佛誕怪奇短篇 - 廢棄村落之浴「罰」節: （十六）詭異的誦經
「奇怪啦，坤逹明明行先過我哋，點會唔見人嘅？係咪出咗咩事？我哋快啲去搵佢啦。」
「小雅你冷靜啲先，依家周圍咁大雨，我哋出去嘅話都好難搵到佢。加上子晴咁虛弱，我哋無理由掉低佢一個喺度，陣間有咩事咁點算？」
「咁唔係點啫，一係咁，你留喺度照顧子晴，我自己去搵坤達，咁得啦啩！」
「唔係呢個問題呀，好似頭先你哋咁講，我哋唔應該分開行動，如果唔係，有咩事上嚟會好危險。」
「咁咪係囉，依家得返坤達自己一個，佢有咩事點算，如果我依家去搵佢，同佢會合嘅，我哋至少會有兩個人，有咩事上嚟都會有個照應。我唔理，我要去搵佢。」
「小雅你等陣先，你唔好啲嘢一扯到去坤達度就無晒理智，你鍾意佢都唔係咁㗎。」
「係，我係鍾意佢，我係無理智，咁點呀？如果換轉係子晴有事，你係咪都會咁冷靜呀？」
「無啦啦你燒去子晴度做咩啫？」
「我係要你設身處地咁諗下，換轉係你鍾意嘅人出事係點！依家唔見咗嘅唔係子晴你梗係咁講啦！或者坤達唔見咗人，你開心都嚟唔切啦，咁你就唔駛驚子晴淨係理坤達唔理你。」
「趙詩雅！你唔好愈嚟愈過份呀！話我想坤達失蹤，你真係痴痴地，我識佢耐過識你哋兩個，唔好喺度亂講！你要發癲係你嘅事，你要去呀嘛，你去呀，出咗事唔駛旨意我去搵你哋！我一早講咗唔好夾硬嚟搵咩牛屎湖村，話要嚟嘅又係你哋，依家出咗事你嚟怪我？如果唔係我仲念在朋友一場，我晨早走咗去啦！」
「你唔走係因為子晴咋嘛，你估我唔知咩，最後都係子晴叫住你，你先肯留低咋！」
阿棠與小雅兩人吵得臉紅耳熱，已經到了差一點就要動手的地步。
「阿棠，小雅，你哋喺度做咩呀？呢度係邊度嚟，我哋唔係喺大樹下避雨嘅咩？」
阻止了這一切的，是悠悠醒轉的子晴，但記憶看來有點混亂。
「子晴，你醒啦。你等一陣，我整熱啲水你飲。」
阿棠看到醒過來的子晴，便從袋子裡拿出了保溫瓶，放在火盤上稍為加熱。
「啱啱啲雨愈落愈大，我哋決定搵地方避雨，行咗一陣就發現咗呢度，所以入嚟避雨先。」
「嚟，子晴，熱水嚟啦，慢慢飲，唔好焫親。」
子晴接過水杯，喝了幾口熱水後，蒼白的臉上才恢復了點血色。
「喔，好舒服，唔該晒阿棠。咦？坤達呢？」
子晴無心的話語，又一次把兩人帶回剛剛的僵局，阿棠一發不言地為子晴加熱新的水，小雅則臉無表情地看着阿棠，氣氛好不尷尬。
「子晴你依家醒咗就好啦，本來坤達喺我哋前面探路，應該早過我哋嚟到呢個地方，但我哋入嚟都有啲時間，坤達都唔喺度，我懷疑佢可能出咗啲咩事。啱啱我同阿棠提醒佢喺度照顧你，我就去搵坤達。既然你醒咗，阿棠一個人都應該照顧到你，我可以放心去搵坤達。」
小雅說話同時，也開始整理他的背包。
「我頭先咪講咗囉，依家咁大雨，出面又唔知有啲咩喺度，就算無人無鬼無野獸，呢啲情況你出去，一個唔好彩跣親，到時咪盞搞。」
阿棠聽到小雅的話後，忍不住再次提醒他。
「我唔想同你嘈，如果坤達真係受咗傷，我起碼可以照顧佢，兩個人總比一個人容易生存落去。」
「隨便你，我會喺度等停雨，停雨之後我會同子晴出返去三椏村先，到時唔見人我會報警。」
「吓？小雅，你要去搵坤達？」
「係呀，你放心啦，我搵到坤達之後就會返嚟搵你......地。」
「但依家落咁大雨，你又無遮無雨褸，就咁出去好易出事㗎，不如等細雨啲先啦。」
「子晴你唔駛勸佢啦，要講嘅我都講過晒，佢咁大個人，要去嘅話邊個阻到佢呀，由佢啦。」
子雅聽到阿棠的話後，不滿地看着阿棠，卻也沒有發作。
「係啦，唔駛勸我啦，子晴你休息下，等雨停之後就同阿棠出返去先，我搵到坤達嘅話會帶佢去三椏村先，如果到時唔見我哋，你再幫我哋報警啦。」
「小雅，等等，你哋，聽唔聽到？」
本來以為子晴是想勸說小雅，但似乎不只是這樣。
「聽到啲咩？子晴你可能體力透支出現幻覺，你再休息下先啦......咦......」
阿棠本來以為子晴還沒完全恢復，但下一瞬間，他也聽到了子晴所說的聲音。
他看着小雅，小雅也神色凝重地點了點頭，他們都聽到了，那是誦經的聲音。
「邊個會喺呢啲荒山野嶺度唸經？」
阿棠三百六十度的看了一圈，確認了周遭沒有任何奇怪後，便走到外面巡視了一下，但甚麼也沒有看到。
「無理由，依家落咁大雨，要唸到幾大聲我哋先會聽到？」
小雅看着外面，凝視着那連綿不斷的雨水，不太相信聽到的聲音。
「咦？好似停咗啦。」
子晴說完後，兩人才意識到誦經的聲音不知道甚麼時候消失了。
「到底發生咩事，唔通馮伯講嘅嘢係真嘅，但就算係真，應該所有嘢都燒晒先啱㗎。」
阿棠抓了抓頭，對於無法掌握現狀感到煩燥。
「依家嘅狀況愈嚟愈詭異，唔得，再等落去，坤達一個人嘅話，肯定會出事。」
小雅心中只記掛着坤達的事情。
「小雅，如果你真係要出去搵坤達，不如等雨勢細啲，我同阿棠再等你一齊去。依家嘅情況好奇怪，如果再分散嘅話，就算搵到坤達，都未必可以安全咁出返去。又或者你搵到佢，但你自己都受咗傷，到時候反而要坤達照顧你，可能會令佢嘅情況變得更差。我明白你心急，但你都咁急嘅話，坤達獲救嘅可能性就愈細。」
小雅聽到子晴的話後，想到如果真的強行出去尋找坤達，在找到了後，到時候如果幫不了坤達，甚或成為了坤達的累贅，令坤達陷入更麻煩的狀態，那是小雅不願看到的。但如果現在甚麼也不做，害坤達失救，那會令小雅更加後悔。兩難的情況下，令小雅感到進退兩難。
「咁，咁......」
「你聽子晴講啦，等多一陣，到時候我再陪你去搵坤達啦。嚟到呢個地步，多一個人多一分力。」
「小雅你就忍下啦。」
在兩人勸說下，小雅思考了怎樣的行動才是對坤達最好。
「好啦，咁我等多陣啦......」
小雅不情願地下了決定，認為這是最好的選擇。
「希望快啲停雨啦。」
阿棠邊說邊看着外面，腦海裡仍在想着剛剛誦經的聲音，心裡祈禱着希望雨勢快點緩和，然後早點從這個詭異的地方逃出去。