《9UP散文集》: 《每個人心入面都有一個『佛地魔』》—上

每個人心入面都有一個『佛地魔』。當然唔係講緊《哈利波特》入面果個大魔王。如果各位有睇過《哈利波特》，應該都會記得『佛地魔』呢個名唔可以隨便提起。每次有人想將『佛地魔』呢個名講出口，就可能會比其他人制止。但其實，現實世界都會有咁嘅情況出現。咩時候 ? 有人響你面前提起你個EX果陣。雖然EX多數情況係指「前任」咁解。但呢到所講嘅EX，係指果位。邊位 ? 你而家腦海中諗緊果位。 「喂，我早排收工返屋企果陣響街撞你個EX呀。」「嗯 ? 你講緊邊個EX先 ? 嗱，唔好咁嘅樣先，我唔係囂，只係想搞清楚邊個姐，如果你講緊我上上果任，就麻煩你高抬舉手，唔好鬼提起佢啦唔該。」「我真係分唔到啊大佬，你咁Q多個EX......」「咁不如唔好講呢個話題 ? 我唔想領你野。」「唔係啊，我見到家怡拖住條新仔......喂喂喂 ! 唔好扔凳啊喂 ! 公司財產....哎呀 ! 」「死肥仔 ! 叫你唔好講 ! 死都要講 ! 咪走呀你 ! 」死肥仔——係我響公司識嘅朋友。年幾前，我地都仲係普通同事關係，最多都係點頭打招呼果隻。後來有一次，公司安排我地跟同一個Project，然後lunch time果陣傾開先知，原來大家都有睇NBA，然後都係鍾意Leborn James。就係因為咁，我地漸漸成為左好朋友。——直到今日。因為他衰多口，我地嘅友誼面臨決裂嘅危機。「哈......哈......哈......點解...你咁鬼肥...跑六、七層樓梯都唔攰咁嘅....?」「哈...哈...我...哈...你睇我...邊忽似唔攰......頂你...個肺...張凳扔得咁準......你唔去打NBA ? 」「我打你老......唔係...唔好扯開話題...總之......唔好再提起果個人...」「呼......知啦頂......我都...唔明你嘅...都成年啦...仲咁介意都有嘅 ? 」「你唔好理，總之唔提得 ! 」「唔提得...唔提得...佛地魔咩......名都唔提得......」其實係，果個人同佛地魔一樣，對我黎講真係唔提得。當然啦，你提左都無野嘅，準備好做Running Man就得。 李家怡，係我前前任女朋友。即使同佢分手之後我仲有拍多左次拖，但呢個女人留低嘅野實在太多。多到我連愛另一個人嘅心力都無哂。所以我先至會同前任講分手，幸好處理得宜，無留比人太多傷害。我同佢分開左一年，自分開果日起，到而家都未見過。最好亦唔好見，因為唔想諗起。對我黎講，分手果一刻唔算係最慘。最慘嘅係分手之後，你諗返起以前開心嘅日子、經過一齊去過嘅地方、食返一齊幫襯過嘅餐廳。而當中，最最最慘嘅係——你知道呢個人以後唔再屬於你，佢會同另一個人並肩而行。啲人成日話 : 「哎，無左咪搵過第二個囉，留得青山在，哪怕無咸書。」係嘅，個森林真係好大好大，唔至一棵樹。個海都好大好大，唔至一條魚。但係只有你自己清楚，有啲感覺真係唯獨呢個人比到你。 「話左你㗎啦李家怡，我提過你無數次，你個Friend一定唔會還錢比你㗎。」「我而家啲錢都拎唔返啦，你仲鬧我做乜野啫 !」嗱，大家評評理，一個你識左幾個月嘅朋友，問你借大嗱嗱兩萬蚊。點會借㗎先 ? 係咪 ? 咁我都好難唔嬲㗎嘛，我又唔係發佢脾氣，比啲火姐，等個傻婆知道件事嘅嚴重性姐都係。家下佢話返我轉頭都有嘅 ? 「我唔係鬧你，係想你知道，下次唔好咁蠢，記得帶眼識人。果兩萬蚊，當買個教訓啦唉......」當下佢無出聲，我本來以為佢嬲我話佢，點知佢響個手袋到抄左個眼鏡盒出黎。「你做咩拎副眼鏡出黎 ? 」佢都無即刻答我，淨係打開個眼鏡盒，戴左副眼鏡。「咩料呀 ? ? ?」佢好似無諗住解釋下佢奇怪嘅舉動，淨係露出一個好得戚嘅笑容，定格望住我三秒。「戴眼識人呀嘛。」「.................」我響個腦入面思考左半秒，然後——「哈哈哈哈哈哈哈哈哈，笑死我，我真係頂你唔緊哈哈哈哈哈哈 ! 李家怡呀李家怡，係得你先比到呢啲反應出黎。」「係㗎，得我㗎咋，以後都係。」「嗯，當然啦。」 「喂...喂...? 」「嗯 ? ? ? 做...做咩 ? 」「無呀，見你發哂吽竇唔食野，諗住睇下你件漢堡排係咪打算唔食。你唔食我食呀。」「食啦食啦，肥死你呀死肥仔。」「嘿嘿，都唔爭果一塊漢堡排姐。」人係犯賤嘅生物。明知自己肥，都仲會食埋人地果份。明知自己其實唔想諗，都仲會忍唔住問。「所以......佢有無同你打招呼 ? 」「嗯 ? 邊個無同我打招呼 ? 」「唔係呀頂，你朝早咪講緊撞到呀邊個邊個嘅，咁你地有無打招呼，係咁意噓寒問暖果啲呀 ? 」「喔 ~ 你講阿李家——唔唔唔....」「收聲，Skip左原本想講嘅野，講重點就得。」「......我成嘴油你都夠膽掂嘅...佩服佩服...」「—講—重—點—」「實有啦，咁成日上你到睇波，見過咁多次，邊有可能扮唔識。」「喔......佢...睇落幾好 ? 」「肥左啲咁囉，可能條仔湊得..................對唔住大佬 ! 唔講唔講 ! 唔好玩刀 ! 」「餐刀姐，死唔到人嘅。——所以......」「你唔好響到所以所以啦，佢無問起你。」「..........」「同埋——佢兩個月後結婚，嗯......所以，算啦......」「..........」 啪——好似有啲乜野斷左咁。喀——好似有啲乜野爛左咁。「哈哈，係咩，幾好呀...幾好。」「你個樣同你講嘅野好似唔太Match啵老友。」「痴線，佢搵到個歸宿啵，我實開心啦老友。唔通同我結咩，我對佢都唔好......」「......唉，紙巾 ? 」「嗯.......」 係，我對佢真係唔好，由此至終都唔好——