[真人真事改編][校園][愛情]竟然因為IG live而帶來一段突如其來的緣份…: 第十一章——「令人期待的下集預告」

第十一章——「令人期待的下集預告」
「方辰軒！過嚟開枱！」
「收到…」
當我同Kay喺客廳做緊功課、溫緊習嘅時候，
母親大人就喺樓下廚房叫我落去幫手準備晚餐，
「咁你喺度做多陣，等陣再叫你。」
「Okay!!!」
而我就落咗樓下幫佢手。
期間母親大人又繼續發表佢奇怪嘅發言，
「你覺得阿Kay點啊？」




「可以點呀…」
「都幾靚吖～」
我點一點頭表示同意佢嘅發言，
畢竟以現代嘅審美觀嚟講，
佢絕對係一個美人。

「你估有冇得發展下～你唔好再咁毒啦～」
「邊有阿媽中五鼓勵個仔拍拖…」
「拍下拖有咩所謂啫～」
「我專注學業…」




「真係冇你符…」
而我眼尾亦都見到Kay喺樓梯偷聽緊，
但係聽到我講專注學業就上返去樓上。

「鐘情！食得嘢啦！」
當我哋準備好晚飯嘅時候我就叫佢落嚟，
而佢亦都用咗不足1分鐘，就落到嚟。
我覺得佢呢一點幾好，
佢由細到大都唔會要人哋等，唔會遲到。
「食飯！」三人同時發言。




與此同時，母親大人再次做起佢嘅「雞仔媒人」，
「Kay你記得得閒多啲上嚟食飯！唔使客氣！」
而Kay亦都禮貌地點點頭回應。

當晚亦再冇特別嘢發生，好簡單地食完晚飯Kay就返咗屋企，
而當我完成功課後亦都上床休息，
為聽日返學作充足休息…

「啊…」
我望一望鬧鐘顯示住「7:04」，
伸咗伸懶腰，拎起電話再慣常咁撳入社交媒體，
發現一則青少年墮樓案…
唉…
錯喺個制度。
喺張床度坐左5分鐘左右就決定落床，




梳洗一番再着上校服，
檢查書包一下有冇遺留任何嘢，
確定冇之後就落去食早餐。

「早晨母親大人。爸爸。」
「早晨！」佢哋兩個精神滿滿咁回答我，
看來佢哋心情不錯。
用咗10分鐘完成早餐就即刻出門口，
畢竟有少少趕。

出門口嘅時候，見到有兩個人影喺電梯門口，
行緊少少就發現原來係阿翊同Metis，
我慢慢梳理我嘅思緒，
琴日夜晚見到佢哋兩個，
今日朝早都見到佢哋兩個，




咁咪即係代表佢哋兩個成晚都一齊？

喺我梳理思緒期間，
阿翊同我打招呼，
「軒爺！早晨！」
Metis亦都向我點點頭。
「早晨，兩位！」
由於我同Metis完全唔熟悉嘅關係所以非常尷尬，
當我出咗𨋢就即刻用我要買早餐嘅理由離開佢哋兩個。
呼…
真係好尷尬…

但係當我行第二條路嘅時候就見到另外一位學校風頭躉，
「辰軒！早晨！」
阿柔小跑過嚟。




已經講咗好多次早晨嘅我亦都感到疲累。
「早。」
「你食咗早餐未啊？」
「食咗。」
「點解你睇落好似好唔精神？」
「都唔知點解今日一大朝早就見到咁多人…」
阿柔見到我嘅心情唔太好，就冇再出聲。
我同佢慢慢向着學校嘅方向行，
大家都不發一語，但係反而呢種感覺更加舒服，更加自在。
去到便利店門口，
阿柔就揮一揮手，
「你等我一陣！」

佢就入咗便利店，而我就喺門口等佢，
過咗5分鐘左右佢就行返出嚟，




「嗱！呢個俾你！」
佢伸出手，遞左一杯咖啡俾我。
我呆呆地望住佢。
直到佢推一推我，
我嘅魂魄先至返嚟，
「多謝…」
「飲完今日就精精神神啦～行快啲啦！」
講完之後，我同佢亦都加快腳步返學校。
估唔到今日嘅事，竟然會影響到之後同Kay既發展。