佛誕怪奇短篇 - 廢棄村落之浴「罰」節: （十八）摧毀布幕

「呢塊布幕？有咩咁特別？」
 
小雅不明白子晴的說話，而旁邊的阿棠亦是一臉困惑的樣子。
 
「你哋唔覺得，呢塊布幕太過乾淨咩？」
 
兩人聽到子晴的話後，才突然意識到眼前的布幕的確乾淨得有點過頭。
 
雖然能看到布幕上有褪色的跡象，但除此之外，布幕上竟連一丁點的灰塵也沒有，而且也看不到有任何破損，仿佛有人好好打掃過一樣。
 




「果然，牛屎湖村啲人一直都留喺呢度，我哋一定係中咗佢哋圈套先會入嚟。」
 
「咁我哋點算呀？佢哋如果真係會過嚟嘅話，我哋咪好危險？」
 
「小雅你唔駛擔心，就算呢度定期有人過嚟，依家咁大雨，佢地都應該唔會選擇依家過嚟。」
 
子晴邊說邊走近布幕，兩人見狀也跟了上去。
 
「我比較好奇嘅係，布幕背後，到底有啲咩？」
 




「唔駛好奇，拉開佢就知有啲咩啦。」
 
阿棠邊說邊走向布幕，但奇怪的是，當阿棠抓住布幕後，他瞬間鬆手並跌坐在地上，整個人更是大汗淋漓，臉上充滿恐懼，仿佛看到甚麼不該看的東西似的。
 
「肥棠你做咩呀？」
 
「我，我，我......」
 
阿棠努力地想作出回應，但身體卻好像不聽使喚似的。
 




「做咩呀你？唔好嚇我呀，咁凍嘅你？」
 
小雅走到阿棠身旁，想扶起他的時候，發現阿棠的手冷得不像話。
 
「似乎呢塊布幕好有問題，我哋扶阿棠去火爐邊先啦。」
 
阿棠在兩人協助下，靠近到火爐旁邊後，人總算慢慢恢復到原樣。
 
「咻咻，咻咻，我，我依家好啲啦。」
 
「阿棠，頭先到底發生咩事？你一掂到塊布就成個人變到好唔妥咁。」
 
「係囉肥棠，頭先你成頭汗，但隻手又鬼咁凍，嚇到我呢。」
 
「我......我都唔知點講，同埋，你哋可能聽完都唔會信。」




 
阿棠只是稍為回想了一下剛才的情況，身體便不自覺顫抖起來。
 
「阿棠你慢慢嚟，唔駛急嘅。」
 
子晴向阿棠遞上熱水，與剛剛被照顧的情況完全反過來。
 
兩人靜心等待着阿棠冷靜下來，在這期間，小雅曾多次看向布幕，很有衝動想碰碰看，可是想到阿棠現在的模樣，又不敢貿然行動。
 
「好啦，我應該，應該無事啦。小雅你唔好望啦，呢塊布幕好邪門。」
 
阿棠在打消了小雅的念頭後，便開始說明剛剛的情況。
 
「講明先，呢啲都係我嘅感覺嚟，你哋唔信都無辧法。頭先我一掂到塊布，準備用力拉開佢嘅時候，突然之間，周圍變成一片漆黑。然後我見到，有一大班人圍住個奇怪嘅佛像喺度唸經，但最恐怖嘅係，喺佛像面前綁住咗好幾個人，每當佢哋唸經到咁上下，佢哋就會用刀斬落啲人度，佢哋好似好熟練咁，每砍一次，佢哋嘅血就會灑落去佛像度，而且每一刀雖然會令佢哋流好多向，但全部都係啱啱好，唔會因為痛楚或失血過多而暈咗，佢哋每個人都係清醒咁感受住自己身體被慢慢一刀一刀咁切割，直到成個佛像都被染紅之後，佢哋先從呢種恐怖嘅狀態之中解放，徹底失去生命。而呢種近乎凌遲嘅酷刑，喺我面前不斷出現，每一次都係唔同嘅人，每一次都係喺清醒嘅狀態之下失去性命，重複咗十幾，可能有廿幾次......」
 




「Oh my god......太恐怖啦......」
 
「呢個儀式，似係馮伯提到，佢哋以前細個嘅經歷，只係佢當時無睇到成個過程。」
 
子晴的話提醒了大家，更進一步認證了馮伯說的都是實話，並非像坤達所說的是怪力亂神之說。
 
「當時我睇到咁上下嘅時，腦海都有諗起馮伯講嘅嘢，而當我有呢個諗法嘅同時，嗰班人好似發現咗我一樣，慢慢包圍我。我當時明明想逃走，但唔知點解完全郁唔到，下一秒，我已經被佢哋綁住喺佛像度。」
 
「肥棠你唔係想講你都經歷咗一次，一次，凌，凌遲嘅酷刑......」
 
「我唔知叫好彩定唔好彩，我無經歷到呢個情況，但嗰一刻，當佢哋想對我出手嘅時候，我感覺到，嗰啲被佢哋凌遲處死嘅人，佢哋嘅怨恨、怒火都湧入我嘅意識入面，我感受到佢哋嘅唔甘心......喺我嘅意識返嚟現實之前，我感覺到佢哋唯一嘅願望，『幫我哋離開呢個地方』，然後我就發現自己原來仲停留喺呢度。」
 
「吓？我哋依家連自己都搞唔掂，仲點幫佢哋呀。」
 
「我都唔知，但我比較擔心嘅係我哋嘅安全，依家可能只係呢場大雨，令到佢哋無辦法對我哋出手，一旦停雨嘅話，我哋可能就係下一個受害者。」




 
阿棠的話提醒了小雅，的確，如果一切都是真實，阿棠經歷的是以往受害者留下的記憶，那麼，他們的情況絕不樂觀。
 
「關鍵，似乎就係呢塊布幕。」
 
子晴一直緊盯着布幕思考着。
 
「子晴，你唔好諗住掂塊布幕，啱啱嘅經歷唔係講笑，我唔想你再經歷一次。」
 
「咁點好呀，呢度就係得咁大，其他地方又唔覺有咩線索，唯一呢塊布幕有啲提示，但又唔掂得。不如，等我試多次啦。」
 
小雅除了擔心三人的安全外，更擔心着不知所蹤的坤達，既然眼前有線索，他實在不願意就此放棄。
 
「我咪同你講咗唔好掂囉，頭先我因為好彩先醒得返，如果今次你掂完塊布，無人知你會唔會咁好彩醒得返。同埋，嗰種凌遲嘅恐怖，嗰種絕望......」
 




阿棠邊說邊回想起剛剛的影像，身體亦顫抖起來，小雅看到阿棠的反應，也打消了念頭。
 
而在一旁的子晴，想了良久，檢起了地上的一根木條，放到火盤之中，然後交到阿棠手上。
 
「阿棠，你講得啱，我哋唔應該再去掂呢塊布幕，但佢係我哋唯一嘅線索，既然佢哋同你講咗要幫佢哋，我諗，由你嚟做會好啲。」
 
阿棠從子晴手上接過火把，明白了子晴的意思。
 
「萬一，我燒咗塊布之後，其實幫唔到，甚至害咗佢哋呢......」
 
「但我哋已經無其他辦法，與其繼續等，不如死馬當活馬醫。」
 
子晴的說話，令阿棠也認為，只有這一條路可以走了，而阿棠在動手前，亦看了小雅一眼，小雅默默地點了點頭，算是取得了共識。
 
「既然係咁，死就死啦。」
 
阿棠將火把放到布幕前，布幕的邊角開始冒起火來，然後火勢慢慢擴大，開始漫延至整塊布幕。
 
到底，這是否一個正確的決定呢？