佛誕怪奇短篇 - 廢棄村落之浴「罰」節: （二十五）子晴的真面目
從裙袋裡拿出小刀後，子晴一步一步的走近小雅。
「子晴，點解你要咁做？我哋唔係朋友咩？」
「小雅，我一直都當你係朋友，但無辦法，我已經二十歲，我有義務主動去守護我哋嘅傳統。」
「咩義務？咩傳統？我唔明你講咩。你到底要守護啲咩呀！」
「守護啲咩？其實我都唔知，我只係知道，我哋族群已經守護咗呢個傳統好幾百年，我哋曾經反抗過，但無用，我哋已經係出賣咗自己嘅靈魂，要生存，就要繼續守護呢個傳統。」
「子晴，我啱啱識你嗰陣，你係一個好顧及其他人心情嘅人，你唔會因為啲咩傳統而去害你身邊嘅朋友。」
小雅邊往退邊勸說子晴，大概，在他心底裡，仍然認為子晴是他認識的那樣，可以用言語去溝通，並且互相理解。
「哈，哈哈，你以為自己好清楚我嘅為人咩？呢個世界每個人都係戴住面具做人，你真係以為同我去過幾次街，傾過幾次計，就真係了解我嘅為人咩？」
「我只係相信同你一齊嘅經歷，唔會全部都係假。」
「真好，我真係好羡慕你，咁天真，又咁單純。不過都係嘅，對你哋嚟講，每日最擔心嘅係，身邊有啲咩八卦，自己鍾意嘅男仔點睇自己。但對我嚟講，我無將來，我都想好似普通人咁生活，不過，呢個只係我嘅奢望。」
「唔會㗎，無論發生咩事，你都有權選擇，你可以選擇唔去理嗰啲咩傳統。如果你怕自己一個人做唔到，我可以幫你，肥棠，坤達，仲有好多好多人都可以幫你。」
聽到這裡的子晴，停下了逼近小雅的步伐，臉上露出了鄙視的笑容。
「幫？你連我經歷緊嘅係咩都唔知，仲話想幫我？」
「你講出嚟，我可以幫手，無嘢係解決唔到㗎。」
「無嘢係解決唔到？哈，果然係過住幸福生活嘅大小姐。你話想幫我，我就畀啲嘢你睇。」
子晴邊說邊舉起手上的小刀。
「你想做咩呀？」
小雅在驚訝的同時，子晴的小刀已然揮下，只是揮下的對象並非小雅，而是子晴自己的手腕。
被利刃劃過的手腕，鮮血大量的湧出，大概是割破了動脈吧。
「你做咩呀？快啲止血啦，唔係你會......」
小雅本來還在擔心子晴的傷勢，但眼前的光景，只令他感到無比的驚訝。
那些大量湧出的鮮血，落在地上後，本應會把地板染紅才對，但那些血液，像是被甚麼吸收了一樣，一滴也沒有浪費到地板上。
另外，子晴手腕上的傷口，正以肉眼可見的速度復原，不消一會，手腕已不再流血，最後甚至連疤痕也沒有留下。
「你睇到啦，我根本就唔係正常人，你見到咁，你仲會想幫我咩。」
小雅還沒有從驚訝中恢復過來，只能呆呆地看着子晴。
「每年嘅佛誕前後，我都會變成咁嘅體質，目的係確保可以提供足夠嘅血液畀『血尊』，但咁樣並唔足夠，村民嘅血液只係為咗維持血尊嘅存在，要令到血尊成長，我哋每年都要獻上其他人嘅血液，最少三人份嘅血液，先可以滿足到血尊嘅需求。如果我哋某一年無辦法獻上血液，我哋身上就會被刻上無法磨滅嘅烙印。」
子晴說完後，拉開了上衣露出了裹上了繃帶肚皮，然後把肚皮上的繃帶撕開後，能看到肚皮上有着很多個有着憤怒形象的佛像，佛像的位置正在淌血，好像佛像在流着血淚一樣。
「呢啲烙印，只要刻印咗上去就抹唔走，我只可以諗辦法遮住佢哋。而最可怕係，只要某年失敗咗，我哋就要經歷一整年嘅折磨。呢種長期被火燒嘅感覺會一直提醒你，要去尋找適合嘅獵物，如果唔係，下一年就又要經歷更慘痛嘅教訓。」
小雅雖然能夠聽懂子晴的一字一語，但實在無法理解在子晴身上發生的事。
「子晴，你要守護嘅到底係啲咩？仲有，你到底係咩人？」
「我唔知道，我唔知道到底守護緊嘅係咩，呢個守護嘅傳統已經幾百年，已經無人知呢件事點解會咁，亦唔知係點樣發生，再者，我亦都唔想知道。我只知道如果失敗咗，我就會經歷痛苦嘅一年。而要令呢種痛苦消失，我只能夠帶足夠嘅人嚟，作為供品奉獻畀血尊，完成以血浴佛嘅儀式。我，我只係一個嚮往平凡嘅人，我都想過啲正常嘅生活，但我作為牛屎湖村嘅後代，似乎平凡，唔會屬於我。」
「所以，我、肥棠同坤達，就係因為你，所以先會嚟到呢度？」
「當然，正當我猶豫緊今年要搵咩人嚟嘅時候，咁啱就撞正你哋幾個，估唔到之前Andy上當，依家又到佢阿哥，有啲嘢真係整定。」
「咩話？所以，Andy條片，係你放上網嘅？你對Andy佢哋做咗啲咩？」
「係，條片係我放上網。至於做咗啲咩，就等你嚟親身體驗下。時間就到啦，無論你哋點樣掙扎，只要時間到，就無人走得甩。到時嘅痛苦，係你想像唔到咁痛，倒不如趁依家，等我幫你解脫，等你可以承受少啲嘅痛苦。」
子晴說完後，便拿着刀子朝小雅方向前進。
「你走開！」
小雅隨手撿起了地上的木棒，朝子晴的頭部扔了過去，子晴沒有避開，響起了清脆的「啪」一聲，額頭處馬上流出鮮紅的血液。
然而，子晴好像沒有感受到痛楚一樣，即使血在流淌，他仍然繼續向小雅走去，而他頭上的傷口，亦在步行時快速癒合。
「無用㗎，只要依家仲係佛誕，你嘅抵抗就係徒勞，無人可以傷害到我哋，除咗血尊！」
子晴一步一步向小雅逼近，小雅要遭毒手了嗎？