后海灣中學 (甜): 萬聖節 (1) (Dick 視覺)

萬眾期待嘅Halloween Day終於來臨，但係好可惜，我嘅大計未開始就已經失敗。

"依家我做你partner好失禮你咩？"企喺我隔離嘅Tracy，掃一掃佢條校裙。學校基於安全理由，除左工作人員之外，其他學生一律要著返校服。

"梗係唔係喇，有Tracy姐做我partner，真係我嘅榮幸啊。"我話。原本我諗住靠Tracy幫手氹Cindy做我partner，點知Cindy搵返我做Tracy partner，嗯，都好過無嘅。

我地排緊隊，準備入去玩后海灣中學學生會搞嘅鬼屋，類似主題公園嗰啲會有人扮鬼嚇自己嗰啲。不過呢度係學校，當然無咁大規模，學校會喺學校南，北操場同兩個操場之間嘅連接路整左條鬼屋路線，雖然根本唔算一間屋，因為室外嘅部份多過室內，不過以學生土炮製作，都算係錦。

排我同Tracy前面嘅係Cindy同Raven，我同Raven都係讀西史，不過唔算好熟，真係估唔倒佢會搶走左Cindy......我指Cindy嘅partner嘅位置。我見Cindy同Raven雙手翹實對方，又要驚又要玩個鬼屋錦，唉，可惜佢翹住嘅唔係我.....不過，依家喺我隔離嘅Tracy好似仲失望，佢望住Cindy同Raven，悶悶不樂嘅樣，應該有野發生。



"我無得同Cindy 一齊行就唔話開心姐，點解妳好似仲sad過我？"我問Tracy。

"因為要同你一齊行囉！"佢話，但佢嘅表情話我知呢個唔係事實嘅全部。

"哦，我知喇，因為Raven搶左妳個位....."我細細聲自己講，睇下Tracy聽倒之後有咩反應。

"收聲啦咁多野講，行喇！"Tracy提我向前行。

其實呢條鬼屋路線，真係好土炮，學生會係好有誠意，但完全嚇唔倒我同Tracy。



"嘩！"我地隔離有隻"鬼"彈出黎嚇我地，我同Tracy過左兩秒先有反應。

"啊同學，不如你化好個妝先？"我同隻"鬼"講，之後頭也不回繼續行。

"烏.......烏........"我地聽倒奇怪嘅聲音。

"邊有人擺個喇叭擺咁出架？"Tracy踢一踢佢右邊嘅喇叭。

"啊！"儘管我同Tracy都覺得呢個鬼屋一啲都唔恐怖，但我地都聽倒前面有女仔尖叫。



"佢地好似好驚錦。"我講。

"好擔心Cindy牙？過去囉。"Tracy喺隔離潤我。

"我邊夠膽扔低妳一個喺度啊，陣間妳同Cindy 講話我蝦佢好姊妹我咪死得？"我話。

我地沿路仲見倒好多"浮"喺空中嘅假手假腳。

"真係好膠囉，滴兩滴茄汁都好啊" Tracy摸住其中一隻假手講。

"學校搞嘅係咁上下架啦，頭先Cindy喊得咁大聲，仲以為真係咁恐怖添。"我話。

"佢好細膽架，少少野都驚一餐"Tracy話。可惜我唔喺佢隔離，如果唔係......我幻想住Cindy捉實我對手......

"啊！！"前面又傳出刺耳嘅尖叫聲，我無無啦又諗倒啲野。



"如果Cindy唔係搵我陪妳，妳會搵邊個做partner啊？"我問佢。

"唔知啊。"佢一邊答，一邊用手接撥開眼前嘅假蜘蛛。

"應該有好多男同學搵妳啦.....夜晚可以......"我都未講完，Tracy一手打落我褲襠。

"死鹹濕仔！"佢話。

"痛！喂....我都未講完！"咁突然嘅偷襲嚇到我臉都青，雙手即刻放喺褲鏈對外，避免第二次打擊。

咁啱呢個時候，有隻"殭屍"喺草叢打横彈左出黎，比佢望倒我雙手遮住我下面。

"放心喎，我唔會搞人下面，同學你唔洗咁驚。"隻"殭屍"好尷尬錦同我講。



我微笑扮無野，但其實啱啱Tracy一野打落黎，我下面就充血硬緊。