芥蒂。
 
「哇頂，一停落嚟先覺得痛，如果唔係應承咗你哋，我都唔駛搞成咁，淨係今日已經等於我做咗一年嘅運動。」
 
「你本來就應該做下運動㗎啦。同埋咩叫應承我哋啫，你係見子晴佢......」
 




小雅提到子晴的瞬間，想到剛剛子晴追殺二人的模樣，話便說不出口。而阿棠聽到後，臉上亦濛上了一層陰霾，不知如何應對。
 
「肥棠，你覺得，子晴係咪有心引我哋過嚟？」
 
過了良久，小雅忍不住把心中所想說出來，在他心底，還是希望子晴並非出於自願，甚至希望這一切只是一場夢。
 
「你頭先都睇到，子晴唔單止想殺我哋，而且佢仲係殺唔死嘅怪......怪物。」
 
這事實由阿棠的嘴裡說出來後，小雅長長地嘆了一口氣，他總算能徹底放棄心裡的幻想。
 




「唉，好啦好啦，我知啦！係我唔想承認子晴係怪物啫，但依家都唔到我唔承認，打起精神趙詩雅！」
 
小雅拍了拍自己臉頰，為自己打氣，但這舉動卻嚇得阿棠站起來制止他。
 
「喂，你傻咗咩咁大聲！子晴佢仲追殺緊我哋㗎！」
 
「吓？應，應該無事啩。」
 
小雅馬上壓低聲線，緊張地看了看四周，沒有發現任何動靜後，才又放心下來。
 
「算啦，我都休息到差唔多，我哋繼續行啦，我都唔知仲有幾耐先出得返去。」
 
阿棠雖然明知道自己的體力還沒有恢復，但內心的不安一直在告誡着他，要盡快離開這裡。
 
然後兩人再次行動，靠着阿棠帶領方向繼續前行。




 
「係喎肥棠，點解你會話你識路走返出去嘅？呢度無論我點睇都係一模一樣。」
 
「我都唔係好知點解釋，總之就係喺燒毀咗塊布幕之後，呢條牛屎湖村發生過嘅慘劇好似走馬燈咁喺我腦入面播放咗一次。呢條村做嘅所有嘢都係為咗佢哋口中嘅血尊，因為祭祀血尊已死去嘅人，無辧法回歸自然，靈魂被佢哋封印咗喺布幕入面，當布幕燒毀，入面嘅靈魂除咗復仇，就係希望我可以徹底中斷牛屎湖村咁多年嚟嘅儀式。」
 
「吓？憑我哋點樣破壞維持咗咁多年嘅儀式？」
 
「只要過咗佛誕，我哋再返嚟將佢哋嘅骸骨起返出嚟，再將寺廟燒毀，就可以破壞祭祀血尊嘅儀式。為咗終結呢一切，佢哋願意幫助我逃離呢個鬼地方。你望下三點鐘方向，見唔見到有一團紅色嘅煙圈？」
 
「吓？咩煙圈？我淨係見到黑媽媽嘅樹林。」
 
「果然，係得我先睇到。大概，被殺害嘅靈魂就係用呢種方法，去引導我離開呢度。雖然唔知仲有幾遠，但周圍嘅景色的確係有改變，我相信好快可以離開呢度。嚟啦，我哋繼續行啦。」
 
阿棠往三點鐘方向繼續前行，在身後的小雅卻突然大喊並用力把阿棠往後拉了一把。
 




「肥棠小心！」
 
阿棠還沒來得及詢問，便看到子晴從大樹背後向下揮下利刃，要不是小雅及時出手，阿棠應該已被子晴砍中頭部了。
 
「你哋唔駛旨意走，無人可以破壞我哋條村嘅儀式！血尊係至高無上嘅存在，我唔會畀你哋破壞呢一切！」
 
面對來勢洶洶的子晴，兩人只能慢慢後退，雙眼絲毫不敢從子晴身上離開。
 
但子晴沒有任何行動，只是站在原地用兇悍的眼神看着二人。
 
「點算呀阿棠？」
 
「我頭先已經試過四圍睇下仲有無其他紅色煙圈，可惜乜都見唔到。我哋只能夠強行衝過去。」
 
「吓？點，點衝呀？子晴擋住咗條路喎。」




 
「佢一定知道嗰度就係出路，所以先企喺度郁都唔郁等我哋過去。既然係咁我哋......」
 
阿棠低聲向小雅進行說明，小雅雖然面露難色，但還是點了點頭。
 
「你兩個無論做咩都好，都唔可能離開呢度！」
 
「咁要試過先知啦，小雅，準備好啦嘛！我數到三就行動。」
 
阿棠和小雅均露出了拼命的神情，看來是要放手一搏了。