每一次扑嘢，都係一場死亡挑戰: 3

我望一望條女，發現佢竟然係我識得嘅人。

Mandy Sheung Kwun，我地公司嘅HR部女神。

佢個姓氏有啲特別，叫做「上官」。

除左睇武俠小說或者歷史書之外，日常都好少會見到呢個姓。

最近呢幾日Mandy好似都無返工，聽啲同事講話佢失戀俾仔飛。





莫非佢傷心過度，依家想跳海自殺？

話曬一場同事，我無理由見死不救，於是行過去勸佢唔好做傻事。

點知對方劈頭第一句就話：「Tony？點解你會喺度嘅？你跟蹤我呀？」

「下？你唔好亂講喎！我幾時有跟蹤你？我只不過係咁啱喺附近，見到你好似想跳海咁款，先好心行過嚟勸下你。」

跟住Mandy又一句撻埋嚟：「我嘅事唔使你理，行開！」





頂佢個肺！我好聲好氣咁勸佢，條友唔領情不得止，仲要叫我「行開」。

其實平時佢喺公司都出咗名「白鴿眼」，對住班高層就笑口噬噬，相反對住我呢啲低級職員就黑口黑面。

雖然俾佢噴到一面屁，但我都盡人事嘗試再勸佢。

大約十分鐘後，Mandy又打電話俾條仔：「Johnny，你係咪唔信我？你再唔出現嘅話，我真係跳架！到時我死左，你唔好後悔！」

十分鐘之前佢已經講過類似嘅說話，要知道女人最叻就係一哭二鬧三上吊，Mandy搞咁多嘢，睇嚟都係想條仔搵佢箍煲氹返佢，斷估都唔會真係跳落去。





只不過，凡事總有萬一。

Mandy講完電話之後，突然有隻蜜蜂飛埋嚟針佢，嚇到佢成個人失平衡，身體急速向後墮。

好在我企嘅位置算近，反應亦都算及時，因此第一時間伸手捉住佢。

本來Mandy正90度向後跌緊落去，但當我一捉實佢，隻手都未發力，佢就成個人定住左。

我雙手用力慢慢拉返佢上嚟，跟住Mandy無啦啦突然大聲尖叫：「啊！！！」

「都拉返你上嚟啦，你仲嗌乜嘢？」

「點解咁嘅！點解我郁唔到嘅！」Mandy好似變左一尊蠟像，全身定左格郁唔到。

呢個情況就同我頭先一模一樣！