[真人真事改編][校園][愛情]竟然因為IG live而帶來一段突如其來的緣份…: 第八章——「意外現場」

第八章——「意外現場」
「翊，家姐係咪同咗你講左我哋今日放學約咗人？」
「吓…約左邊個？」
即係母親大人冇同家姐講啦。
咁佢今日做咩要刻意打扮…？
算啦，而家呢個唔係重點。
「記唔記得細個有個女仔成日同我哋喺公園玩？」
「有少少印象。」
「琴日佢無啦啦出現咗係我屋企，所以約咗佢今日放學喺個公園等。」
「軒爺，你肯定自己冇俾人呃？」




「呃…我諗冇啩…」

喺呢個時候，
代表小息完結嘅鐘聲亦都響起，
而迎接呢個時刻嘅係中文，
「地獄」呢一個字已經唔足以形容呢一個科目同埋呢一堂，
「起立！敬禮！」
「姜sir早晨！」
「同學早晨！」





而此時此刻阿柔望住我，
我突然驚覺今日係阿柔「正式」第一日返學，
畢竟佢就好似一個插班生一樣，
一分鐘過後佢仍然注視着我，
「做咩望住我？」我忍唔住問佢。
呢一刻嘅佢就好似一個小朋友「眼仔碌碌」咁樣望住自己陌生嘅世界，
然而繼續注視着我並說道，
「辰軒，你可唔可以幫我一個忙～」

多疑嘅性格呢一刻再次出現，




但望住佢天真無邪嘅雙眼，
感覺唔到任何惡意，
所以我就放軟心腸，
「幫咩？」
「等陣lunch同我去行下學校～」
「…好吧。」
「Fan QQQ～」

* * *
中文連堂完結，
落堂嘅鐘聲帶來短短45分鐘嘅午息，
去放鬆一整天疲累嘅身軀，
突然有人篤左我背脊一下，
我轉身，
發現原來係阿柔，




呢一刻既佢伸出舌頭，
做起鬼臉，
然而嘆一口大氣，
就好似將一整日累積落嚟既疲累一次過呼出去，
「好攰？」我忍唔住問到，
「你唔攰咩？」
估唔到佢會反問返我，
嗯…
冇預計過嘅答案…

「還好吧。」好攰…攰到一個點…
阿柔突然行近一步望住我，
並且露出一個似是而非嘅笑容，
冇問題吧…
「行啦～辰軒～」




「嗯。」

喺行去禮堂嘅途中，
突然發現點解佢唔搵其他朋友？
「點解唔搵你其他朋友？」
「個個都要陪男朋友～冇人肯陪我～」
「咁你唔搵自己男朋友？」
「佢都唔係呢間學校～」
「噢…」
睇來學校班男仔冇望了。

然而過咗唔夠5分鐘，
我就發現周遭都傳來一啲注視目光，
仔細一看，
所有人都注意到呢個女孩子嘅出現，




其實都正常嘅，
畢竟一個美少女突然出現咗喺學校引起迴響都唔出奇。

同阿柔喺學校慢慢行，
一路遊覽學校唔同嘅地方，
而且亦都同佢講吓學校以前一啲趣聞，
例如有一對情侶一齊入咗殘廁但係冇出過嚟，
各種學校唔同嘅事件，
但係突然之間有個師兄出咗嚟，
但同時間佢後面亦都有好多女仔跟住佢，
佢俾咗一封信阿柔，
然後不發一語走咗，
而嗰位師兄身後嘅女性亦都仇視住阿柔。

當人潮散去，




我同阿柔亦都繼續上路，
「你知道佢係邊個？」
「中六師兄—『符日燊Sky』，學校其中一大風頭躉，『十星』之一。」
「咩係十星？」
「每年中一到六嘅女性都會有一個秘密活動，就係投選學校十大校草。」
「原來如此…」
「我哋班嗰個黃天翊都係其中一個。」
然而阿柔喺我面前慢慢打開封信，
原來係嗰位師兄嘅電話號碼，
嗯…老套。

時間過咗冇幾耐，
午息亦都完結，
而我同阿柔返到課室嘅時候，
亦響起一片嘩然，
估唔到Sky交出一封信嘅消息，
咁快已經傳遍校園。
我哋返去座位嘅途中有少部份嘅女性生物仇視住阿柔，
大概是認為他們的男神被搶走吧，
而阿柔嘅朋友亦都蜂擁咁樣圍喺佢嘅座位，
睇嚟大家對呢件事都好有興趣，
我就慢慢坐喺佢身旁食花生吧。