佛誕怪奇短篇 - 廢棄村落之浴「罰」節: （二十三）過去的牛屎湖村（終）

顯現在坤達眼前的白煙，雖然沒有實體，但坤達可不會弄錯，這個和他一起成長，陪伴多年的弟弟模樣。
 
「細佬，我終於，終於都見到你啦。」
 
坤達邊哭邊走向眼前的那團白煙，伸出雙手希望擁抱的結果，是完美地穿過了那團白煙。
 
白煙在坤達越過後往周遭散開，隨後再一次匯聚形成人的模樣。
 
「點解，點解我連攬下你都做唔到，點解！」
 




回頭看着那團再次凝聚起來的白煙，坤達知道自己只能看着，但始終無法觸碰得到他的弟弟，內心五味雜陳的他，忍不住抬頭對天怒吼，以渲洩心中的不快。
 
把滿腔的抑鬱都喊出來後，坤達總算稍為冷靜了一點，他再次看着眼前的白煙，心中有萬千種想法，卻無法以言語表達出來。
 
「細佬，細佬，呢個，真係你嚟？」
 
仿佛為了回應坤達的提問，白煙點了點頭。
 
「果然係你，我唔可能認錯，你......你好嗎？」
 




坤達把情緒壓下，但始終無法把心中的問題說出來，他不想接受自己弟弟已經離世的事實。
 
白煙大概也察覺到這不是坤達真正想知道的事，於是便利用白煙，勉強地刻劃出以下的文字。
 
「我」「不」「在」「了」「謝」「謝」「你」「來」「找」「我」
 
「對唔住，對唔住，我依家先嚟搵你，我試咗好多方法，搵咗好多地方，但就係無辦法搵到任何關於你嘅線索，對唔住，對唔住呀。」
 
看到自己弟弟的話語，本來被強行壓下去的情緒再被觸動，淚水又忍不住從眼眶冒了出來。
 




「不」「要」「哭」
 
「對唔住，對唔住......」
 
不知道哭了多久，坤達的眼淚才總算止住了。
 
「唔得，我要帶你走，我要帶你走。你嘅遺體喺邊？我要帶你返去，我唔可以留你一個人喺呢度。」
 
聽到這個問題，本應無法展現感情的白煙，仿佛臉上露出了悲傷的感覺。
 
「你」「找」「不」「到」「我」「的」
 
「點解？點解？我可以，我會搵到你，我咁辛苦嚟到呢度，我一定會搵到你。」
 
「危」「險」「快」「跑」




 
「危險？到底發生咩事，當日發生咗咩事？」
 
「危」「險」「快」「跑」
 
「你唔講發生咩事我係唔會走！如果我呢一刻就咁走咗去，我一定會後悔！求下你，話畀我我知發生咩事？到底你當日發生咩事？」
 
坤達似乎鐵定了心，一定要弄清楚事情的真相才願意離開。而白煙似乎變得緊張起來，無法好好刻劃出清楚的文字。
 
就在此時，白煙突然冒出了一陣強光，本來還是白濛濛的煙霧，在強光過後，白煙變得實在起來，展現出Andy的樣貌。
 
「咦？我，我講到嘢啦？」
 
「細佬！你，你無事啦？」
 




坤達看到白煙的變化，以為弟弟恢復正常，忍不住再次上前擁抱，可惜的是，他的期望再一次落空了，他還是無法緊緊抱着自己的弟弟，只能空虛地穿過了他的身影。
 
「哥，人鬼殊途，你唔會掂到我㗎啦。」
 
「對唔住，對唔住，我唔應該畀你去拍youtube，我唔應該幫你搵埋晒啲奇怪題材，如果唔係我，你唔會搞成咁，對唔住！」
 
「唔關你事，哥，你只係想幫我，呢啲嘢無人想。如果唔係你，我都唔會有辦法拍到咁多條片出嚟，嗰陣嘅我好開心，我無怪過你，你都唔好怪自己。」
 
「對唔住，對唔住。」
 
「哥，真係唔關你事，你唔好再怪自己。」
 
坤達明白，自己再說甚麼，也改變不了已經發生的事，而親耳聽到弟弟的話語，也令他心裡舒暢了一點。
 
「多謝你，既然我改變唔到發生嘅事，我可以做嘅，就係帶你離開呢度。」




 
「無用㗎，你無辦法帶我走，我嘅身體同靈魂已經被嗰隻怪物完全控制住，我依家能夠同你講到嘢，都係因為有人摧毀咗塊布幕，我先可以攞返一定嘅意識。但摧毀咗布幕，代表我哋都無辦法再阻礙嗰班人做『以血浴佛』嘅儀式，呢度已經變得好危險，陣間我將你嘅意識帶返去現實之後，你要同你嘅朋友即刻走，唔好再諗住搵呢度嘅所謂真相。呢度只有一班邪惡嘅人所凝聚出嚟嘅邪念，除此之外就咩都無。所以，哥，你要代替我好好生存落去。」
 
「唔得，你至少要話畀我知，當日你到底遇到啲咩事，我唔可以畀你死得不明不白。」
 
Andy聽到坤達的說話後，眉頭皺了一下，經過一陣沉思後，Andy點了點頭。
 
「好啦，你都有必要知道發生咩事，咁你先可以知道邊個先係你真正嘅朋友。我將我當日嘅記憶交畀你，你睇完之後就會醒返，之後你就帶你嘅朋友即刻逃走，以後都唔好再返嚟呢度。哥，希望你可以順利離開，照顧阿爸阿媽嘅責任，就麻煩你啦。再見啦。」
 
Andy把右手的食指放到坤達的前額，當日一幕又一幕的情景在坤達的腦海浮現。
 
然後，坤達便從沉睡中，清醒過來。