每一次扑嘢，都係一場死亡挑戰: 28

「hi…Mandy…咁啱嘅…」

「係囉，咁啱嘅，我無阻住你喺度搞女呀嘛？」

「Tony依家俾人通緝緊，你可唔可以幫手打電話通知警察，叫佢地嚟拉人？」Emily向Mandy求救。

「呵！」Mandy冷笑一聲，「搵差佬嚟捉走條毒撚？咁咪益咗佢。」

對方身上散發住一股幽怨嘅氣息，感覺佢好似變咗另一個人咁。





「林大州，你知唔知點解我一直無報警搵人嚟拉你？」

「因為你原諒咗我？」

「哈哈哈哈哈！」Mandy放聲大笑，「你撞撚壞咗個腦呀？我對你恨之入骨，點可能會原諒你？」

「咁點解你無報警？」我問。

「報咗警又點？香港係無死刑架，就算告到你上法庭，個官最多咪判你終生監禁，但我上官婉曼唔係要你坐監，而係要你不得好死！」





「呼~~~」Mandy話音一落，周圍刮起咗一陣大風。

我額頭冒出冷汗，有一種唔係幾好嘅預感。

趁佢未行到埋嚟，睇嚟都係走人穩陣啲。

「想走呀？」

我隻腳都未𨅝落地，就俾Mandy識穿咗。





我唔理咁多，單腳用力一蹬，滑板就加速前進。

「哼！無走得咁易！」Mandy立即從後追趕。

令我驚訝嘅係，佢唔係用腳跑，而係好似識輕功咁凌空飛起。

我心諗自己係咪眼花，呢條友幾時學識輕功水上飄架！

Mandy三扒兩撥就追近我，眨下眼，我地相隔只得返兩三個身位。

前面條路好寬，無車無人，於是我踩住滑板勇往直前，加速再加速，想用最快嘅速度擺脫對方。

「砰！」突然間，聽到地下爆裂嘅聲音，仲要唔止一下。

砰！砰！砰！





我心知不妙，擰轉頭一望，竟然見到Mandy雙手發光。

佢喺後面一路追，一路隔空出掌，向我攻擊。

剛才連續幾掌打埋嚟，雖然打我唔中，但就打到地下幅石屎地爆開。

「嘩！乜原來你會識功夫架？」我大吃一驚。

「乜你唔知咩，我老豆咪就係已故嘅氣功大師，上官飛虎。」

上官飛虎？我聽過呢個名，好細個嗰陣見過佢上電視。

當時，佢表演一掌打爆一舊100kg嘅大石。





睇落覺得好誇張，以為係電視台夾埋佢嚟做假，點知原來真係咁猛料。

更估唔到嘅係，Mandy居然係佢個女。

馬後炮都要講句，其實好耐之前我都覺得奇怪架啦，好人好姐點會有人姓 上官。

「由細到大，我對嗰啲氣功一啲興趣都無，只不過為咗報仇，我喺我死鬼老豆嘅床下底，摷返本秘笈出嚟，呢段時間我就係咁日以繼夜、不眠不休咁潛心苦練。」

「本來打算練到最高境界嘅第十級先嚟搵你報仇，但既然你今日主動送到上門，我無理由放過呢個機會。雖然只係練到第七級，但要造低你應該唔成問題！」

Mandy一邊講，一邊踩上路邊嘅石壆，借力跳前，飛身向我擊出一掌。

好在我及時轉彎，先勉強避過。

佢嗰一掌同我擦身而過，打中咗路邊一個綠色嘅郵筒。





結果成個郵筒爆開咗，入面啲信飛曬出嚟。可見呢一掌威力之大。

轉完個彎，我先至醒起：屌唔撚係喎！家下我有金身護體，洗撚驚佢咩！

跟住我即刻剎掣dup停。