[真人真事改編][校園][愛情]竟然因為IG live而帶來一段突如其來的緣份…: 第五章——「心跳回憶」

第五章—「心跳回憶」
當我仍然呆滯地望住佢嘅笑容之際，
佢雙手喺我面前掃咗兩掃，然後說道
「你冇嘢吖嘛？」
我先突然回過神來，
「冇事，繼續溫習吧。」
隔左冇幾耐，
突然感受到有嘢掂到我個頭後方，
擰轉身一望，
發現原來係阿翊，




佢掉咗一張紙仔過嚟，
「做咩望住人哋望到入晒神～」
然而，我亦都回佢一個冷眼，
以表達我嘅無奈。

然而，我就再次專注喺面前嘅功課同埋筆記上，
面對着堆積如山嘅筆記，
浩瀚嘅書海，
感受到嘅，
只係比石頭壓着喘不過氣嘅感覺，




呢種感覺…
真係好難受…

我偶然間咁望向溫緊習嘅阿柔，
整齊嘅筆記，
色彩絢爛嘅便利貼，
佢大概都係一個完美主義者吧。
* * *
鈴鈴鈴…
鈴鈴鈴…




聽到落堂嘅鐘聲，
我都不自覺地嘆一口氣，
咁我終於短暫地逃離呢一個強制教育營，
呼…終於可以休息一陣…
「呼！終於走得～」
阿翊好似一個漏氣嘅充氣公仔咁樣講，
而我起身之前亦都向左邊望一望，
阿柔慢慢咁將佢嘅功課同埋筆記放入書包。
「咁聽日見啦！辰軒～」
「聽日見。」

講完佢就慢慢一個人咁樣離開課室，
我亦都同阿翊一齊返屋企。
返屋企嘅途中，
我突然諗返起今日朝早嘅賭注，




「翊，你應該記得你今朝早同我賭過，你覺得今年冇靚女㗎呵～」
「冇冇冇，冇啲咁嘅事～」
「願賭服輸！」
「得啦！幾時走過你數？聽日請lunch…」
「感謝大佬！」

行咗唔夠五步，
佢又問返我轉頭
「啱嘅鎖匙？」
「鎖匙?」
回答完，就冷笑左一聲。

時間回溯返去，頭先喺留堂班嘅時候，
我嘅一舉一動，而家諗返起都覺得好…
好…




好…奇怪…?
眉頭一皺，
望住個天慨嘆左一聲…
只係太攰啫！

回望頭先留堂班嘅情況，
心底裏有種奇怪嘅感覺…
但係我打從心底唔鍾意呢種感覺。

喺我望天打卦之際，
我同阿翊已經不知不覺咁去到屋企樓下，
而係呢個時候亦都聽到一把女聲…
「黃天翊！過嚟幫我攞住呢幾袋野！」
「係…收到你…」
呢一個能夠令到阿翊低聲下氣嘅女性，




就係佢親家姐—「黃天藍Mika」
而明顯地佢哋兩個真係親生姊弟，
二人都遺傳咗父母完美嘅基因，
如我之前所講，阿翊係再世潘安，
而Mika就絕對稱得上再世王昭君。

中大讀緊中文系嘅佢集結美貌與智慧於一身，
迷倒一眾男生嘅佢唔單止因為甜美嘅外貌，
個人認為同佢嘅心胸廣闊有極大嘅關聯性…
嗯…
心胸非常廣闊…
我見到佢之後就同佢打招呼
「家姐！」
「喲～軒仔～」
我同阿翊都係一樣叫佢家姐，




因為始終由細玩到大，
所以習慣咗了。

「啊！唔記得咗仲有嘢要買！細佬你跟住我幫手攞嘢！」
「係…收到你…」
突然之間，家姐就捉住阿翊向着超級市場嘅方向進發。
而阿翊亦無奈地一邊嘆氣去回應佢…
嗯…
呢兩姊弟真可愛～
雖然家姐偶爾會有少少傻氣，
但係喺重要關頭，都係一個相當可靠嘅人！

當佢哋離開嘅時候，
我亦都轉身向屋企嘅方向進發，
再次戴上隔絕世界嘅儀器，
躍進我嘅一人之境。

入到𨋢，旁邊有一個應該素未謀面嘅女孩子，
身穿一間傳統女名校嘅校服，
而碰巧呢一間學校就正正處於我學校嘅對面街，
此時此刻嘅我亦都冇理會到呢一個女孩子，
當到達我屋企嘅樓層，我就行出𨋢，
但估唔到原來呢個女仔同我有咁深嘅淵源……